അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.എറണാകുളം: വെറ്റിനറി സർവകലാശാലയിലെ സിദ്ധാർഥന്റെ മരണത്തിൽ പ്രതികളുടെ ജാമ്യാപേക്ഷ എതിർത്ത് സിദ്ധാർഥന്റെ അമ്മ ഹൈക്കോടതിയെ സമീപിച്ചു. മകന്റെ മരണകാരണം ഇപ്പോഴും വ്യക്തമല്ലെന്നും സി.ബി.ഐ സമർപ്പിച്ച അന്തിമ റിപ്പോർട്ടിൽ പ്രതികളുടെ പങ്ക് വ്യക്തമാണെന്നും അതിക്രൂരമായ മർദനമാണ് സിദ്ധാർഥൻ നേരിട്ടതെന്നും അമ്മ കോടതിയെ അറിയിച്ചു.
മരണകാരണം പൂർണമായും ഇപ്പോഴും വ്യക്തമായിട്ടില്ല. അത് കണ്ടെത്തേണ്ടതുണ്ട്. തുടരന്വേഷണം വേണ്ടതുണ്ടെന്ന് സി.ബി.ഐ റിപ്പോർട്ടിലൂടെ വ്യക്തമാണെന്നും ഹരജിയിൽ പറയുന്നു. ഇക്കാര്യങ്ങൾ പ്രതികളുടെ ജാമ്യഹരജിയിൽ പരിഗണിക്കണമെന്നും ഹരജി തള്ളണമെന്നുമാണ് ഷീബയുടെ ഹരജിയിലെ ആവശ്യം.
കേസുമായി ബന്ധപ്പെട്ട എട്ട് പ്രതികളാണ് ജാമ്യാപേക്ഷയുമായി ഹൈക്കോടതിയെ സമീപിച്ചത്. നാളെ കോടതി ഈ ഹരജി പരിഗണിക്കാനിരിക്കവേയാണ് സിദ്ധാർഥന്റെ അമ്മ ഉപഹരജിയുമായി ഹൈക്കോടതിയെ സമീപിച്ചത്.
