അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.കൊടം പുളി ചേർത്ത മീൻകറിക്ക് അല്ലേലും ടേസ്റ്റ് കൂടുതലാണ്. സാധാരണ മീൻകറിയിൽ നിന്നും അല്പം വ്യത്യസ്തമായി ഒരു മീൻകറി തയ്യറാക്കിയാലോ?
ആവശ്യമായ ചേരുവകൾ
- മീന്‍-അര കിലോ – മുള്ളില്ലാത്തതെങ്കില്‍ നന്ന്
- മുളകുപൊടി-5 ടീസ്പൂണ്‍
- മഞ്ഞള്‍പ്പൊടി-അര ടീസ്പൂണ്‍
- ഉലുവാപ്പൊടി-അര ടീസ്പൂണ്‍
- ഇഞ്ചി നീളത്തിലരിഞ്ഞത്-രണ്ട് ടേബിള്‍സ്പൂണ്‍
- ഉലുവ-അര ടീസ്പൂണ്‍
- വെളുത്തുള്ളി അരിഞ്ഞത്-രണ്ട് ടേബിള്‍ സ്പൂണ്‍
- ചുവന്നുള്ളി കനം കുറച്ചരിഞ്ഞത്-രണ്ട് ടേബിള്‍ സ്പൂണ്‍
- കൊടംപുളി-മൂന്ന് ചുള
- വെള്ളം ഒന്നര കപ്പ്
- വെളിച്ചെണ്ണ കാല്‍ കപ്പ്
- കറിവേപ്പില -4 തണ്ട്
- കടുക്-അര ടീസ്പൂണ്‍
തയ്യറാക്കുന്ന വിധം
കൊടം പുളി കഴുകി ഒന്നര കപ്പ് വെള്ളത്തില്‍ ഒരു ടീസ്പൂണ്‍ ഉപ്പു ചേര്‍ത്ത് ഇടണം. ചീനച്ചട്ടിയില്‍ എണ്ണ കായുമ്പോള്‍ കടുകും ഉലുവായും ഇട്ട് പൊട്ടിയാല്‍ ഉള്ളിയും കറിവേപ്പിലയും ഇട്ട് ചുവക്കുമ്പോള്‍ ഇഞ്ചി, വെളുത്തുള്ളി എന്നിവ ഇട്ട് മൂപ്പിച്ച് കോരണം. തുടര്‍ന്ന് മുളകുപൊടി, മഞ്ഞള്‍പ്പൊടി, ഉലുവാപ്പൊടി എന്നിവ ഒന്നിച്ച് അല്‍പ്പം വെള്ളത്തില്‍ കുതിര്‍ത്തു ചേര്‍ത്ത് അരപ്പു നല്ലതുപോലെ വഴറ്റി വാങ്ങണം.
ഒരു ചീനച്ചട്ടിയില്‍ (മണ്ണിലുള്ള മീന്‍ ചട്ടി ഉപയോഗിച്ചാല്‍ മീനിന് രുചി കൂടും) എണ്ണയൊഴിച്ച് രണ്ടു തണ്ട് കറിവേപ്പില ഇടണം. മീന്‍ കഷണങ്ങളും വറുത്തുകോരിയതും അരപ്പില്‍ ഇട്ട് ഇളക്കി ചട്ടിയില്‍ ഇട്ട് പുളിയും വെള്ളവും ഒന്നിച്ച് നല്ലതുപോലെ ഇളക്കി മൂടിവച്ച് ചെറുതീയില്‍ മീന്‍ വെന്തു ചാറു കുറുകി വരുമ്പോള്‍ ഉപ്പ് പോരെങ്കില്‍ ചേര്‍ത്ത് എണ്ണ തെളിയുമ്പോള്‍ വാങ്ങി വയ്ക്കാം.
