അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.എംപിയും കോണ്ഗ്രസ് സ്ഥാനാര്ത്ഥിയുമായ ശശി തരൂര് തനിക്കെതിരേ നടത്തിയ അസത്യ പ്രചാരണത്തിനും വ്യാജ പ്രസ്താവനകള്ക്കുമെതിരെ കൂടുതല് നിയമ നടപടികള്ക്ക് തുടക്കമിട്ട് എന്ഡിഎ സ്ഥാനാര്ത്ഥി രാജീവ് ചന്ദ്രശേഖര്. തരൂരിന്റെ ആരോപണങ്ങള് വ്യാജമാണെന്നും ഒരു പ്രത്യേക മതവിഭാഗത്തെ പ്രതിക്കൂട്ടില് നിര്ത്തി സമൂഹത്തില് ഭിന്നിപ്പ് ഉണ്ടാക്കി തിരഞ്ഞെടുപ്പില് നേട്ടം കൊയ്യാന് വേണ്ടി നടത്തുന്ന പ്രവര്ത്തിയാണെന്നും തരൂരിന് അയച്ച വക്കീല് നോട്ടീസില് രാജീവ് ചന്ദ്രശേഖര് ആരോപിക്കുന്നു. നോട്ടീസ് കൈപ്പറ്റി 24 മണിക്കൂറിനകം പ്രസ്താവന പിന്വലിച്ചു പൊതുസമൂഹത്തോട് ശശി തരൂര് മാപ്പ് പറയണമെന്നും അദ്ദേഹം പറഞ്ഞു.
ഒരു സ്വകാര്യ മലയാളം ചാനലിന് നല്കിയ അഭിമുഖത്തിലാണ് ശശി തരൂര് രാജീവ് ചന്ദ്രശേഖറിനെതിരായി ആരോപണങ്ങള് ഉന്നയിക്കുന്നത്. ഇതിനെ തുടര്ന്ന് എന് ഡി എയും രാജീവ് ചന്ദ്രശേഖറും ഇലക്ഷന് കമ്മീഷനെ സമീപിച്ചിരുന്നു. ആര്ക്കും എന്തും പറഞ്ഞു പോകാന് കഴിയില്ലെന്നും ഒരു ആരോപണം ഉന്നയിക്കുമ്പോള് അതിന്റെ വസ്തുതകള് ജനങ്ങളെ ബോധ്യപ്പെടുത്താനുള്ള ആര്ജ്ജവം കാണിക്കണമെന്നും നേരത്തെ തന്നെ രാജീവ് ചന്ദ്രശേഖര് പ്രതികരിച്ചിരുന്നു. പ്രസ്താവനകള് നടത്തി ഒരാഴ്ച കഴിഞ്ഞിട്ടും ഈ വിഷയത്തിന്മേല് ഒന്നും പ്രതികരിക്കാന് ശശി തരൂര് തയ്യാറാകാത്ത സാഹചര്യത്തിലാണ് രാജീവ് ചന്ദ്രശേഖര് നിയമ നടപടികള് കടുപ്പിച്ചത്.
തിരുവനന്തപുരത്തെ വോട്ടറന്മാര്ക്കിടയില് തരൂര് തെറ്റായ വിവരങ്ങള് പ്രചരിപ്പിച്ചുവെന്നും ഇടവക വൈദികര് ഉള്പ്പെടെയുള്ള മണ്ഡലത്തിലെ സ്വാധീനമുള്ള വ്യക്തികള്ക്ക് പണം നല്കി വോട്ട് സ്വാധീനിക്കാന് താന് ശ്രമിച്ചുവെന്ന തെറ്റിദ്ധരിപ്പിക്കുന്ന വിവരങ്ങള് ശശി തരൂര് പ്രചരിപ്പിച്ചുവെന്നും രാജീവ് ചന്ദ്രശേഖര് വക്കീല് നോട്ടീസില് പറയുന്നു. ഒരു പ്രമുഖ മലയാള വാര്ത്ത ചാനലിന് നല്കിയ അഭിമുഖത്തിലാണ് ഇത്തരം ആരോപണങ്ങള് ശശി തരൂര് ഉന്നയിച്ചതെന്നും അത് തന്നെ ഞെട്ടിച്ചുവെന്നും രാജീവ് ചന്ദ്രശേഖര് നോട്ടീസില് പരാമര്ശിച്ചു.
തങ്ങളുടെ കക്ഷിയായ രാജീവ് ചന്ദ്രശേഖറിനെതിരായ 06.04.2024 ല് മുന്പറഞ്ഞ വാര്ത്താ ചാനലില് നിങ്ങള് നടത്തിയ അടിസ്ഥാനരഹിതമായ ആരോപണങ്ങളും വാദങ്ങളും സംബന്ധിച്ച് തിരുത്തുകള് നല്കണമെന്ന് ഞങ്ങളുടെ കക്ഷിക്കുണ്ടായ അപമാനത്തിന് പ്രിന്റ്, ഇലക്ട്രോണിക് മാധ്യമങ്ങള് വഴി പരസ്യമായി ക്ഷമാപണം നടത്തണം. ഞങ്ങളുടെ കക്ഷിയെ അപകീര്ത്തിപ്പെടുത്തുന്നതിനോ, ഉപദ്രവിക്കുന്നതിനോ, സല്ക്കാരിനു കളങ്കം ഉണ്ടാക്കുന്നതോ ആയ ശ്രമങ്ങളില് നിന്ന് ഭാവിയില് വിട്ടു നില്ക്കണമെന്നും അശ്രദ്ധമായ പ്രസ്താവനകളോ നുണകളോ പ്രചരിപ്പിക്കരുതെന്നും അഡ്വക്കേറ്റ് മുഖേനെ അയച്ച നോട്ടീസില് പറയുന്നു.
രാജീവ് ചന്ദ്രശേഖറിനെ ദ്രോഹിക്കുക എന്ന ഉദ്ദേശത്തോടെയാണ് തരൂര് ഈ പ്രസ്താവനകള് നടത്തിയിട്ടുള്ളത്. ഇത്തരം അപകീര്ത്തികരമായ പ്രസ്താവനകള് എങ്ങനെയാണ് തിരുവനന്തപുരത്തെ മുഴുവന് ക്രിസ്ത്യന് സമൂഹത്തെയും അതിന്റെ നേതാക്കളെയും ദ്രോഹിക്കുകയും അനാദരിക്കുകയും ചെയ്തതെന്നും നോട്ടീസില് പറയുന്നു. നോട്ടീസ് ലഭിച്ച് 24 മണിക്കൂറിനുള്ളില് പരസ്യമായ ക്ഷമാപണം നടത്തണമെന്നും നോട്ടീസില് പറയുന്നു. ക്രൈസ്തവര്ക്ക് പണം നല്കി വോട്ട് നേടാന് ശ്രമിച്ചു എന്ന വ്യാജ ആരോപണമാണ് ശശി തരൂര് ഉന്നയിച്ചത്.
