ബംഗളൂരു: കർണാടകയിലെ തുമകുരുവിൽ 35കാരിയെ അതിക്രൂരമായി കൊലപ്പെടുത്തിയ ഭർത്താവിനെ പൊലീസ് അറസ്റ്റു ചെയ്തു. കുനിഗാല്‍ താലൂക്കിലെ ഹുളിയുരുദുര്‍ഗയില്‍ തടിമില്ല് ജീവനക്കാരനായ ശിവരാമയാണ് അറസ്റ്റിലായത്. ഇയാളുടെ ഭാര്യ പുഷ്പലതയാണ് വാടക വീട്ടിൽവച്ച് അതിദാരുണമായി കൊല്ലപ്പെട്ടത്. അത്താഴം നൽകാത്ത വൈരാഗ്യത്തിന് യുവതിയെ വെട്ടിക്കൊലപ്പെടുത്തിയ പ്രതി തല വെട്ടിമാറ്റുകയും തോലുരിയുകയും ചെയ്തു.
തിങ്കളാഴ്ച രാത്രിയാണ് സംഭവം നടന്നതെന്നാണ് പോലീസ് നല്‍കുന്ന വിവരം. ശിവരാമയും പുഷ്പലതയും തമ്മില്‍ പതിവായി വഴക്കുണ്ടാകാറുണ്ടായിരുന്നു. തിങ്കളാഴ്ച രാത്രിയുണ്ടായ വഴക്കാണ് കൊലപാതകത്തില്‍ കലാശിച്ചത്.
വഴക്കിനെ തുടര്‍ന്ന് അടുക്കളയില്‍വച്ച് പുഷ്പലതയെ കുത്തിയ ശിവരാമ, കത്തി ഉപയോഗിച്ച് തല വെട്ടിമാറ്റുകയായിരുന്നു. ക്രൂരകൃത്യം നടത്തുമ്പോള്‍ ഇവരുടെ എട്ടുവയസുകാരന്‍ മകന്‍ വീട്ടില്‍ ഉറങ്ങുന്നുണ്ടായിരുന്നു. ഹുളിയുരുദുര്‍ഗയില്‍ വാടകയ്ക്കായിരുന്നു ദമ്പതിമാരുടെ താമസം.
കുറ്റകൃത്യത്തിനു ശേഷം വീട്ടുടമയെ വിളിച്ച് ശിവരാമ കൊലപാതക വിവരം പറയുകയായിരുന്നു. അദ്ദേഹമാണ് പോലീസിനെ വിവരം അറിയിച്ചത്. ചോദ്യം ചെയ്യലില്‍ ശിവരാമ കുറ്റം സമ്മതിച്ചതായി പോലീസ് പറഞ്ഞു.
സംഭവം നടന്നയിടത്തുനിന്നുള്ള ദൃശ്യം മനസാക്ഷിയെ മരവിപ്പിക്കുന്നതായിരുന്നുവെന്ന് പൊലീസ് പറഞ്ഞു. യുവതിയുടെ ശരീരം രക്തത്തിൽ കുതിർന്നു കിടക്കുന്ന നിലയിലും, ഞരമ്പുകളും കുടലുമുൾപ്പെടെ പുറത്തു ചാടിയ നിലയിലുമായിരുന്നു. മൃതദേഹം പോസ്റ്റ്മോര്‍ട്ടത്തിനായി അയച്ചിട്ടുണ്ടെന്നും പോലീസ് പറഞ്ഞു.