അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.ഒരു വീട്ടിലേക്ക് പുതിയൊരു അതിഥി എത്തുകയെന്നത് എല്ലാവര്ക്കും സന്തോഷകരമായ വാർത്തയാണ്. ഈ സമയത്ത് ഭക്ഷണം, ആരോഗ്യം എന്നിവ വളരെയധികം ശ്രദ്ധിക്കേണ്ടതാണ് ഗർഭകാലമെന്നാൽ സ്ത്രീയെ സംബന്ധിച്ച് ജീവിതത്തിലെ ഏറ്റവും പ്രധാനപ്പെട്ട ഘട്ടമാണ്. അമ്മയിൽ ശാരീരികമായ വ്യത്യാസങ്ങൾ കാണപ്പെടുന്നതോടെ അമ്മയും കുഞ്ഞും തമ്മിൽ അഭേദ്യമായ ഒരു ബന്ധം രൂപപ്പെടുന്നു. അതുകൊണ്ടാണ് അമ്മയ്ക്ക് തന്നെക്കുറിച്ചും ഗർഭസ്ഥശിശുവിനെക്കുറിച്ചും നിരന്തര സംശയങ്ങൾ ഉടലെടുക്കുന്നത്.
താൻ കഴിക്കുന്നതെന്തും കുഞ്ഞിലേയ്ക്കും എത്തുമെന്ന പൂർണ്ണബോധ്യമുള്ളതിനാൽ ഭക്ഷണശീലങ്ങളിൽ വരെ ഗർഭിണികൾ പ്രത്യേക ശ്രദ്ധാലുക്കളാണ്. ഗർഭകാലത്ത് പഴങ്ങളും പച്ചക്കറികളും ആഹാരക്രമത്തിൽ കൂടുതലായി ഉൾപ്പെടുത്തേണ്ടതിന്റെ ആവശ്യകതയെകുറിച്ച് ഏവർക്കുമറിയാം.
ഗർഭിണികൾ അവർക്കിഷ്ടമുള്ളതെന്തും കഴിക്കണം എന്ന് പ്രായമായവർ പറയാറുണ്ട്. എന്നാൽ ഇഷ്ടമുള്ളതെല്ലാം ഗർഭകാലത്ത് കഴിക്കുന്നത് ഗുണത്തേക്കാളേറെ ദോഷമേ ചെയ്യൂ.
ഇഷ്ടമുള്ള ഭക്ഷണപദാർത്ഥങ്ങളൊക്കെ അളവിൽ കൂടുതൽ കഴിച്ചാൽ തടി കൂടുന്നതോടൊപ്പം ഷുഗർ, കൊളസ്‌ട്രോൾ തുടങ്ങിയ ആരോഗ്യപ്രശ്നങ്ങൾ ഗർഭകാലത്ത് ഉണ്ടാകാനുള്ള സാധ്യത ഏറെയാണ്. അതിനാൽ ഗർഭിണിയുടെ ഭക്ഷണം കൂടുതൽ പോഷകസമൃദ്ധവും സമീകൃതവുമായിരിക്കാൻ ശ്രദ്ധിക്കണം.
ഗർഭാവസ്ഥയിൽ കഴിക്കേണ്ട ഭക്ഷണങ്ങൾ
പാലുത്‌പന്നങ്ങള്‍
പ്രോട്ടീനും കാത്സ്യവും കൂടുതലായി ശരീരത്തിലെത്തേണ്ട സമയമാണ് ഗർഭകാലം. പാലും പാലുത്പന്നങ്ങളും കഴിക്കുന്നത് വഴി ഇവ ധാരാളമായി അമ്മയുടെ ശരീരത്തിലെത്തുന്നു. ഗർഭിണികൾ ദിവസവും രണ്ട് ഗ്ലാസ് പാലെങ്കിലും കുടിക്കേണ്ടത് അത്യാവശ്യമാണ്.
മുട്ട
ഗർഭിണികളുടെ സൂപ്പർ ഫുഡ് ആയ മുട്ട ധാതുലവണങ്ങൾ, അമിനോ ആസിഡ് തുടങ്ങിയവയുടെ കലവറയാണ്. മുട്ട കഴിക്കുന്നതിലൂടെ ഉയർന്ന അളവിൽ കാത്സ്യവും പ്രോട്ടീനും ശരീരത്തിലെത്തുന്നു. ഗർഭസ്ഥശിശുവിന്റെ ആരോഗ്യത്തിനും പ്രോട്ടീന്റെ അളവ് അമ്മയുടെ ശരീരത്തിലെത്തേണ്ടത് ആവശ്യമാണ്.
മുട്ടയിൽ ധാരാളമായി അടങ്ങിയിരിക്കുന്ന കോളിൻ ഗർഭസ്ഥശിശുവിന്റെ തലച്ചോറിന്റെ വളർച്ചയ്ക്കും നാഡീവ്യൂഹങ്ങളുടെ പ്രവർത്തനക്ഷമതയ്ക്കും അത്യാവശ്യമാണ്.
മധുരക്കിഴങ്ങ്
മധുരക്കിഴങ്ങിലടങ്ങിയിരിക്കുന്ന ബീറ്റാ കരോട്ടിൻ ഗർഭസ്ഥശിശുവിന്റെ ആരോഗ്യത്തിന് വളരെ ഗുണകരമാണ്. ഇതിലുള്ള കൊഴുപ്പിന്റെ അളവ് താരതമ്യേന കുറവായതിനാൽ ഗർഭിണികളുടെ ഡയറ്റിൽ വളരെ എളുപ്പത്തിൽ ഉൾപ്പെടുത്താം.
ഭൂമിയ്ക്കടിയിൽ വളരുന്നതിലാൽ മധുരക്കിഴങ്ങ് നിരവധി ധാതുക്കളാലും വിറ്റാമിനുകളാലും സമ്പുഷ്ടമാണ്. ഭ്രൂണവളർച്ചയ്ക്കാവശ്യമായ വിറ്റാമിൻ A, ഗർഭിണികൾക്കാവശ്യമായ മറ്റ് ഫൈബറുകൾ, ഫോളിക് ആസിഡ്, വിറ്റാമിൻ C, വിറ്റാമിൻ B6, പൊട്ടാസ്യം തുടങ്ങിയവയുടെ ഒരു കലവറ തന്നെയാണ് മധുരക്കിഴങ്ങ്.
ചുവന്ന ചീര
ധാരാളം വിറ്റാമിനുകളാൽ സമ്പന്നമായ ചുവന്ന ചീരയുടെ ആരോഗ്യഗുണങ്ങൾ കേട്ടാൽ ആരും ഇത് ആഹാരക്രമത്തിൽ നിന്ന് ഒഴിവാക്കില്ല. പ്രത്യേകിച്ചും ഗർഭിണിയായ സ്ത്രീകൾ. ഇതിലടങ്ങിയിരിക്കുന്ന വിറ്റാമിൻ A, C, E തുടങ്ങിയവ ഗർഭിണികളിലുണ്ടാകുന്ന കൊളസ്‌ട്രോൾ തടയാൻ സഹായിക്കും.
ഫോളിക് ആസിഡ് കൂടുതലായി ചുവന്ന ചീരയിൽ അടങ്ങിയിരിക്കുന്നതിനാൽ ഗർഭിണികളിലുണ്ടാകുന്ന വളർച്ചയ്ക്കും ക്ഷീണത്തിനും ഒരു പരിഹാരവുമാകും. കൂടാതെ കുഞ്ഞിനെ ജനിതകപരമായ പ്രശ്നങ്ങളിൽ നിന്ന് സംരക്ഷിക്കുകയും ചെയ്യും.
ഗർഭിണികളിലുണ്ടാകുന്ന അമിത രക്തസമ്മർദ്ദം, മാസം തികയാതെയുള്ള പ്രസവം തുടങ്ങിയ പ്രശ്നങ്ങൾക്ക് ചുവന്ന ചീര കഴിക്കുന്നതിലൂടെ പരിഹാരം കണ്ടെത്താം. ചുവന്ന ചീരയിലടങ്ങിയിരിക്കുന്ന മഗ്നീഷ്യം രക്തത്തിൽ പഞ്ചസാരയുടെ അളവിനെ നിയന്ത്രിക്കുന്നു.
കോര
ഗർഭിണിയായ സ്ത്രീകൾ തുടർച്ചയായി മത്സ്യം കഴിക്കുന്നത് കഞ്ഞിന്റെ കാഴ്ചശക്തി വർദ്ധിക്കുന്നതിനും തലച്ചോറിന്റെ വളർച്ചയ്ക്കും ഏറെ സഹായിക്കുമെന്നാണ് പഠനങ്ങൾ തെളിയിക്കുന്നത്. കോര മത്സ്യത്തിൽ ഒമേഗ 3 ഫാറ്റി ആസിഡ് ധാരാളമടങ്ങിയിരിക്കുന്നു. ഇത് എല്ലുകളെയും സന്ധികളെയും കൂടുതൽ ബലപ്പെടുത്തും.
പ്രോട്ടീൻ, വിറ്റാമിൻ B, D തുടങ്ങിയവയുടെ സ്രോതസ്സായതിനാൽ കോര മത്സ്യം ആഹാരത്തിൽ ഉൾപെടുത്തുമ്പോൾ ഗർഭിണികൾക്കും ഗർഭസ്ഥശിശുവിനും കൂടുതൽ ആരോഗ്യ ഗുണങ്ങൾ ലഭിക്കും.
അവൊക്കാഡോ
വെണ്ണപ്പഴം അല്ലെങ്കിൽ അവൊക്കാഡോ എന്നൊക്കെ അറിയപ്പെടുന്ന ഈ പഴം ഗർഭകാല ഡയറ്റിന്റെ ഭാഗമാക്കുന്നതിലൂടെ ഗർഭകാലത്ത് സ്ത്രീകൾ അനുഭവിക്കുന്ന പല ആരോഗ്യപ്രശ്‌നങ്ങൾക്കും പരിഹാരമാകും.
നാരുകൾ, പൊട്ടാസ്യം, മഗ്നീഷ്യം, ഫോളേറ്റ്, വിറ്റാമിൻ C, E, K, B5, B6 തുടങ്ങിയവയുടെ സ്രോതസ്സായതിനാൽ അവൊക്കാഡോ ഗർഭകാലത്തെ ഒഴിച്ചുകൂടാനാവാത്ത പഴങ്ങളിലൊന്നാണ്. ഗർഭകാലത്ത് അനുഭവപ്പെടുന്ന കോച്ചിവലിക്കൽ, ഛർദ്ദി തുടങ്ങിയ അസ്വസ്ഥതകൾക്ക് ആശ്വാസം നൽകാൻ ഈ പഴത്തിനു കഴിയും.
