അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.ആരാധകർ ഏറെ ആകാംക്ഷയോടെ കാത്തിരിക്കുന്ന വിജയ് ചിത്രമാണ് ദ ഗോട്ട്. വെങ്കിട് പ്രഭുവാണ് ചിത്രത്തിന്റെ സംവിധായകൻ. ഇപ്പോൾ ചിത്രത്തിന്റെ റിലീസ് തീയതി പുറത്തുവിട്ടിരിക്കുകയാണ് അണിയറ പ്രവർത്തകർ. 2024 സെപ്തംബർ അഞ്ചിനാണ് ചിത്രം റിലീസ് ചെയ്യുന്നത്.
വിജയുടെ 68 -ാമത്തെ ചിത്രമാണിത്. എജിഎസ് എന്റർടെയ്‌മെന്റാണ് ചിത്രം നിർമ്മിക്കുന്നത്. ദ ഗോട്ടിന്റെ തിരക്കഥ എഴുതിയിരിക്കുന്നത് കെ ചന്ദ്രുവും ഏഴിലരശ് ഗുണശേഖരനുമാണ്. യുവൻ ശങ്കർ രാജയാണ് ചിത്രത്തിന്റെ സംഗീത സംവിധായകൻ. സിദ്ധാർഥയാണ് ഛായാഗ്രാഹണം നിർവ്വഹിച്ചിരിക്കുന്നത്.
ചിത്രം ഒരു സയൻസ് ഫിക്ഷനായിരിക്കുമെന്നും വിജയ് ഡബിൾ റോളിലാണ് എത്തുകയെന്നുമുള്ള റിപ്പോർട്ടുകൾ നേരത്തെ പുറത്തു വന്നിരുന്നു. മീനാക്ഷി ചൗധരി, പ്രഭുദേവ, പ്രശാന്ത്, ലൈല, വൈഭവ്, മോഹൻ, ജയറാം, അജ്മൽ അമീർ തുടങ്ങിയവരും ചിത്രത്തിലുണ്ട്. 22 വർഷങ്ങൾക്ക് ശേഷം വിജയും നടി സ്‌നേഹയും ഒന്നിച്ചെത്തുന്നുവെന്ന സവിശേഷതയും ഈ ചിത്രത്തിനുണ്ട്.
ലോകേഷ് കനകരാജിന്റെ ലിയോ എന്ന ചിത്രമാണ് വിജയ് നായകാനായെത്തി ഏറ്റവും ഒടുവിൽ റിലീസ് ചെയ്ത ചിത്രം. തൃഷയായിരുന്നു ചിത്രത്തിലെ നായിക. തമിഴ് സിനിമകളുടെ കളക്ഷനിൽ കേരള ബോക്‌സ് ഓഫീസിൽ ഒന്നാമതുള്ള ചിത്രമാണ് ലിയോ. ദ ഗോട്ട് എന്ന ചിത്രം ലിയോയുടെ റോക്കോർഡുകൾ തിരുത്തി കുറിക്കുമോയെന്നാണ് ആരാധകർ ഉറ്റുനോക്കുന്നത്.
