ബൊഗോട്ട: കാമുകി ഫെയ്സ്ബുക്കിൽ പങ്കുവച്ച ചിത്രത്തില് പണിക്കിട്ടി കുപ്രസിദ്ധ മെക്സിക്കൻ ലഹരിക്കടത്തുകാരൻ. എൽ പിറ്റ് എന്ന പേരിൽ അറിയപ്പെടുന്ന ബ്രയാൻ ഡൊണാസിയാനോ ഓൾഗ്വിൻ വെർഡുഗോയാണ് (39) അറസ്റ്റിലായത്.
കൊളംബിയയിലെ കാലി നഗരത്തിലുള്ള ആഡംബര അപാർട്മെന്റിൽ കാമുകിയുമൊത്ത് കഴിയവേയായിരുന്നു അറസ്റ്റ്. 200 ഓളം രാജ്യങ്ങളിൽ ഇന്റർപോളിന്റെ റെഡ് കോർണർ നോട്ടിസ് നിലനിൽക്കുന്ന ഇയാളെ പിടികൂടാനുള്ള ശ്രമങ്ങൾ ഊർജിതമാകുന്നതിനിടെ വെർഡുഗോയുടെ കാമുകി ഫെയ്സ്ബുക്കിൽ പങ്കുവച്ച ചിത്രമാണ് നിർണായകമായത്.
കഴിഞ്ഞ ഫെബ്രുവരിയിൽ ഇയാൾ കൊളംബിയയിലേക്ക് കടന്നതായി യുഎസ് ഡ്രഗ് ആൻഡ് എൻഫോഴ്സ്മെന്റ് ഏജൻസി (ഡിഇഎ) കൊളംബിയൻ അധികൃതരെ അറിയിച്ചിരുന്നു. പിന്നാലെ എൽ പിറ്റിനായി കൊളംബിയൻ പൊലീസ് തിരച്ചിൽ ശക്തമാക്കി.
പ്രശസ്ത മെക്സിക്കൻ മോഡൽ കൂടിയായ കാമുകിയുടെ നിർബന്ധത്തിനു വഴങ്ങി വിനോദസഞ്ചാര കേന്ദ്രമായ ലോസ് ക്രിസ്ടെയ്സിൽ വച്ച് എൽ പിറ്റോ കാമുകിക്കൊപ്പം ചുംബന സെൽഫി എടുത്തിരുന്നു. ചിത്രം കാമുകി ഫെയ്ബുക്കിൽ പങ്കിട്ടു. ഈ ചിത്രം കേന്ദ്രീകരിച്ച് നടത്തിയ അന്വേഷണമാണ് എൽ പിറ്റിനെ കുരുക്കിയത്. യുഎസ് ഡ്രഗ് ആൻഡ് എൻഫോഴ്സ്മെന്റ് ഏജൻസി അംഗങ്ങളും കൊളംബിയൻ പൊലീസും ചേർന്നാണ് അറസ്റ്റ് ചെയ്തത്.
ഗറില്ലാ സംഘമായ റവല്യൂഷണറി ആംഡ് ഫോഴ്സസ് ഓഫ് കൊളംബിയയിലെ അംഗങ്ങളുമായി ചേർന്ന് ലഹരിക്കടത്ത് ആസൂത്രണം ചെയ്യാനാണ് ഇയാൾ കൊളംബിയയിലെത്തിയതെന്നാണ് നിഗമനം. കൊളംബിയയിൽ നിന്ന് യുഎസിലേക്കും മെക്സിക്കോയിലേക്കും വൻതോതിൽ ലഹരിക്കടത്തിനും ഇയാൾ പദ്ധതിയിട്ടിരുന്നതായി പൊലീസ് പറയുന്നു. രണ്ടാഴ്ചയിലേറെയായി ഇയാളുടെ നീക്കങ്ങൾ പൊലീസ് നിരീക്ഷിച്ചു വരികയായിരുന്നു. അറസ്റ്റ് ഒഴിവാക്കാനായി ഇയാൾ പൊലീസിന് 2.65 ലക്ഷം ഡോളർ കൈക്കൂലി നൽകാൻ ശ്രമിച്ചുവെന്നും റിപ്പോർട്ടുകളുണ്ട്.
ലഹരിമരുന്ന് കടത്തിന് 196 രാജ്യങ്ങളിലാണ് എല് പിറ്റിനെതിരേയുള്ള ഇന്റര്പോള് റെഡ് കോര്ണര് നോട്ടീസ് നിലവിലുള്ളത്. കൊളംബിയയില് നിന്ന് അറസ്റ്റിലായ ഇയാളെ ഉടന് തന്നെ കാലിഫോര്ണയയിലേക്ക് കൊണ്ടുപോകുമെന്നാണ് വിവരം. കൊക്കെയ്ന് കടത്ത് അടക്കമുള്ള കേസുകളുടെ വിചാരണയ്ക്കായാണ് എല് പിറ്റിനെ യുഎസിന് കൈമാറുന്നത്.