അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.പരിസ്ഥിതി സംരക്ഷണത്തിൽ അസാധാരണമായ സംഭാവനകൾ നൽകിയ വ്യക്തികൾക്കായി യുഎഇ കാബിനറ്റ് 10 വർഷത്തെ ബ്ലൂ റെസിഡൻസ് വിസ അനുവദിച്ചു. 2024 മെയ് 15 ബുധനാഴ്ച അബുദാബിയിലെ കാസർ അൽ വതാനിൽ ചേർന്ന മന്ത്രിസഭാ യോഗത്തിന് ശേഷം വൈസ് പ്രസിഡൻ്റും പ്രധാനമന്ത്രിയും ദുബായ് ഭരണാധികാരിയുമായ ഷെയ്ഖ് മുഹമ്മദ് ബിൻ റാഷിദ് ആണ് ഈ തീരുമാനം പ്രഖ്യാപിച്ചത്.
പരിസ്ഥിതി സുസ്ഥിരതയ്ക്കുള്ള യുഎഇയുടെ ഉറച്ച പ്രതിബദ്ധതയ്ക്ക് അടിവരയിട്ടുക്കൊണ്ടാണ് ഇത്തരമൊരു തീരുമാനം എടുത്തതെന്ന് പ്രധാനമന്ത്രി ഊന്നിപ്പറഞ്ഞു, “നമ്മുടെ സമ്പദ്‌വ്യവസ്ഥയുടെ സുസ്ഥിരത നമ്മുടെ പരിസ്ഥിതിയുടെ സുസ്ഥിരതയുമായി ബന്ധപ്പെട്ടിരിക്കുന്നു, ഈ മേഖലയിലെ നമ്മുടെ ദേശീയ ദിശകൾ വ്യക്തവും സ്ഥിരതയുള്ളതുമാണ്.” പരിസ്ഥിതി സംരക്ഷിക്കുന്നതിനും അത്യാധുനിക അന്താരാഷ്ട്ര സാങ്കേതികവിദ്യകൾ സ്വീകരിക്കുന്നതിനും ഉന്നത വിദ്യാഭ്യാസ സമ്പ്രദായങ്ങൾ മെച്ചപ്പെടുത്തുന്നതിനുമുള്ള രാജ്യത്തിൻ്റെ ദൃഢനിശ്ചയം അദ്ദേഹം ആവർത്തിച്ചു.
എന്താണ് യുഎഇ 10 വർഷത്തെ ബ്ലൂ വിസ? ‘ബ്ലൂ റെസിഡൻസി’ എന്നറിയപ്പെടുന്ന പരിസ്ഥിതി ചാമ്പ്യന്മാർക്കായി യുഎഇയുടെ ഒരു ദീർഘകാല റെസിഡൻസി പ്രോഗ്രാം ആണ് . പരിസ്ഥിതി സംരക്ഷണത്തിനായി അസാധാരണമായ അർപ്പണബോധവും പരിശ്രമവും പ്രകടിപ്പിക്കുന്ന വ്യക്തികൾക്കായിയാണ് ഈ 10 വർഷത്തെ വിസ പ്രത്യേകം രൂപകൽപ്പന ചെയ്തിട്ടുള്ളതാണ്.
പരിസ്ഥിതി സംരക്ഷണത്തിനും സുസ്ഥിരതയ്ക്കും വേണ്ടിയുള്ള രാജ്യത്തിൻ്റെ പ്രതിജ്ഞയ്ക്ക് അനുസൃതമായി യുഎഇക്ക് അകത്തും പുറത്തുമുള്ള സുസ്ഥിര സംരംഭങ്ങളെ ശക്തിപ്പെടുത്തുകയാണ് ഈ സംരംഭം ലക്ഷ്യമിടുന്നത്.
പരിസ്ഥിതി സംരക്ഷണത്തിനായി അർപ്പിതരായ വ്യക്തികളെ തിരിച്ചറിയുകയും പിന്തുണയ്ക്കുകയും ചെയ്യുന്നതിലൂടെ, യുഎഇ അതിൻ്റെ സുസ്ഥിര സംരംഭങ്ങൾ നിലനിർത്തുകയും കൂടുതൽ പരിസ്ഥിതി സൗഹൃദ ഭാവിയിലേക്കുള്ള സമർപ്പണത്തെ ശക്തിപ്പെടുത്തുകയും ചെയ്യുന്നു.
