അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.തിരുവനന്തപുരം: ദേശീയപതാകയെ അപമാനിച്ചതിന് ആം ആദ്മി പാർട്ടി സംസ്ഥാന പ്രസിഡന്റ് വിനോദ് മാത്യു വിൽസൺ അടക്കമുള്ളവർക്കെതിരെ കേസെടുത്തു. ബിജെപി സംസ്ഥാന കമ്മിറ്റി ഓഫിസിലേക്ക് നടത്തിയ മാർച്ചിനിടെ ദേശീയപതാക റോഡിലിട്ട് ചവിട്ടി അവഹേളിച്ചെന്ന് എഫ്ഐആറിൽ പറയുന്നു.
ഡൽഹി മുഖ്യമന്ത്രി അരവിന്ദ് കേജ്‍രിവാളിനെ അറസ്റ്റ് ചെയ്ത വിഷയത്തിലായിരുന്നു മാർച്ച്. തമ്പാനൂർ പൊലീസാണ് കേസെടുത്തത്. ഗതാഗത തടസ്സം സൃഷ്ടിക്കൽ, അനധികൃതമായി സംഘം ചേരൽ എന്നീ കുറ്റങ്ങൾക്കും കേസെടുത്തു. സംസ്ഥാന പ്രസിഡന്റ് അടക്കമുള്ള 10 പ്രവർത്തകർക്കെതിരെയാണ് കേസ്. കണ്ടാലറിയാവുന്ന 250 പേർക്കെതിരെയും കേസെടുത്തിട്ടുണ്ട്.
കിഴക്കേക്കോട്ടയിൽനിന്ന് അരിസ്റ്റോ ജങ്ഷനിലേക്ക് പ്രകടനമായി എത്തിയ പ്രവർത്തകർ ദേശീയ പതാകയെ റോഡിലിട്ട് ചവിട്ടി അവഹേളിച്ചതായി എഫ്ഐആറിൽ പറയുന്നു.
