അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.
കൊച്ചി: സി.പി.എം സംസ്ഥാന സമ്മേളനത്തിലെ പൊതു ചർച്ചയിൽ നേതൃത്വത്തിനെതിരെ വിമർശനം. മലപ്പുറം ജില്ലയിലെ സംഘടനാ പ്രശ്‌നങ്ങൾ പരിഹരിക്കുന്നതിൽ സംസ്ഥാന നേതൃത്വം പരാജയപ്പെട്ടെന്ന് മലപ്പുറം ജില്ലയിലെ പ്രതിനിധികൾ അഭിപ്രായപ്പെട്ടു. വി.പി സാനുവും ഇ. ജയനും ഈ വിഷയത്തിൽ നേതൃത്വത്തെ വിമർശിച്ചു.
സമ്മേളനത്തിൽ കണ്ണൂർ അടക്കമുളള ജില്ലകളിൽ നിന്ന് പൊലീസിനെതിരെയും വിമർശനമുയർന്നു. ചില പൊലീസുകാർക്ക് ഇടത് നയമില്ല. സംഘപരിവാർ നയമാണുള്ളത്. ഇത് ഗൗരവമായി പരിഗണിക്കണമെന്ന ആവശ്യവും ചര്‍ച്ചയില്‍ ഉയര്‍ന്നു.
സംസ്ഥാനത്തെ ക്രമസമാധാന പാലനത്തിൽ പൊലീസ് ഉദ്യോസ്ഥരിൽ സീനിയർ ജൂനിയർ ഭേദമന്യേ വീഴ്ചയുണ്ടായി. മുഖ്യമന്ത്രി ശ്രദ്ധിച്ചില്ലെങ്കിൽ പൊലീസ് ചീത്ത പേരുണ്ടാക്കും. പാർട്ടി പ്രവർത്തകർ കൊല്ലപ്പെടുമ്പോൾ പൊലീസ് കൊലയാളികൾക്കൊപ്പമാണെന്നും വിമർശനമുയർന്നു.
സീതാറാം യെച്ചൂരിക്കെതിരെയും വിമർശനം ഉണ്ടായി. കേരളത്തിലെ സമ്മേളനത്തിൽ കോൺഗ്രസിനെ കുറിച്ച് അദ്ദേഹം മിണ്ടിയില്ല എന്നാണ് കണ്ണൂർ, തിരുവനന്തപുരം ജില്ലകളിൽ നിന്നുള്ള നേതാക്കൾ വിമർശിച്ചത്.
അതേസമയം ചർച്ച വികസന രേഖയിൽ കേന്ദ്രീകരിക്കാനാണ് സംസ്ഥാന നേതൃത്വത്തിന്റെ നിർദേശം. ജില്ലാ നേതൃത്വങ്ങൾക്കാണ് നിർദേശം നൽകിയിരിക്കുന്നത്. സംസ്ഥാന വികസനത്തിന് സ്വകാര്യ നിക്ഷേപം വർധിപ്പിക്കണമെന്നും നാടിൻറെ താത്പര്യത്തെ ഹനിക്കാത്ത മൂലധനത്തെ സ്വീകരിക്കേണ്ടിവരുമെന്നും വികസനേ രേഖയിൽ പറയുന്നുണ്ട്. മാറി വരുന്ന സാമ്പത്തിക വ്യവസ്ഥയിൽ നാടിൻറെ താത്പര്യത്തെ ഹനിക്കാത്ത മൂലധനത്തെ സ്വീകരിക്കേണ്ടിവരുമെന്നാണ് സി.പി. എം വ്യക്തമാക്കുന്നത്.
പ്രവർത്തന റിപ്പോർട്ടിൻ മേലുള്ള ചർച്ചയാണ് ഇന്ന് പ്രധാനമായും നടന്നത്. പാർട്ടിയിലെ വിഭാഗീയത അവസാനിപ്പിക്കണമെന്ന ആവശ്യവും ചർച്ചയിൽ ഉന്നയിച്ചിരുന്നു. ചില ജില്ലകളിൽ അവശേഷിക്കുന്ന വിഭാഗീയതക്ക് എതിരെയാണ് വിമർശനമുയർന്നത്. ആലപ്പുഴ, വയനാട്, പാലക്കാട് എന്നീ ജില്ലകളിൽ വിഭാഗീയതയുണ്ടെന്ന് റിപ്പോട്ടിൽ തന്നെ പറഞ്ഞിട്ടുണ്ട് . കർശന നടപടി എടുത്ത് വിഭാഗീയത അവസാനിപ്പിച്ചാൽ മാത്രമേ പാർട്ടി ഒറ്റക്കെട്ടായി നീങ്ങാനാകു എന്ന കാര്യവും ചർച്ചയിൽ ഉന്നയിച്ചിരുന്നു.
