അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.
തിരുവനന്തപുരം; ലോക വനിതാ ദിനത്തോടനുബന്ധിച്ച് മാർച്ച് 8 മുതൽ 13 വരെ കെ.എസ്.ആർ.ടി.സി ബഡ്ജറ്റ് ടൂർസ് “വനിതാ യാത്രാ വാരം – Womens Travel Week” ആയി ആഘോഷിക്കുന്നു. ഈ കാലയളവിൽ കെ.എസ്.ആർ.ടി.സി ബഡ്ജറ്റ് ടൂർസ് സംസ്ഥാനത്തുടനീളം വനിതകൾക്ക് മാത്രമായുള്ള വിനോദ യാത്രകളും സംഘടിപ്പിക്കും.
വനിതാ യാത്രാ വാരത്തിന്റെ ആദ്യ ട്രിപ്പിന്റെ ഫ്ലാഗ് – ഓഫ് തിരുവനന്തപുരം സെൻട്രൽ യൂണിറ്റിൽ നവകേരള മിഷൻ കോ-ഓർഡിനേറ്റർ ടി.എൻ സീമ എക്സ്. എം.പി രാവിലെ 6.30 തിന് ഫ്ലാഗ് ഓഫ് ചെയ്യും. നൂറുൾ ഇസ്ലാം യൂണിവേഴ്സിറ്റി പ്രൊ. വൈസ് ചാൻസലർ ഡോ: എം.എസ് ഫൈസൽ ഖാൻ, കെ.എസ്.ആർ.ടി.സി ബഡ്ജറ്റ് ടൂറിസം സെൽ ചീഫ് ട്രാഫിക് മാനേജർ എൻ.കെ ജേക്കബ്ബ് സാം ലോപ്പസ് എന്നിവർ ചടങ്ങിൽ പങ്കെടുക്കും. നിംസ് മെഡിസിറ്റിയിലെ വനിതാ ജീവനക്കാർ അവതരിപ്പിക്കുന്ന ഫ്ലാഷ് മോബ്, കലാപരിപാടികൾ എന്നിവയും ഉണ്ടാകും. മൺറോതുരുത്ത്, സാബ്രാണ്ടിക്കോടി, തിരുമല്ല വാരം ബീച്ച് എന്നിവിടങ്ങളിലേക്ക് നിംസ് മെഡിസിറ്റി വനിതാ ജീവനക്കാർക്കായി നടത്തുന്ന ട്രിപ്പാണ് ആദ്യമായി നടത്തുന്നത്.
ഇത് കൂടാതെ സംസ്ഥാനത്തുടനീളം 100 വനിതകൾ മാത്രമുള്ള ട്രിപ്പുകളാണ് ക്രമീകരിച്ചിരിക്കുന്നത്. കൊച്ചി വണ്ടർലായുമായി സഹകരിച്ച് 20 ട്രിപ്പുകളും നടത്തും. താമരശ്ശേരി യൂണിറ്റിൽ നിന്ന് മാത്രം 16 വനിതാ ഉല്ലാസ യാത്രകളാണ് നടത്തുന്നത്. തിരുവനന്തപുരം സോഷ്യൽ സർവ്വീസ് സൊസൈറ്റിയുമായി സഹകരിച്ച് തീരദേശ വനിതകൾ പങ്കെടുക്കുന്ന 4 ദിവസം നീണ്ടു നിൽക്കുന്ന തിരുവനന്തപുരം – കോഴിക്കോട്
വനിതാ യാത്രയും നടത്തുന്നുണ്ട്. മലയാള മനോരമയുമായി സഹകരിച്ച് നവജീവൻ ട്രസ്റ്റ് കോട്ടയത്തിന് കീഴിൽ പ്രവർത്തിക്കുന്ന സ്നേഹക്കൂട്ടിലെ വനിതാ അന്തേവാസികൾക്കായി വാഗമണ്ണിലേക്ക് സ്നേഹ സ്വാന്തന യാത്രയും സംഘടിപ്പിച്ചിട്ടുണ്ട്.
വനിതകൾക്ക് സുരക്ഷിതമായും സൗകര്യപ്രദമായും ഉല്ലാസയാത്ര നടത്താം എന്ന സന്ദേശമാണ് വനിതാ യാത്രാ വാരത്തിലൂടെ കെ.എസ്.ആർ.ടി.സി ബഡ്ജറ്റ് ടൂർസ് മുന്നോട്ട് വയ്ക്കുന്നത്.
