അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.ബംഗളൂരു: കുടിവെള്ളം ദുരുപയോഗം ചെയ്തത് ചൂണ്ടിക്കാട്ടി ബംഗളൂരുവിൽ 22 കുടുംബങ്ങൾക്കെതിരെ ലക്ഷങ്ങളുടെ പിഴ ചുമത്തി. അതിരൂക്ഷമായ ജല ക്ഷാമം സംസ്ഥാനം നേരിടുമ്പോൾ കാറുകൾ വൃത്തിയാക്കുന്നതടക്കമുള്ള പ്രവർത്തനങ്ങൾക്ക് കുടിവെള്ളം ദുരുപയോഗം ചെയ്തെന്ന് കാട്ടിയാണ് ഫൈൻ. ബാംഗ്ലൂർ വാട്ടർ സപ്ലൈ ആൻഡ് സീവറേജ് ബോർഡ് (ബിഡബ്ല്യുഎസ്എസ്ബി) മൂന്ന് ദിവസത്തിനുള്ളിൽ 1.10 ലക്ഷം രൂപ പിഴ ഈടാക്കി.
വെള്ളം അത്യാവശ്യത്തിന് മാത്രം ഉപയോഗിക്കണമെന്ന് അധികൃതർ നേരത്തെ ബെംഗളൂരു നിവാസികളോട് നിർദേശിച്ചിരുന്നു. നഗരത്തിന്റെ തെക്ക്-കിഴക്ക് ഭാഗത്താണ് മിക്ക പരാതികളും രജിസ്റ്റർ ചെയ്യുന്നതെന്നും പരാതികൾക്കൊപ്പം വെള്ളം മിതമായി ഉപയോഗിക്കണമെന്ന് ആവശ്യപ്പെട്ട് മുന്നറിയിപ്പുകൾ നൽകുന്നുണ്ടെന്നും ബോർഡ് ചെയർപേഴ്സൺ റാം പ്രശാന്ത് മനോഹർ പറഞ്ഞു. ഇതുവരെ ഈടാക്കിയ 1.10 ലക്ഷം രൂപയിൽ 65,000 രൂപയും നഗരത്തിന്റെ തെക്ക്-പടിഞ്ഞാറ് ഭാഗത്ത് നിന്ന് മാത്രം പിഴ ഈടാക്കിയതാണെന്നും അധികൃതർ പറഞ്ഞു.
നഗരത്തിൽ വാഹനങ്ങൾ വൃത്തിയാക്കൽ, പൂന്തോട്ടപരിപാലനം, കെട്ടിട നിർമാണം, ജലധാരകൾ പ്രവർത്തിപ്പിക്കൽ തുടങ്ങിയവക്ക് വെള്ളം ഉപയോഗിക്കുന്നതിന് ഈ മാസം ആദ്യം ബോർഡ് നിരോധനം ഏർപ്പെടുത്തിയിരുന്നു.
ഒന്നിലധികം തവണ നിയമലംഘനം നടത്തുന്നവർക്ക് 500 രൂപ അധിക പിഴയും ബോർഡ് ചുമത്തും. കൂടാതെ ഹോളി ആഘോഷങ്ങളുടെ ഭാഗമായി പൂള് പാർട്ടികളും മഴ നൃത്തങ്ങളും നടത്തുമ്പോൾ കാവേരിയിൽ നിന്നും കുഴൽ കിണറിൽ നിന്നും വെള്ളം എടുക്കരുതെന്ന കർശന നിർദേശവും നല്കിയിട്ടുണ്ട്. നഗരവാസികളിൽ പലരും കുടിവെള്ളക്ഷാമം മൂലം വർക്ക് ഫ്രം ഹോം രീതിയിലേക്ക് മാറി.
ഡിസ്പോസിബിൾ പാത്രങ്ങളിൽ ഭക്ഷണം കഴിച്ചും മാളുകളിലെ ടോയ്ലറ്റുകൾ ഉപയോഗിച്ചുമൊക്കെയാണ് ബംഗളുരു നിവാസികള് ഈ സാഹചര്യത്തെ നേരിട്ടുകൊണ്ടിരിക്കുന്നത്. ഇന്ത്യയുടെ സിലിക്കൺ വാലി എന്നറിയപ്പെടുന്ന ബെംഗളൂരു നഗരത്തിൽ പ്രതിദിനം 500 ദശലക്ഷം ലിറ്റർ വെള്ളത്തിൻ്റെ (എംഎൽഡി-മെഗാലിറ്റര് പെര് ഡേ) ക്ഷാമം നേരിടുന്നുണ്ടെന്ന് മുഖ്യമന്ത്രി സിദ്ധരാമയ്യ കഴിഞ്ഞ ആഴ്ച വ്യക്തമാക്കിയിരുന്നു. ബെംഗളൂരുവിലെ 14,000 കുഴൽക്കിണറുകളിൽ 6,900 എണ്ണവും വറ്റിയെന്നും അദ്ദേഹം പറഞ്ഞു.
