അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.ന്യൂഡല്ഹി: കുട്ടികള്ക്കുള്ള വാക്സിന് സെപ്തംബറോട് തയ്യാറാക്കാനായേക്കുമെന്ന് നാഷണല് ഇന്സ്റ്റിട്ട്യൂട്ട് ഓഫ് വൈറോളജി (എന് ഐ വി)ഡയറക്ടര് പ്രിയ എബ്രഹാം. നിലവില് 2 മുതല് 18 വയസ്സ് വരെയുള്ള കുട്ടികള്ക്കുള്ള കോവാക്സിന്റെ മൂന്നാം ഘട്ട ക്ലിനിക്കല് പരീക്ഷണങ്ങള് തുടരുകയാണെന്നും അവര് പറഞ്ഞു.
ജനുവരിയിലാണ് രാജ്യത്ത് കോവാക്സിന് അടിയന്തിര ഉപയോഗത്തിന് ഡ്രഗ്സ് കണ്ട്രോളര് ഓഫ് ജനറല് അനുമതി നല്കുന്നത്. നിലവില് കുട്ടികളില് കുത്തിവെപ്പിന് അനുമതിക്കായി കാത്തിരിക്കുന്ന മറ്റൊരു വാക്സിന് സൈഡസ് കാഡിലയാണ്. സൈഡസ് കാഡിലയുടെ ക്ലിനിക്കല് പരീക്ഷണങ്ങള് നടക്കുകയാണെന്നും അനുമതി ലഭിക്കുകയാണെങ്കില് ഇതും കുട്ടികളില് ഉപയോഗിക്കാമെന്നും പ്രിയ എബ്രഹാം വ്യക്തമാക്കി.
നിലവില് ബൂസ്റ്റര് ഡോസുകള്ക്ക് അനുമതി നല്കുന്നതിനോട് ലോകാരോഗ്യ സംഘടന അനുകൂല സമീപനമല്ല സ്വീകരിക്കുന്നത്. വരുമാനം കുറഞ്ഞ ചില രാജ്യങ്ങള് വാക്സിനേഷനില് പിന്നിലെത്തുന്നതാണ് ഇതിന് കാരണമായി ചൂണ്ടിക്കാട്ടപ്പെടുന്നത്. എന്നാല് ഭാവിയില് ബൂസ്റ്റര് ഡോസുകള് നിലവില് വരുമെന്നാണ് പ്രതീക്ഷിക്കുന്നതെന്നും അവര് പറഞ്ഞു.
ഒരാള്ക്ക് രണ്ട് വ്യത്യസ്ത വാക്സിനുകള് രണ്ട് ഡോസായി നല്കിയ സാംപിളുകള് എന്.ഐ.വി പരിശോധിച്ചു. സാംപിളുകള് പരിശോധിച്ചതില് യാതൊരു പാര്ശ്വ ഫലവും റിപ്പോര്ട്ട് ചെയ്യപ്പെട്ടില്ലെന്നും വാക്സിന് സ്വീകരിച്ചവര് സുരക്ഷിതരാണെന്നും പ്രിയ എബ്രഹാം കൂട്ടിച്ചേര്ത്തു. വാക്സിന് വകഭേദങ്ങള്ക്ക് എതിരേ ഫലം ചെയ്യുന്നുണ്ടുവെന്നും വാക്സിന് സ്വീകരിച്ചവരില് രോഗം ഗുരുതരമാകാതിരിക്കാന് വാക്സിന് സഹായിച്ചതായും അവര് പറഞ്ഞു.
