അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.മലയാള സിനിമയുടെ സീനിയർ നടൻ ജനാർദനൻ മരിച്ചെന്നു പറഞ്ഞുകൊണ്ട് പ്രചരിച്ച് വാർത്തകൾ വ്യാജം. ഇക്കാര്യത്തിൽ സ്ഥിരീകരണവുമായി അദ്ദേഹം തന്നെ രംഗത്തെത്തി. താന്‍ പൂര്‍ണ ആരോഗ്യവാനാണെന്നും സൈബര്‍ ഭ്രാന്തന്‍മാരുടെ ഇത്തരം വൈകൃതങ്ങളോട് പ്രതികരിക്കാനില്ലെന്നുമാണ് താരം പറഞ്ഞത്.
വ്യാജ വാർത്ത സോഷ്യൽ മീഡിയയിൽ വൈറലായത് ഇന്നലെയാണ്. സോഷ്യല്‍ മീഡിയ പേജുകളിലും വാട്ട്സാപ്പ് ഗ്രൂപ്പുകളിലും ജനാർദനന്റെ ചിത്രം വച്ചുളള ആദരാഞ്ജലി കാര്‍ഡുകള്‍ പ്രചരിച്ചിരുന്നു. നിരവധി ആരാധകരാണ് പ്രിയ താരത്തിന് ആദരാഞ്ജലികൾ നേർന്നത്.
തുടർന്ന് ജനാർദനൻ ആരോഗ്യത്തോടെയിരിക്കുന്നുവെന്ന് പറഞ്ഞുകൊണ്ട് പ്രൊഡക്ഷൻ കൺട്രോളർ ബാദുഷ രംഗത്തെത്തിയിരുന്നു. ‘നടൻ ജനാർദനൻ മരിച്ചു എന്ന രീതിയിൽ സോഷ്യൽമീഡിയയിൽ പ്രചരണം നടക്കുകയാണ്. ഇതറിഞ്ഞ് അദ്ദേഹവുമായി ഇന്നലെയും സംസാരിച്ചു. ജനാർദനൻ ചേട്ടൻ പൂർണ ആരോഗ്യവനായി, സന്തോഷവാനായി അദ്ദേഹത്തിന്റെ വീട്ടിലുണ്ട്. ഇത്തരത്തിലുള്ള തെറ്റായ വാർത്തകൾ യാതൊരു സ്ഥിരീകരണവുമില്ലാതെ ഷെയർ ചെയ്യുന്നത് അത്യന്തം അപലപനീയമാണ്. ഈ പ്രവണത ഇനിയെങ്കിലും നിർത്തണം; ഇതൊരു അപേക്ഷയാണ്’- എന്നാണ് ബാദുഷ ഫേസ്ബുക്കിൽ കുറിച്ചത്.
