ന്യൂഡൽഹി: അശ്ലീല വീഡിയോ വിവാദത്തിൽ പ്രതികരിച്ച് കര്‍ണാടകയിലെ ജെഡിഎസ് സ്ഥാനാര്‍ഥിയും ദേവഗൗഡയുടെ കൊച്ചുമകനുമായ പ്രജ്വല്‍ രേവണ്ണ.
അന്വേഷണവുമായി സഹകരിക്കാൻ താൻ ബംഗളൂരുവില്‍ ഇല്ല. ഇക്കാര്യം അന്വേഷണസംഘത്തെ അഭിഭാഷകൻ വഴി അറിയിച്ചു. അവസാനം സത്യം തെളിയുമെന്നും അദ്ദഹം വ്യക്തമാക്കി. സമൂഹമാധ്യമമായ എക്സിലൂടെയാണ് പ്രജ്വലിന്‍റെ പ്രതികരണം.
അഭിഭാഷകന്‍ മുഖേന ബെംഗളൂരു സി.ഐ.ഡി.യുമായി ബന്ധപ്പെട്ടിട്ടുണ്ടെന്നും അദ്ദേഹം എക്‌സില്‍ കുറിച്ചു. അഭിഭാഷകന്‍ മുഖേന അന്വേഷണസംഘത്തിന് കൈമാറിയ കത്തിന്റെ പകര്‍പ്പും പ്രജ്വല്‍ രേവണ്ണ എക്‌സിലൂടെ പുറത്തുവിട്ടിട്ടുണ്ട്. സമൂഹമാധ്യമത്തിലെ പ്രതികരണത്തിനു താഴെ കമന്‍റ് ചെയ്യാൻ സാധിക്കാത്ത തരത്തിലാണ് പോസ്റ്റ്. എവിടെനിന്നാണ് പോസ്റ്റുചെയ്തതെന്ന് വ്യക്തമല്ല.
ബെംഗളൂരുവിന് പുറത്ത് യാത്രയിലാണെന്നാണ് അന്വേഷണസംഘത്തിന് കൈമാറിയ കത്തില്‍ പ്രജ്വല്‍ രേവണ്ണ പറയുന്നത്. അതിനാല്‍ ബെംഗളൂരുവിലെത്തി അന്വേഷണസംഘത്തിന് മുന്നില്‍ ഹാജരാകാന്‍ ഏഴുദിവസം കൂടി സാവകാശം വേണമെന്നും കത്തില്‍ പറയുന്നു.
നേരത്തേ പ്രജ്വല്‍ രേവണ്ണയോട് 24 മണിക്കൂറിനുള്ളില്‍ ഹാജരാകണമെന്ന് അന്വേഷണ സംഘം ആവശ്യപ്പെട്ടിരുന്നു. ജെഡിഎസ് എംഎൽഎയും കേസിലെ രണ്ടാം പ്രതിയുമായ പ്രജ്വലിന്‍റെ പിതാവ് എച്ച്.ഡി. രേവണ്ണയ്ക്കും ഹാജരാകാൻ നോട്ടീസ് നൽകിയിരുന്നു.
സംഭവം വിവാദമായതോടെ പ്രജ്വൽ വിദേശത്തേക്ക് കടന്നതായാണ് വിവരം. ഇതിനിടെ പ്രജ്വലിനെ പാർട്ടിയിൽനിന്ന് സസ്പെൻഡ് ചെയ്തതായി ജെഡിഎസ് അറിയിച്ചിരുന്നു.