അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.ഫ്രാൻസിൽ കനത്ത സുരക്ഷാനടപടികൾ വകവയ്ക്കാതെ പ്രക്ഷോഭം വീണ്ടും ശക്തമാകുന്നു. ശനിയാഴ്ച മാത്രം കുറഞ്ഞത് നാലു ലക്ഷത്തോളം ആളുകൾ തെരുവിലിറങ്ങി പ്രതിഷേധിച്ചതായും, ഇതിൽ 1.10 ലക്ഷം പേർ പാരിസിൽ നിന്നുള്ളവരാണെന്നും ആഭ്യന്തര മന്ത്രാലയം അറിയിച്ചു. പ്രക്ഷോഭവുമായി ബന്ധപ്പെട്ട് രാജ്യത്തുടനീളം 1000 പേരെ പൊലീസ് അറസ്റ്റ് ചെയ്തു.
കൊള്ളയും അക്രമങ്ങളും തടയാൻ പോലീസ് കനത്ത ജാഗ്രതയിലാണെന്ന് ആഭ്യന്തര മന്ത്രാലയം വ്യക്തമാക്കി. വിവിധ നഗരങ്ങളിലുണ്ടായ സംഘർഷങ്ങളെ തുടർന്ന് പോലീസ് കണ്ണീർവാതകവും ജലപീരങ്കിയും പ്രയോഗിച്ചു. തോക്കുകളും പടക്കങ്ങളും മറ്റ് ആയുധങ്ങളും പിടിച്ചെടുത്തിട്ടുണ്ട്. പാരിസിലെ പ്രക്ഷോഭത്തെ നേരിടാൻ 70,000 പേരടങ്ങുന്ന വലിയ പൊലീസ് സംഘത്തെയാണ് വിന്യസിച്ചിരിക്കുന്നത്. കൂടാതെ ഹെലികോപ്ടറുകളും കവചിതവാഹനങ്ങളും ജലപീരങ്കികളും പൊലീസിന് നൽകിയിട്ടുണ്ട്.
പാരിസിലെ പ്രക്ഷോഭത്തെ തുടർന്ന് സഞ്ചാരികളുടെ പ്രധാന ആകർഷണമായ വിവിധ മ്യൂസിയങ്ങൾ അടച്ചുപൂട്ടി. കടകളും അടച്ചിട്ടിരിക്കുകയാണ്. കഴിഞ്ഞയാഴ്ച പ്രക്ഷോഭത്തിനിടെ നഗരത്തിലെ മൂവായിരത്തോളം കടകളാണ് കൊള്ളയടിക്കപ്പെട്ടത്. പാരിസിന് പുറമെ 110 കിലോമീറ്റർ അകലെയുള്ള ഓർലിയൻസ് നഗരത്തിലും ആയിരക്കണക്കിന് ആളുകൾ റാലിയിൽ പങ്കെടുത്തു.
