അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.
ന്യൂഡല്‍ഹി: ആംനസ്റ്റി ഇന്ത്യ മേധാവി ആകര്‍ പട്ടേലിനെതിരായി സി.ബി.ഐ പുറപ്പെടുവിച്ച ലുക്ക് ഔട്ട് നോട്ടീസ് പിന്‍വലിക്കാന്‍ കോടതി ഉത്തരവ്. ഡല്‍ഹി റോസ് അവന്യു കോടതിയാണ് ഉത്തരവിട്ടത്.
കേസില്‍ തന്റെ കീഴുദ്യോഗസ്ഥന്റെ ഭാഗത്ത് നിന്നുണ്ടായ വീഴ്ച അംഗീകരിച്ചുകൊണ്ട് സി.ബി.ഐ ഡയറക്ടര്‍ രേഖാമൂലം ക്ഷമാപണം നടത്തിയതായി കോടതി ഉത്തരവില്‍ വ്യക്തമാക്കി.
വിദേശ നിക്ഷേപം സ്വീകരിച്ചതുമായി ബന്ധപ്പെട്ട കേസില്‍ തന്റെ പേരില്‍ പുറപ്പെടുവിച്ച ലുക്കൗട്ട് നോട്ടീസ് ചോദ്യം ചെയ്ത് ആകര്‍ പട്ടേല്‍ കോടതിയെ സമീപിച്ചിരുന്നു. ജോലി ആവശ്യാര്‍ഥവും വിവിധ സര്‍വകലാശാലകളുടെ പരിപാടികളില്‍ പങ്കെടുക്കാനുമായി അമേരിക്കയില്‍ പോകാനുള്ള അനുമതിയും ഹര്‍ജിക്കാരന്‍ തേടിയിരുന്നു. ആകാര്‍ പട്ടേലിന് അമേരിക്കയില്‍ പോകാനുള്ള അനുമതിയും കോടതി നല്‍കി.
ബുധനാഴ്ച പുലർച്ചെ അമേരിക്കയിലേക്ക് പോവാനെത്തിയ ആകാറിനെ ബംഗളൂരു വിമാനത്താവളത്തിൽ വച്ച് സി.ബി.ഐ തടഞ്ഞിരുന്നു. ഫോറിൻ കോൺഡ്രിബ്യൂഷൻ ആക്ട് ലംഘനവുമായി ബന്ധപ്പെട്ട് വിദേശ ഫണ്ടിംഗിലെ ക്രമക്കേട് ആരോപിച്ച് ആനെസ്റ്റി ഇന്റർനാഷണൽ ഇന്ത്യക്കെതിരായ കേസുമായി ബന്ധപ്പെട്ടായിരുന്നു സി.ബി.ഐ നടപടി.
