അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.ഊണിന് എന്നും ഓരോ കറി വേണം. ചില ദിവസങ്ങളിൽ അധികം പച്ചക്കറികൾ ഒന്നും ഉണ്ടാവില്ലെങ്കിൽ പോലും നമുക്ക് നല്ല കുറുകിയ ചാറോട് കൂടിയ കറി തയ്യാറാക്കാം. കുറച്ചു വെണ്ടയ്ക്കയും, തക്കാളിയും ഉണ്ടെങ്കിൽ കിടിലനൊരു കറി എങ്ങനെ തയ്യാറാക്കാം.
ആവശ്യമായ ചേരുവകൾ
- വെണ്ടയ്ക്ക – 10 എണ്ണം
- തക്കാളി – 2 എണ്ണം
- സവാള – 1 എണ്ണം
- പച്ചമുളക് – 4 എണ്ണം
- വെളിച്ചെണ്ണ – 4 സ്പൂൺ
- മഞ്ഞൾ പൊടി – 1 സ്പൂൺ
- ഉപ്പ് – 2 സ്പൂൺ
- കാശ്മീരി മുളക് പൊടി – 1 സ്പൂൺ
- കറിവേപ്പില – 2 തണ്ട്
- വെള്ളം – 2 ഗ്ലാസ്‌
- തേങ്ങ – അര മുറി
- ജീരകം – 1 സ്പൂൺ
- കടുക് – 1 സ്പൂൺ
- ചുവന്ന മുളക് – 4 എണ്ണം
തയ്യാറാക്കുന്ന വിധം
മൺചട്ടിയിൽ കുറച്ച് പച്ചവെളിച്ചെണ്ണ ഒഴിച്ച് അതിലേക്ക് വെണ്ടയ്ക്ക ചെറിയ കഷണങ്ങളായി മുറിച്ചത് ചേർത്തു കൊടുക്കാം. ഒപ്പം തന്നെ പച്ചമുളക് കട്ട് ചെയ്തതും കൂടി ചേർത്തു കൊടുക്കാം. വെളിച്ചെണ്ണയിൽ തന്നെ ഇത് മൂപ്പിച്ചെടുക്കാൻ ശ്രമിക്കുക. കാരണം വെളിച്ചെണ്ണയിൽ കറി ഉണ്ടാക്കുമ്പോൾ ആ കറിക്ക് ഒരു പ്രത്യേക സ്വാദാണ്. വെണ്ടയ്ക്കയിലേക്ക് പച്ചമുളകിന്റെ സ്വാദ് കിട്ടുന്നതിനാണ് രണ്ടും ഒപ്പം വഴറ്റുന്നത്, ഇങ്ങനെ വഴറ്റുന്നത് കൊണ്ട് മറ്റൊരു കാരണം കൂടിയുണ്ട്. വെണ്ടയ്ക്ക കുഴഞ്ഞു പോകാതിരിക്കാനും അതുപോലെ തന്നെ ഒട്ടിപ്പിടിക്കാതെ വെണ്ടയ്ക്കയുടെ വഴുവഴുപ്പ് മാറിക്കിട്ടാനും വേണ്ടിയിട്ടാണ് പച്ച വെളിച്ചെണ്ണയിൽ വെണ്ടയ്ക്ക നന്നായി മൂപ്പിച്ച് എടുക്കുന്നത്.
കുറച്ചു സമയം കഴിയുമ്പോൾ വെണ്ടയ്ക്ക ഒക്കെ നന്നായിട്ട് മൂത്തു വരുന്ന സമയത്ത് ഒപ്പം തന്നെ തക്കാളി അരിഞ്ഞതും ചേർത്തു കൊടുക്കാം. അതിലേക്ക് മഞ്ഞൾപ്പൊടി, കാശ്മീരി മുളകുപൊടി, ആവശ്യത്തിന് ഉപ്പ്, കുറച്ചു കറിവേപ്പിലയും ചേർത്ത് ആവശ്യത്തിന് വെള്ളം ഒഴിച്ച് ഇതൊന്ന് വേകാൻ ആയിട്ട് വയ്ക്കുക. ഇത് വേകുന്ന സമയത്ത് നമുക്ക് അരപ്പ് തയ്യാറാക്കി എടുക്കാം, മിക്സിയുടെ ജാറിലേക്ക് തേങ്ങ, ജീരകം, കറിവേപ്പില, എന്നിവ നന്നായി അരച്ച്, വെണ്ടയ്ക്കയുടെയും തക്കാളിയുടെയും കൂടെ ചേർത്ത് കൊടുക്കാം ഒപ്പം തന്നെ കുറച്ച് സവാള നീളത്തിൽ അരിഞ്ഞതും കൂടി ചേർത്തു കൊടുക്കാം. ഇത്രയും ചേർത്ത് കഴിഞ്ഞാൽ പിന്നെ കറി അധികം തിളയ്ക്കരുത് നന്നായി ചൂടാക്കാനെ പാടുള്ളൂ, ഇളക്കി കൊടുത്തു കൊണ്ടേയിരിക്കാം തീ കുറച്ചു വയ്ക്കാൻ പ്രത്യേകം ശ്രദ്ധിക്കണം.
ഇതൊന്നു നന്നായി ചൂടായി കഴിയുമ്പോൾ ഇത് അടുപ്പത്തുനിന്നും മാറ്റിവയ്ക്കാം ശേഷം മറ്റൊരു ചീന ചട്ടി വച്ചു വെളിച്ചെണ്ണ ഒഴിച്ച്, അതിലേക്ക് കടുക് ചേർത്ത് പൊട്ടിച്ച്, ചെറിയ ഉള്ളി ചെറുതായി അരിഞ്ഞതും ചേർത്ത്, ചുവന്ന മുളകും, കറിവേപ്പിലയും ചേർത്ത്, നന്നായി വറുത്ത് കറിയിലേക്ക് ഒഴിച്ചു കൊടുക്കാം. വളരെ രുചികരമായ നല്ല കുറുകിയ ചാറോടുകൂടിയ ഒരു കറിയാണ് ഇത്. ചോറിനൊപ്പം വളരെ രുചികരമായ ഒരു കറിയാണ്, വളരെ കുറച്ച് ചേരുവകൾ കൊണ്ട് പെട്ടെന്ന് തയ്യാറാക്കാൻ പറ്റുന്ന ഒരു റെസിപ്പി എല്ലാവർക്കും ഇഷ്ടമുള്ളതാണ് അങ്ങനെ 2 പച്ചക്കറി കൊണ്ട് തയ്യാറാക്കുന്ന ഒരു കറിയാണിത്.
