‘എന്റെ ക്ഷമ പരീക്ഷിക്കരുത് ‘ ; പ്രജ്വലിന് ദേവ ഗൗഡയുടെ താക്കീത്

ബലാത്സംഗവും ലൈംഗികാതിക്രമവും ഉൾപ്പെടെയുള്ള  കേസുകളിൽ പ്രതിയായ ചെറുമകൻ പ്രജ്വൽ രേവണ്ണയ്ക്ക്  ഇന്ത്യയിലേക്ക് മടങ്ങാനും നിയമനടപടികൾ നേരിടാനും മുന്നറിയിപ്പ് നൽകി മുൻ പ്രധാനമന്ത്രി എച്ച്‌ഡി ദേവഗൗഡ. ഹസൻ ലോക്‌സഭാ മണ്ഡലത്തിലെ സിറ്റിംഗ് എംപിയും എൻഡിഎ സ്ഥാനാർത്ഥിയുമായ പ്രജ്വൽ  സ്ത്രീകളെ ലൈംഗികമായി ചൂഷണം ചെയ്തതിന് നിരവധി കേസുകളിൽ പ്രതിയാണ്.

മുൻ പ്രധാനമന്ത്രിയും ജെഡിഎസ് കുലപതിയുമായ എച്ച്‌ഡി ദേവഗൗഡ തൻ്റെ ചെറുമകൻ പ്രജ്വൽ രേവണ്ണയ്ക്ക് ഇന്ത്യയിലേക്ക് മടങ്ങാനും നിയമനടപടിക്ക് കീഴടങ്ങാനും മുന്നറിയിപ്പ് നൽകി . എക്‌സിൽ പോസ്റ്റ് ചെയ്ത ഒരു കത്തിലൂടെയാണ് താകീത്  നൽകിയത്. “മെയ് 18 ന് ക്ഷേത്രത്തിലേക്ക് പൂജ അർപ്പിക്കാൻ പോകുമ്പോൾ പ്രജ്വൽ രേവണ്ണയെക്കുറിച്ച് ഞാൻ മാധ്യമങ്ങളോട് സംസാരിച്ചിരുന്നു. പ്രജ്വൽ ഉണ്ടാക്കിയ വേദനയിൽ നിന്നും സമ്മർദ്ദത്തിൽ നിന്നും എനിക്കും കുടുംബത്തിനും പാർട്ടിക്കും കരകയറാൻ സമയമെടുത്തു .” ദേവ ഗൗഡ കത്തിൽ കുറിച്ചു .
” കഴിഞ്ഞ ഏതാനും ആഴ്ചകളായി ആളുകൾ എനിക്കും എൻ്റെ കുടുംബത്തിനുമെതിരെ സമൂഹ മാധ്യമങ്ങളിൽ അക്രമം അഴിച്ചു വിടുന്നു. അവരെ വിമർശിക്കാൻ ഞാൻ ആഗ്രഹിക്കുന്നില്ല, എല്ലാ വസ്തുതകളും കണ്ടെത്തുന്നത് വരെ ഞാൻ അവരോട് തർക്കിക്കില്ല, ” അദ്ദേഹം കൂട്ടിച്ചേർത്തു.

I have issued a warning to @iPrajwalRevanna to return immediately from wherever he is and subject himself to the legal process. He should not test my patience any further. pic.twitter.com/kCMuNJOvAo

— H D Deve Gowda (@H_D_Devegowda) May 23, 2024

രേവണ്ണയോട് പോലീസിന് മുമ്പാകെ കീഴടങ്ങാനും ഉടൻ അന്വേഷണം നേരിടാനും ദേവഗൗഡ തൻ്റെ കത്തിൽ ഉത്തരവിടുകയും ഉപദേശിക്കുകയും ചെയ്തു. “ഈ അവസരത്തിൽ എനിക്ക് ഒരു കാര്യം മാത്രമേ ചെയ്യാൻ കഴിയൂ. പ്രജ്വലിനോട് എനിക്ക് ശക്തമായ താക്കീത് നൽകാം, അവൻ എവിടെയായിരുന്നാലും തിരികെ വന്ന് പോലീസിന് മുന്നിൽ കീഴടങ്ങാൻ ആവശ്യപ്പെടാം. അവൻ നിയമനടപടിക്ക് വിധേയനാകണം. പ്രജ്വലിനെതിരായ അന്വേഷണത്തിൽ എന്നിൽ നിന്നോ എൻ്റെ കുടുംബത്തിൽ നിന്നോ ഒരു ഇടപെടലും ഉണ്ടാകില്ലെന്ന് വ്യക്തമാക്കാൻ ആഗ്രഹിക്കുന്നു,” അദ്ദേഹം കൂട്ടിച്ചേർത്തു. ജെഡി (എസ്) എംപി പ്രജ്വൽ രേവണ്ണയുടെ നയതന്ത്ര പാസ്‌പോർട്ട് റദ്ദാക്കണമെന്ന് കർണാടക മുഖ്യമന്ത്രി സിദ്ധരാമയ്യ നേരത്തെ അഭ്യർത്ഥിച്ചു, ഒപ്പം ഇന്ത്യയിലേക്കുള്ള മടങ്ങിവരവ് ഉറപ്പാക്കാനുള്ള സംഘടിത ശ്രമങ്ങളും ആവശ്യപ്പെട്ടു . ദേവഗൗഡയുടെ ചെറുമകനും ഹസൻ ലോക്‌സഭാ മണ്ഡലത്തിലെ എൻഡിഎ സ്ഥാനാർത്ഥിയുമായ 33 കാരനായ പ്രജ്വൽ സ്ത്രീകളെ ലൈംഗികമായി ചൂഷണം ചെയ്തതിന് നിരവധി കേസുകളിലാണ് പ്രതിയാക്കപ്പെട്ടിട്ടുള്ളത് . ബലാത്സംഗം, ലൈംഗികാതിക്രമം, ഇരകളെ ഭയപ്പെടുത്താൻ ബലപ്രയോഗത്തിലൂടെ വീഡിയോ പകർത്തൽ തുടങ്ങിയ ഗുരുതരമായ കുറ്റങ്ങളാണ് പ്രജ്വൽ രേവണ്ണയ്‌ക്കെതിരായ എഫ്ഐആറിൽ ഉള്ളത്. നിയമനടപടികളുമായി പ്രതികളുടെ സഹകരണം ഉറപ്പാക്കാൻ കേന്ദ്രസർക്കാരിൻ്റെ ഇടപെടലിന്റെ ആവശ്യകതയും സിദ്ധരാമയ്യ ഊന്നിപ്പറഞ്ഞു . ഹസ്സൻ തെരഞ്ഞെടുപ്പ് കഴിഞ്ഞ് ഒരു ദിവസം പിന്നിട്ടപ്പോഴേക്കും ഏപ്രിൽ 27 ന് പ്രജ്വൽ ജർമ്മനിയിലേക്ക് പോയി. ഇയാൾ ഇപ്പോഴും ഒളിവിലാണ്. പ്രജ്വൽ രേവണ്ണയെക്കുറിച്ചുള്ള വിവരങ്ങൾ തേടി ഇൻ്റർപോൾ ബ്ലൂ കോർണർ നോട്ടീസും പുറപ്പെടുവിച്ചിട്ടുണ്ട്.