അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.മുന്‍ ഓസീസ് ക്രിക്കറ്റ് താരം ലുക്ക് പോമര്‍ബാച് അറസ്റ്റില്‍. ഗോള്‍ഫ് ക്ലബ്, തുണിത്തരങ്ങള്‍, ആഭരണങ്ങള്‍ തുടങ്ങിയ വസ്തുക്കള്‍ മോഷ്ടിച്ചതിനാണ് താരത്തെ അറസ്റ്റ് ചെയ്തത്. കഴിഞ്ഞ ജനുവരി 24 മുതല്‍ ഫെബ്രുവരി 16 വരെയുള്ള കാലയളവിലാണ് മോഷണങ്ങള്‍ നടത്തിയത്. നാല് മോഷണകേസുകളും, മൂന്ന് ഭവനഭേദന കേസും, ഒരു സ്ഥലക്കയ്യേറ്റ കേസുമാണ് താരത്തിനെതിരെ ചുമത്തിയിരിക്കുന്നത്.
കഴിഞ്ഞ ആഴ്ച താരത്തിന് ജാമ്യം ലഭിച്ചിരുന്നു. എന്നാല്‍, കോടതിയില്‍ കെട്ടിവെക്കേണ്ട തുക ഇല്ലാത്തതിനാല്‍ താരത്തിന് ജയിലില്‍ നിന്ന് പുറത്തിറങ്ങാനായില്ല. ഒരു മത്സരമാണ് ദേശീയ ജഴ്‌സിയില്‍ പോമര്‍ബാച് കളിച്ചിട്ടുള്ളത്. ഐപിഎലില്‍ കിംഗ്‌സ് ഇലവന്‍ പഞ്ചാബ്, റോയല്‍ ചലഞ്ചേഴ്‌സ് ബാംഗ്ലൂര്‍ ടീമുകളില്‍ താരം കളിച്ചിട്ടുണ്ട്. പ്രതിശ്രുത വധുവിനെയും മറ്റൊരു വിദേശ വനിതയെയും കയ്യേറ്റം ചെയ്യാന്‍ ശ്രമിച്ചതിന് താരത്തെ ഡല്‍ഹി പൊലീസ് അറസ്റ്റ് ചെയ്തിരുന്നു. 2013ല്‍ ബ്രിസ്‌ബേന്‍ ഹീറ്റിനൊപ്പം ബിഗ് ബാഷ് ലീഗ് ജേതാവായ പോമര്‍ബാച് മാനസികാരോഗ്യം മോശമായെന്ന് ചൂണ്ടിക്കാട്ടി തൊട്ടടുത്ത വര്‍ഷം ക്രിക്കറ്റില്‍ നിന്ന് വിരമിച്ചിരുന്നു.
