അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.സ്ത്രീധനപീഡനം കാരണം ബി.എ.എം.എസ്. വിദ്യാർഥിനി വിസ്മയ ജീവനൊടുക്കിയത് കേരളത്തെ ഞെട്ടിച്ച ഒരു വാർത്തയായിരുന്നു. 2019 മെയ് 31 നായിരുന്നു വിസ്മയയും കിരണും തമ്മിലുള്ള വിവാഹം. വിവാഹ ശേഷം തന്നെ ഇരുവരും തമ്മിൽ സ്ത്രീധനത്തിന്റെ പേരിൽ പ്രശ്നങ്ങൾ ഉടലെടുത്തിരുന്നു. ഇക്കാരണം കൊണ്ട് തന്നെ വിസ്മയയെ കിരൺ കുമാർ മർദിക്കാറുണ്ടായിരുന്നു. ഒരിക്കൽ മർദനം സഹിക്കവയ്യാതെ വിസ്മയ അച്ഛനെ വിളിച്ച് തനിക്കിനി ഭർതൃവീട്ടിൽ നിൽക്കാൻ വയ്യെന്ന് പറഞ്ഞ് കരഞ്ഞു. അച്ഛൻ എന്നെ ഇവിടുന്ന് കൂട്ടിക്കൊണ്ടു പോയില്ലെങ്കിൽ എന്നെ ഇനി കാണത്തില്ല എന്ന് പറഞ്ഞു കരയുന്ന ഓഡിയോ മെസ്സേജ് സാമൂഹ്യ മാധ്യമങ്ങളിൽ ഇപ്പോഴും പ്രചരിച്ചു കൊണ്ടിരിക്കുന്നു.
“എന്നെ അച്ഛൻ ഇനി കാണത്തില്ല നോക്കിക്കോ. ഇവിടെ നിർത്തിയിട്ട് പോവുകയാണെങ്കിൽ എന്നെ കാണത്തില്ല. അച്ഛൻ നോക്കിക്കോ, ഞാൻ എന്തേലും ചെയ്യും. എന്നെ കൊണ്ട് പറ്റത്തില്ല. എനിക്ക് അങ്ങ് വരണം അച്ഛാ എനിക്ക് പേടിയാ. എന്നെ അടിക്കും എനിക്ക് പേടിയാ. എന്നെ അടിക്കും. എന്നോട് ഇറങ്ങി പോകാൻ പറഞ്ഞു. അടിച്ചിട്ട് എനിക്ക് പേടിയാ അച്ഛാ. എനിക്ക് പേടിയാ എനിക്ക് പേടിയാ എന്നെ കൊണ്ട് പറ്റൂല. എന്നെ അച്ഛൻ കാണത്തില്ല നോക്കിക്കോ, ഇവിടെ നിർത്തിയിട്ട് പോവുകയാണെങ്കിൽ എന്നെ കാണത്തില്ല. അച്ഛൻ നോക്കിക്കോ ഞാൻ എന്തേലും ചെയ്യും. എന്നെ കൊണ്ട് പറ്റുന്നില്ല.” എന്നാണ് വിസ്മയ ഓഡിയോയിൽ പറഞ്ഞു കരയുന്നത്.
ഇതിനു മറുപടി ആയി “പറ്റുന്നില്ലെങ്കിൽ ഇങ്ങു പോരെ, അതൊക്കെ ചുമ്മാതാ, ദേഷ്യം വരുമ്പോൾ പറയുന്നതല്ലേ. അങ്ങനെ ഒക്കെ തന്നാ മക്കളെ ജീവിതം എന്ന് പറഞ്ഞാൽ” എന്ന് പറഞ്ഞാണ്. ഇപ്പോഴും ഈ വീഡിയോ സോഷ്യൽ മീഡിയയിൽ വൈറൽ ആവുമ്പോൾ നിരവധി ആളുകൾ ആണ് ഇതിനെക്കുറിച്ച് സംസാരിക്കുന്നത്. ഒരു പെൺകുട്ടിയെ വിവാഹം ചെയ്തുവിട്ടാൽ ആ വീട്ടിൽ ഉണ്ടാവുന്ന എല്ലാ പ്രശ്നങ്ങളും ഭർത്താവിൽ നിന്നുള്ള ശാരീരികയും മാനസികവുമായുള്ള പീഡനങ്ങളും സഹിച്ച് അവിടെ തന്നെ നിൽക്കണം എന്ന് പറയുന്ന മാതാപിതാക്കൾക്ക് മുന്നിൽ ആയിരുന്നു ഈ പെൺകുട്ടി മരണം കൊണ്ട് താൻ നേരിട്ട പ്രശ്നങ്ങൾ കാണിച്ചു തന്നത്.
നിരവധി പീഡനങ്ങൾ വിസ്മയ ഏറ്റുവാങ്ങിയിരുന്നു. ഒടുവിൽ താങ്ങാൻ ആവാതെ ആണ് 2021 ജൂൺ 21 ന് വിസ്മയ ആത്മഹത്യ ചെയ്തത്. ഒടുവിൽ കേരള മനസ്സാക്ഷിയെ ഞെട്ടിച്ച ഈ കേസിൽ ഭർത്താവ് കുറ്റക്കാരൻ ആണെന്ന് കോടതി വിധിക്കുകയും ചെയ്തിരുന്നു.
ഇനിയെങ്കിലും ഒരു പെണ്കുട്ടിയ്ക്കും ഈ ഗതി വരാതിരിക്കട്ടെ എന്നും, കെട്ടിച്ചുവിട്ട പെണ്മക്കളോട് നിങ്ങൾ ഈ ലോകത്ത് എവിടെ ആണെങ്കിലും നിങ്ങൾക്ക് ഒരു പ്രശ്‍നം വന്നാൽ തിരികെ വരാൻ സ്വന്തം വീടും കൂടെ നില്ക്കാൻ അച്ഛനും അമ്മയും ഉണ്ടെന്നു പറഞ്ഞു കൊടുക്കാൻ ഇനിയെങ്കിലും എല്ലാ മാതാപിതാക്കൾക്കും കഴിയട്ടെ എന്നും സോഷ്യൽ മീഡിയ അഭിപ്രായപ്പെടുന്നുണ്ട്.
കൊല്ലം പോരുവഴിയിലെ ഭർത്തൃവീട്ടിൽ ആണ് വിസ്മയയെ മരിച്ചനിലയിൽ കണ്ടെത്തിയത്. സ്ത്രീധനമായി നൽകിയ കാറിൽ തൃപ്തനല്ലാത്തതിനാലും വാഗ്ദാനംചെയ്ത സ്വർണം ലഭിക്കാത്തതിനാലും ശാരീരികമായും മാനസികമായും പീഡിപ്പിച്ചതിനെത്തുടർന്ന് വിസ്മയ ജീവനൊടുക്കിയെന്നാണ് കേസ്. മോട്ടോർ വാഹന വകുപ്പിലെ ഉദ്യോഗസ്ഥനായിരുന്ന കിരണിനെ അറസ്റ്റിലായതിന് പിന്നാലെ ജോലിയിൽനിന്ന് പിരിച്ചുവിട്ടിരുന്നു.
