അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.ഈ ചൂടുകാലത്ത് എന്തൊക്കെ ചെയ്താലും ശരീരം തണുക്കുവാൻ വഴിയില്ല. എത്ര തണുത്തതു കഴിച്ചാലും ഒരു 10 മിനിറ്റ് കഴിഞ്ഞാൽ ശരീരം വീണ്ടും ചൂടകുവാൻ തുടങ്ങും. വൈകിട്ടത്തെ ട്രാഫിക്കും, ഓഫീസിലെ സ്‌ട്രെസും, ചൂടും മാനസികാവസ്ഥയെ മോശമാകും. എന്നാൽ പോയിട്ടൊരു ഉഗ്രൻ ഐസ് ബാത്ത് നടത്തി റിലാക്സ് ആയാലോ?
ഐസ് ബാത്തിന്റെ ഗുണങ്ങൾ എന്തെല്ലാം?
ശരീര വീക്കം മാറാന്‍
ഐസ് ബാത്തിലൂടെ ലഭിക്കുന്ന തണുത്ത താപനില ശരീര വീക്കം മാറ്റുന്നു. ഇത് കായികതാരങ്ങള്‍ക്കുണ്ടാകുന്ന പരിക്കുകള്‍ ദേദമാക്കാനും വിട്ടുമാറാത്ത വേദനയനുഭവിക്കുന്നവര്‍ക്കും ഐസ് ബാത്ത് ഉത്തമ പ്രതിവിധിയാണ്.
പേശികളുടെ ആരോഗ്യത്തിന്
വര്‍ക്ക് ഔട്ട് ചെയ്തു കഴിഞ്ഞാല്‍ പേശികള്‍കളിലുണ്ടാകുന്ന വീക്കം പേശി കളിലെ പ്രശ്‌നങ്ങള്‍ എന്നിവ പരിഹരിക്കുന്നതിനും ഐസ് ബാത്ത് നല്ലതാണ്. സാധാരണ നമ്മള്‍ ചൂടുവെള്ളത്തില്‍ കുളിക്കാറുണ്ട്. അതുപോലെ തന്നെ നല്ല തണുത്ത വെള്ളത്തില്‍ കുളിക്കുന്നതും പേശികളിലെ വീക്കം കുറയ്ക്കാന്‍ സഹായിക്കും.
ഏകാഗ്രത
ചില ആളുകള്‍ ഐസ് ബാത്ത് എടുക്കുന്നത് അവരുടെ ഉണര്‍വും ശ്രദ്ധയും മെച്ചപ്പെടുത്താന്‍ സഹായിക്കുമെന്ന് പഠനങ്ങള്‍ പറയുന്നു. ഇത് മത്സര സമയത്ത് മനസ്സ് ഏകാഗ്രം ആയിരിക്കുന്നതിന് കായികതാരങ്ങള്‍ക്കും, ദീര്‍ഘനേരം ജോലി ചെയ്യുന്ന ആളുകള്‍ക്കും ഗുണം ചെയ്യും.
മെച്ചപ്പെട്ട മാനസികാവസ്ഥ
ഐസ് ബാത്തിന്റെ തണുത്ത താപനില തലച്ചോറിലെ ഡോപാമൈന്‍ അളവ് വര്‍ദ്ധിപ്പിക്കാന്‍ സഹായിക്കും, ഇത് താല്‍ക്കാലികമായെങ്കിലും നല്ല മാനസികാവസ്ഥയിലേക്ക് നയിച്ചേക്കാം. നിങ്ങള്‍ക്ക് ഡിപ്രഷന്‍ പോലെയുള്ള മാനസിക പ്രശ്‌നങ്ങളാണെങ്കില്‍ ഒരിക്കലും ഐസ്ബാത്തില്‍ മാത്രം ഇത് ഒതുങ്ങില്ല. കൃത്യമായി ഡോക്ടറെ കണ്ട്, അതിന് മരുന്ന് എടുക്കാന്‍ ശ്രദ്ധിക്കുക. ചെറിയ രീതിയില്‍ ഉള്ള ടെന്‍ഷന്‍ പോലെയുള്ള പ്രശ്‌നങ്ങള്‍ കുറയ്ക്കാന്‍ മാത്രമാണ് ഐസ് ബാത്ത് നല്ലത്.
മെച്ചപ്പെട്ട ഉറക്കം
ഉറങ്ങുന്നതിനുമുമ്പ് ഐസ് ബാത്ത് ചെയ്യുന്നത് നന്നായി ഉറങ്ങാന്‍ സഹായിക്കുമെന്നും കണ്ടെത്തലുകളുണ്ട്. അതിനാല്‍, ഒട്ടും ഉറക്കം കിട്ടുന്നില്ല എന്ന് പരാതിപ്പെടുന്നവര്‍ക്ക് ഐസ് ബാത്ത് ട്രൈ ചെയ്യാവുന്നതാണ്. എന്നാല്‍ ചിലര്‍ക്ക് നല്ല തണുത്ത വെള്ളത്തില്‍ കുളിച്ചാല്‍ ഉറക്കം വരാത്തവരും ഉണ്ട്. ഇത്തരം പ്രശ്‌നം ഉള്ളവരാണ് നിങ്ങള്‍ എങ്കില്‍ ഐസ് ബാത്ത് എടുക്കാതിരിക്കാം.
ശ്രദ്ധിക്കേണ്ട കാര്യങ്ങള്‍
ഐസ് ബാത്തിന് ഗുണം എന്നത് പോലെ തന്നെ ദോഷവശങ്ങളും നിരവധിയാണ്. നമ്മളുടെ ശരീരത്തിലെ താപനില പെട്ടെന്ന് കുറയ്ക്കുന്നതിന് ഇത് ഒരു കാരണമാണ്. ശ്രദ്ധിച്ചില്ലെങ്കില്‍ ഹൈപ്പോഥര്‍മിയയിലേക്കും നയിച്ചേക്കാം. ഐസ് ബാത്തിന് മുന്‍പായി ഡോക്ടറുടെ നിര്‍ദേശം തേടണം.പ്രത്യേകിച്ച് ശരീരം തണുത്താലുണ്ടായേക്കാവുന്ന ആരോഗ്യപ്രശ്‌നങ്ങള്‍ ഉണ്ടെങ്കില്‍ അവര്‍ തീര്‍ച്ചയായും ഡോക്ടറുടെ അഭിപ്രായം തേടുന്നത് നല്ലതാണ്.
ഐസ് ബാത്തിനുള്ള ടിപ്പുകള്‍
ആദ്യം 5 മിനിറ്റ് പോലെ ചെറിയ ദൈര്‍ഘ്യത്തില്‍ ആരംഭിക്കുക. ക്രമേണ സമയം വര്‍ദ്ധിപ്പിക്കുക. ജലദോഷം പോലുള്ള ആരോഗ്യപ്രശ്‌നങ്ങള്‍ ഉണ്ടെങ്കില്‍ ഐസ് ബാത്ത് എടുക്കരുത്. അഥവാ തണുപ്പ്, തലകറക്കം എന്നിവ അനുഭവപ്പെടാന്‍ തുടങ്ങിയാല്‍ ഉടന്‍ നിര്‍ത്തുക. ശേഷം ഹോട്ട് ഷവര്‍ നടത്തി ശരീരത്തിന് ചൂട് നല്‍കണം.
മുന്‍പ് ഹാര്‍ട്ട് അറ്റാക്ക് വന്നിട്ടുള്ളവരാണെങ്കില്‍ ഒരിക്കലും ഇത്തരം ബാത്ത് എടുക്കരുത്. അതുപോലെ തന്നെ ബിപി കൂടുതലുള്ളവരും കുറച്ചധികം ശ്രദ്ധിക്കുന്നത് നല്ലതാണ്. നല്ല തണുത്ത വെള്ളത്തില്‍ കുളിച്ചാല്‍ ബിപി കൂടാനും അത് അറ്റാക്കിലേയ്ക്കും സ്‌ട്രോക്കിലേയ്ക്കുമെല്ലാം നയിക്കാം. അതിനാല്‍, ആരോഗ്യസ്ഥിതി പരിശോധിച്ചതിന് ശേഷം മാത്രം ഇത്തരം പുതിയ പരീക്ഷണങ്ങള്‍ നടത്താവുന്നതാണ്.
