അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.കൊച്ചി: എറണാകുളത്തെ എൽഡിഎഫിന്‍റെ വൻ തോൽവിക്ക് പിന്നാലെ സി.പി.എം ജില്ലാ കമ്മിറ്റി യോഗത്തിൽ സംസ്ഥാന സർക്കാരിനെതിരെ വിമർശനം. സർക്കാരിനെതിരെയുള്ള വികാരമാണ് വോട്ടിങ്ങിൽ പ്രതിഫലിച്ചതെന്നും ക്ഷേമ പെൻഷൻ മുടങ്ങിയ വിഷയങ്ങൾ ഉൾപ്പടെ കനത്ത തോൽവിക്ക് കാരണമായെന്നും ഇന്ന് ചേർന്ന ജില്ല കമ്മിറ്റി യോഗത്തിൽ വിമർശനം ഉയർന്നു. ഇതിനൊപ്പം ജില്ലയിലെ സംഘടനാ ദൗർബല്യവും തിരിച്ചടിയായി.
ലോക്‌സഭാ തെരഞ്ഞെടുപ്പിൽ എറണാകുളം ജില്ലയിടക്കം കനത്ത തോൽവിയാണ് സിപിഎമ്മിന് നേരിടേണ്ടിവന്നത്. ഇതിന്റെ കാരണങ്ങൾ സംബന്ധിച്ച് പ്രാഥമിക വിലയിരുത്തൽ നടത്താൻ ചേർന്ന ജില്ലാ കമ്മിറ്റി യോഗത്തിലാണ് വിമർശനം. യോഗത്തിൽ മണ്ഡലങ്ങളിലെ കണക്കുകൾ അവതരിപ്പിച്ച ശേഷമായിരുന്നു ഇത്തരമൊരു വിലയിരുത്തൽ.
മണ്ഡലത്തിൽ മുസ്‌ലിം വോട്ടുകൾ ചോർന്നതിനൊപ്പം സിപിഎമ്മിന് ലഭിച്ചുകൊണ്ടിരുന്ന ഈഴവ വോട്ടുകളിലും ചോർച്ചയുണ്ടായി. ഇക്കാര്യം ഗൗരവതരമായി പരിശോധിക്കണമെന്നും യോഗത്തിൽ നിർദേശമുണ്ടായി.
ഇടത് വോട്ടുകളിൽ ഒരു ഭാഗം ബി.ജെ.പിക്ക് കിട്ടിയെന്നും കമ്മിറ്റി വിലയിരുത്തി. രണ്ടരലക്ഷം വോട്ടിന്‍റെ ഭൂരിപക്ഷത്തിനാണ് എൽഡിഎഫിന്‍റെ സ്ഥാനാർത്ഥി കെ ജെ ഷൈനെ തോല്പിച്ച് യുഡിഎഫിന്‍റെ ഹൈബി ഈഡൻ എറണാകുളം മണ്ഡലം നിലനിർത്തിയത്.
