അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.
തിരുവനന്തപുരം: മന്ത്രിമാരുടെ പേഴ്സണൽ സ്റ്റാഫ് പെൻഷനുമായി ബന്ധപ്പെട്ട വിഷയത്തിൽ ഗവർണർക്കു മറുപടി നൽകി ചീഫ് സെക്രട്ടറി. ചീഫ് സെക്രട്ടറിയുടെ മറുപടി പഠിച്ച ശേഷം ഗവർണർ തുടർ തീരുമാനത്തിലേക്കു കടക്കും. ചട്ട വിരുദ്ധമായാണു പേഴ്സണൽ സ്റ്റാഫിനു പെൻഷൻ നൽകുന്നതെന്നു ഗവർണർക്കു ബോധ്യപ്പെട്ടാൽ തുടർ നടപടി സ്വീകരിക്കാൻ നിർദേശിച്ചു മുഖ്യമന്ത്രിക്കു കത്തു നൽകുന്നതും പരിഗണിക്കുന്നുണ്ട്.
രണ്ടു വർഷം ജോലി ചെയ്ത പേഴ്സണൽ സ്റ്റാഫിനു പെൻഷൻ നൽകുന്നത് അംഗീകരിക്കാൻ കഴിയില്ലെന്നു തുറന്നടിച്ച ഗവർണർ, ഇതുമായി ബന്ധപ്പെട്ട വിശദാംശങ്ങൾ ചീഫ് സെക്രട്ടറിയോടു തേടിയിരുന്നു.
പെൻഷൻ നൽകുന്നതിനുള്ള വ്യവസ്ഥകളും പെൻഷൻ വാങ്ങുന്നവരുടെ വിശദാംശങ്ങളും മറ്റുമാണ് ഗവർണർക്കു സർക്കാർ കൈമാറിയത്. മൂന്നു വർഷത്തിൽ താഴെ സർവീസുള്ള എത്രപേർ പേഴ്സണൽ സ്റ്റാഫ് പെൻഷൻ വാങ്ങുന്നുണ്ടെന്നതു സംബന്ധിച്ച വിവരങ്ങളും ഗവർണർ തേടിയിരുന്നു.
