ദോഹ: ഖത്തര്‍ പൊതുജനാരോഗ്യ മന്ത്രാലയം ഹജ്ജ് തീര്‍ത്ഥാടനത്തിനുള്ള വാക്‌സിനേഷന്റെ മാര്‍ഗനിര്‍ദേശങ്ങള്‍ പുറപ്പെടുവിച്ചു. ഹജ്ജിനായി സൗദി അറേബ്യയിലേക്ക് പോകുന്നതിന് മുമ്പ് വാക്‌സിനേഷന്‍ നിര്‍ബന്ധമാണെന്നും മന്ത്രാലയം അറിയിച്ചു. വാക്‌സിനുകള്‍ ശാരീരിക സമ്മര്‍ദ്ദവും മറ്റ് ആരോഗ്യപരമായ അപകടങ്ങളും പ്രതിരോധിക്കുമെന്നും ഖത്തര്‍ പൊതുജനാരോഗ്യ മന്ത്രാലയം കൂട്ടിച്ചേര്‍ത്തു.
മെനിംഗോകോക്കല്‍ മെനിഞ്ചൈറ്റിസിനെതിരായ കോണ്‍ജഗേറ്റ് ക്വാഡ്രിവാലന്റ് (ACWY) വാക്‌സിന്‍ ഒരു വയസ്സും അതിനുമുകളിലും പ്രായമുള്ള എല്ലാ വ്യക്തികളും നിര്‍ബന്ധമായും എടുക്കണമെന്നും മന്ത്രാലയം അറിയിച്ചു, 6 മുതല്‍ 12 മാസം വരെ പ്രായമുള്ള കുഞ്ഞുങ്ങള്‍ക്ക് രണ്ട് മാസത്തെ ഇടവേളകളില്‍ രണ്ട് ഡോസുകളായി വാക്‌സിന്‍ നല്‍കാമെന്നും മന്ത്രാലയം വ്യക്തമാക്കി. സീസണല്‍ ഇന്‍ഫ്‌ലുവന്‍സ, ന്യൂമോകോക്കല്‍ വാക്‌സിന്‍, കോവിഡ്-19 എന്നിവയ്ക്കുള്ള വാക്‌സിനുകളുടെ മാര്‍ഗനിര്‍ദേശങ്ങളും മന്ത്രാലയം പുറത്തിറക്കി.
6 മാസവും അതിനുമുകളിലും പ്രായമുള്ളവര്‍ക്കാണ് ഇന്‍ഫ്‌ലുവന്‍സ വാക്‌സിന്‍ നല്‍കുന്നത്. 65 വയസ്സിനു മുകളിലുള്ള മുതിര്‍ന്ന പൗരന്മാര്‍ക്കും പ്രമേഹം, സിക്കിള്‍ സെല്‍ അനീമിയ, വൃക്കസംബന്ധമായ പരാജയം, വിട്ടുമാറാത്ത ശ്വാസംമുട്ട് അല്ലെങ്കില്‍ സ്‌പ്ലെങ്കോമി തുടങ്ങിയ വിട്ടുമാറാത്ത അവസ്ഥകളും മറ്റ് ഉയര്‍ന്ന അപകടസാധ്യതയുള്ള രോഗങ്ങളുള്ള വ്യക്തികള്‍ക്കും , ഹൃദയ സംബന്ധമായ അസുഖങ്ങള്‍, പ്രതിരോധശേഷി കുറഞ്ഞ വ്യക്തികള്‍ എന്നിവര്‍ക്കും ന്യൂമോകോക്കല്‍ വാക്‌സിന്‍ നല്‍കും. 12 വയസും അതില്‍ കൂടുതലുമുള്ള എല്ലാ വ്യക്തികള്‍ക്കും കോവിഡ് -19 വാക്‌സിന്‍ നിര്‍ദ്ദേശിക്കപ്പെടുന്നുവെന്നും മന്ത്രാലയം അറിയിച്ചു.