അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.തിരുവനന്തപുരം: സംസ്ഥാനത്ത് കോവിഡ് വ്യാപനം രൂക്ഷമായതിന്റെ പശ്ചാത്തലത്തില് നാലു ജില്ലകളില് ഏര്പ്പെടുത്തിയ ട്രിപ്പിള് ലോക്ക്ഡൗണ് വിജയകരമെന്ന് മുഖ്യമന്ത്രി പിണറായി വിജയന് വാര്ത്താസമ്മേളനത്തില് പറഞ്ഞു.
സംസ്ഥാനത്ത് ടെസ്റ്റ് പോസിറ്റിവിറ്റി നിരക്കു കുറഞ്ഞുവരുന്നുണ്ട്. രോഗികളുടെ എണ്ണവും കുറഞ്ഞു. എന്നാല്, പുതുതായി രോഗം വരുന്നവരുടെ എണ്ണം കുറഞ്ഞാലേ നിയന്ത്രണങ്ങള് പിന്വലിക്കാന് കഴിയൂ. അവസാന 3 ദിവസത്തെ കണക്കെടുത്താല് ട്രിപ്പിള് ലോക്ഡൗണ് പ്രഖ്യാപിച്ച തിരുവനന്തപുരത്ത് 26.03 ശതമാനമാണ് ടെസ്റ്റ് പോസിറ്റിവിറ്റി നിരക്ക്. എറണാകുളം 23.02, തൃശൂര് 26.04, മലപ്പുറം 33.03. സംസ്ഥാന ശരാശരി 24.5. ഇന്നത്തെ കണക്കനുസരിച്ച് ടെസ്റ്റ് പോസിറ്റിവിറ്റി നിരക്ക് 23.29 ആയിട്ടുണ്ടെന്നും മുഖ്യമന്ത്രി പറഞ്ഞു.
തിരുവനന്തപുരം, എറണാകുളം, തൃശൂര്, മലപ്പുറം ഈ ജില്ലകളില് വളരെ കുറച്ച് ജനങ്ങള് മാത്രമേ വീടിനു പുറത്തിറങ്ങുന്നുള്ളൂ. അവശ്യ സര്വീസുകള്ക്കു മാത്രമാണ് ഈ ജില്ലകളില് അനുമതി നല്കിയിരിക്കുന്നത്. പൊലീസ് ഏര്പ്പെടുത്തിയ നിയന്ത്രണങ്ങളോട് ജനങ്ങള് പൂര്ണ്ണമനസ്സോടെ സഹകരിക്കുന്നുണ്ട്. ലോക്ക്ഡൗണ് നിലവിലുള്ള മറ്റ് ജില്ലകളിലും ഇതുതന്നെയാണ് സ്ഥിതി.
.
ഇന്ന് തിരുവനന്തപുരം ജില്ലയില് ഇന്ന് 3600 കേസുകളാണ് സ്ഥിരീകരിച്ചത്. എറണാകളും ജില്ലയില് 4282ഉം തൃശൂര് ജില്ലയില് 2888ഉം മലപ്പുറം ജില്ലയില് 4212ഉം കേസുകളാണുള്ളത്. നിയന്ത്രണങ്ങള് ഫലം കണ്ടുതുടങ്ങിയെന്നു വേണം കേസുകളുടെ എണ്ണം കുറയുന്നതില്നിന്ന് അനുമാനിക്കാന്. എന്നാല്, നിലവിലുള്ള നിയന്ത്രണങ്ങള്ക്ക് അയവുവരുത്താന് സമയമായിട്ടില്ല. ഇപ്പോള് പുലര്ത്തിവരുന്ന ജാഗ്രത ഇതുപോലെ തുടരുക തന്നെ വേണമെന്നും മുഖ്യമന്ത്രി പറഞ്ഞു.
