അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.സുപ്രീംകോടതിയുടെ വിധികേട്ട കേരളം എന്തുചെയ്യുമെന്ന അവസ്ഥയിലായിരിക്കുകയാണ്. കടമെടുക്കാന്‍ അനുവദിക്കണമെന്ന ആവശ്യവുമായി കോടതിയില്‍ എത്തിയ കേരളത്തോട് പഴയ കടമെടുപ്പ് കണക്കുകളാണ് സുപ്രീം കോടതി ചോദിച്ചത്. 2016 മുതല്‍ 2020 വരെ എടുത്ത അധികകടമാണ് കേരളത്തിന് പുലിവാലായത്. ഈ കാലയളവില്‍ എടുത്ത അധികകടം പിന്നീടുള്ള വര്‍ഷങ്ങളിലെ കടപരിധിയില്‍ കുറവുവരുത്താന്‍ കേന്ദ്രത്തിന് അധികാരം ഉണ്ടെന്ന് സുപ്രീം കോടതി വ്യക്തമാക്കിയതോടെയാണ് കേരളത്തിന്റെ പ്രതീക്ഷകള്‍ക്ക് താത്ക്കാലിക മങ്ങലുണ്ടായത്.
2021 മുതല്‍ വെട്ടിക്കുറച്ചത് 26,619 കോടിയുടെ കടപരിധിയാണെന്നും സുപ്രീംകോടതി പുറപ്പെടുവിച്ച ഉത്തരവില്‍ വിശദീകരിക്കുന്നുണ്ട്. കേരളത്തിലെ ധനകാര്യ മാനേജ്മെന്റിലെ കെടുകാര്യസ്ഥത കാരണം ഉണ്ടായബുദ്ധിമുട്ട് പരിഹരിക്കാന്‍ ഇടക്കാല ഉത്തരവ് പുറപ്പെടുവിക്കാന്‍ കഴിയില്ലെന്നുമാണ് സുപ്രീം കോടതിയുടെ ഉത്തരവില്‍ വ്യക്തമാക്കിയിരിക്കുന്നത്. 2016 മുതല്‍ 2020 വരെയുള്ള കാലയളവില്‍ 14,479 കോടി രൂപ കേരളം അധികകടം എടുത്തിട്ടുണ്ടെന്നാണ് കേന്ദ്രം സുപ്രീം കോടതിയില്‍ ഫയല്‍ ചെയ്ത സത്യവാങ്മൂലത്തില്‍ ചൂണ്ടിക്കാട്ടിയിരുന്നത്. ഇത് കിഫ്ബിയിലൂടെ മാത്രം എടുത്ത കടമാണെന്ന് കേന്ദ്ര സര്‍ക്കാര്‍ വൃത്തങ്ങള്‍ ചൂണ്ടിക്കാട്ടി.
ഇതിനുപുറമെ മറ്റ് മാര്‍ഗ്ഗങ്ങളിലൂടെയും സംസ്ഥാനം കടമെടുത്തിട്ടുണ്ട്. 2016 മുതലുള്ള നാല് വര്‍ഷങ്ങളില്‍ കേരളം അധികകടം എടുത്തിട്ടുണ്ടെന്ന് സംസ്ഥാനം സമ്മതിച്ചിട്ടുണ്ടെന്നും സുപ്രീം കോടതി ഉത്തരവില്‍ ചൂണ്ടിക്കാട്ടുന്നു. എന്നാല്‍ 14-ാം ധനകാര്യ കമ്മീഷന്റെ കാലയളവില്‍ എടുത്ത ഈ കടം, 15-ാം ധനകാര്യ കമ്മീഷന്റെ കാലയളവില്‍ വെട്ടികുറയ്ക്കാനാകില്ലെന്നായിരുന്നു കേരളത്തിന്റെ വാദം. എന്നാല്‍ 15-ാം ധനകാര്യ കമ്മീഷന്റെ തുടക്കം മുതല്‍ കേരളത്തിന്റെ കടപരിധിയില്‍ വെട്ടി കുറവ് വരുത്തുന്നുണ്ട് എന്ന കേന്ദ്രവാദം സുപ്രീം കോടതി തങ്ങളുടെ ഉത്തരവില്‍ ചൂണ്ടിക്കാട്ടിയിട്ടുണ്ട്.
2021-22 സാമ്പത്തിക വര്‍ഷത്തില്‍ 9197.15 കോടിയും, 2022-23 ല്‍ 13067.78 കോടിയും, 2023- 24 ല്‍ 4354.72 കോടി രൂപയുമാണ് കടപരിധിയില്‍ വെട്ടി കുറവ് വരുത്തിയിരിക്കുന്നത്. ഫലത്തില്‍ തോമസ് ഐസക് ധനകാര്യ മന്ത്രി ആയിരുന്നപ്പോള്‍ എടുത്ത അധികകടത്തിന് രണ്ടാം പിണറായി സര്‍ക്കാരിന്റെ കാലത്തെ കടപരിധിയില്‍ 26,619 കോടിയുടെ വെട്ടിക്കുറവാണ് കേന്ദ്രം ഇതുവരെ വരുത്തിയത്. ഒരു ധനകാര്യ കമ്മീഷന്റെ കാലയളവില്‍ സംസ്ഥാനം കൂടുതല്‍ കടമെടുത്താല്‍ അടുത്ത ധനകാര്യ കമ്മീഷന്റെ കാലയളവിലെ കടപരിധിയില്‍ കേന്ദ്ര സര്‍ക്കാരിന് കുറവ് വരുത്താം എന്നാണ് തങ്ങളുടെ പ്രാഥമിക വിലയിരുത്തല്‍ എന്നും സുപ്രീം കോടതി ചൂണ്ടിക്കാട്ടി.
ഇക്കാര്യത്തില്‍ അന്തിമ തീര്‍പ്പ് കല്‍പ്പിക്കേണ്ടത് കേരളം നല്‍കിയ സ്യൂട്ട് ഹര്‍ജിയില്‍ ഭരണഘടന ബെഞ്ചാണെന്നും കോടതി തങ്ങളുടെ ഉത്തരവില്‍ രേഖപ്പെടുത്തിയിട്ടുണ്ട്. അധിക കടമെടുപ്പിന് അനുമതി നല്‍കിയില്ലെങ്കില്‍ പെന്‍ഷന്‍ ഉള്‍പ്പടെയുള്ളവയുടെ വിതരണം പ്രതിസന്ധിയിലാകുമെന്ന് കേരളം സുപ്രീം കോടതിയെ അറിയിച്ചിരുന്നു. എന്നാല്‍ തങ്ങളുടെ ഇടപെടല്‍ കാരണം കേരളത്തിന് 13608 കോടി രൂപ കടം എടുക്കാന്‍ കഴിഞ്ഞുവെന്നും, അതിനാല്‍ പ്രതിസന്ധി ഭാഗീകമായി തരണം ചെയ്യാന്‍ കഴിഞ്ഞുവെന്നുമാണ് സുപ്രീം കോടതി ഉത്തരവില്‍ ചൂണ്ടിക്കാട്ടിയിരിക്കുന്നത്. ഈ സാഹചര്യത്തതില്‍ അധിക കടം എടുക്കാന്‍ കേരളത്തിന് അനുകൂലമായി ഉത്തരവ് ഇറക്കാന്‍ ആകില്ലെന്നും ജസ്റ്റിസുമാരായ സൂര്യ കാന്ത്, കെ വി വിശ്വനാഥന്‍ എന്നിവരടങ്ങിയ ബെഞ്ച് ചൂണ്ടിക്കാട്ടി.
