അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.തിരുവനന്തപുരം: വഞ്ചിയൂർ-ചിറക്കുളം കോളനിയിൽ അക്രമിസംഘം യുവാവിനെ ആക്രമിച്ചു. ആക്രമണത്തിനു പിന്നാലെ മാരകായുധങ്ങളുമായി വാഹനത്തിൽ എത്തിയ സംഘം പിടിയിലായി. ഇവർ ആക്രമണത്തിനു പ്രതികാരം ചെയ്യാനെത്തിയതാണെന്ന് പോലീസ് പറയുന്നു. കഴിഞ്ഞ ദിവസം രാത്രി വഞ്ചിയൂർ ചിറക്കുളം കോളനി ടി.സി. 27/2146-ൽ സുധി(22)നാണ് ആക്രമണത്തിൽ പരിക്കേറ്റത്.
കണ്ണിനു കുത്തേറ്റ് സുധിൻ മെഡിക്കൽ കോളേജിൽ ചികിത്സ തേടി. ചിറക്കുളം സ്വദേശികളായ അഞ്ചുപേർക്കെതിരേ വഞ്ചിയൂർ പോലീസ് കേസെടുത്തു. സുധിന്റെ വീട്ടിൽ എത്തിയ സുഹൃത്തുക്കളെ അക്രമിസംഘം തടഞ്ഞതാണ് തുടക്കം. വ്യാഴാഴ്ച രാത്രി രണ്ടുപേർ സുധിന്റെ വീട്ടിൽ എത്തിയത് അഞ്ചംഗസംഘം തടയുകയും സുഹൃത്തുക്കളെയും സുധിനെയും ആക്രമിക്കുകയും ചെയ്തു.
സുധിന്റെ മുഖത്താണ് കുത്തിയത്. പോലീസ് എത്തുന്നതിനു മുമ്പ് പ്രതികൾ സ്ഥലത്തുനിന്ന് രക്ഷപ്പെട്ടു. സ്ഥലത്തെ ലഹരിസംഘമാണ് സുധിനെ ആക്രമിച്ചതെന്നു കുടുംബം പറയുന്നു. ഈ ആക്രമണത്തിനു പിന്നാലെയാണ് മാരകായുധങ്ങളുമായി കാറിലെത്തിയ നാലംഗസംഘത്തെ പോലീസ് പിടികൂടിയത്. ഇവർ സുധിനും സംഘത്തിനും നേരേയുള്ള ആക്രണത്തിനു പ്രതികാരം ചെയ്യാനെത്തിയതാണന്നാണ് പോലീസ് പറയുന്നത്.
കാഞ്ഞിരംപാറ കരിത്തോട് ലെയ്‌ൻ ചാമവിളവീട്ടിൽ അരുൺ(30), കമലേശ്വരം പെരുനെല്ലി പുതുവൽ പുത്തൻവീട്ടിൽ ആനന്ദ്(30), മെഡിക്കൽ കോളേജ് മഞ്ചാട് മഞ്ഞടിക്കുന്നിൽവീട്ടിൽ സിബിൻ (30), കാഞ്ഞിരംപാറ പഴവിള പുത്തൻവീട്ടിൽ ആരോമൽ(30) എന്നിവരെയാണ് വഞ്ചിയൂർ പോലീസ് പിടികൂടിയത്. ഇരുമ്പുവാളുകൾ, കത്തികൾ എന്നിവ വാഹനത്തിൽനിന്നു കണ്ടെടുത്തു.
