Movie News

‘ഇത്രേ ഒള്ളൂ…’; ആടുജീവിതം സിനിമ പത്ത് വരിയില്‍ എഴുതി കൊച്ചുമിടുക്കി, ചിത്രം പങ്കുവെച്ച് ബെന്യാമിന്‍

മലയാളത്തിന്റെ അഭിമാനമായ ആടുജീവിതം എന്ന സിനിമയുടെ കഥ പത്ത് വരിയില്‍ വിവരിച്ചിരിക്കുകയാണ് മന്തരത്തൂര്‍ എം എല്‍ പി സ്‌കൂള്‍ വിദ്യാര്‍ത്ഥിനി നന്മ തേജസ്വിനി എന്ന കൊച്ചുമിടുക്കി. നോട്ടുബുക്കില്‍ എഴുതിയ കുട്ടിക്കഥ, സിനിമയുടെ തിരക്കഥാകൃത്ത് ബെന്യാമിന്‍ തന്നെയാണ് സോഷ്യല്‍ മീഡിയയില്‍ പങ്കുവെച്ചത്. ‘ഒരു ദിവസം നജീബ് എന്ന ഒരാള്‍ ജീവിച്ചിരുന്നു… എന്ന് തുടങ്ങിയാണ് കുട്ടിക്കഥ ആരംഭിച്ചത്.

‘ഒരു ദിവസം നജീബ് എന്ന ഒരാള്‍ ജീവിച്ചിരുന്നു, ഒരുനാള് നജീബ് ദുബായില്‍ പോയി, അവിടത്തെ അറബ് മനുഷ്യന്‍ നജീബിനെ പറ്റിച്ച് മരുഭൂമിയില്‍ ഇട്ടു. കുറെ വര്‍ഷങ്ങള്‍ കഴിഞ്ഞു, നജീബ് ആടിന്റെ പുല്ലും ആടിന്റെ വെള്ളവും കുടിച്ച് ജീവിച്ചു. ഒരു ദിവസം നജീബിനെ രക്ഷിക്കാന്‍ ഒരാള് വന്നു. രക്ഷിച്ച് കൊണ്ട് പോയി. പെരിയോനേ റഹ്‌മാനെ… പെരിയോനേ റഹീം… ‘എന്നാണ് നോട്ടുബുക്കില്‍ നന്മ തേജസ്വിനി എഴുതിയത്. കുറിപ്പിന് താഴെ നജീബിന്റെ ഒരു ചിത്രവും വരച്ചു വെച്ചിട്ടുണ്ട്. ഈ ചിത്രം പങ്കുവെച്ചുകൊണ്ട് ‘ഇത്രേ ഒള്ളൂ… മന്തരത്തൂര്‍ എം എല്‍ പി സ്‌കൂള്‍ വിദ്യാര്‍ത്ഥിനി നന്മ തേജസ്വിനി എന്ന മിടുക്കിക്കുട്ടി’ എന്നാണ് ബെന്യാമിന്‍ കുറിച്ചിരിക്കുന്നത്.

ലോകശ്രദ്ധ പിടിച്ചു പറ്റിയ ആടുജീവിതം സിനിമ ഒടിടിയിലെത്താന്‍ കാത്തിരിക്കകയാണ് സിനിമാപ്രേമികള്‍. ബെന്യാമിന്റെ നോവലിനെ അടിസ്ഥാനമാക്കി സംവിധായകന്‍ ബ്ലെസിയാണ് ആടുജീവിതം സിനിമ ഒരുക്കിയത്. പൃഥ്വിരാജിന്റെ കരിയറിലെ തന്നെ അടയാളപ്പെടുത്താവുന്ന കഥാപാത്രമായി നജീബ് മാറി. ആഗോളതലത്തില്‍ 150 കോടിക്ക് മുകളില്‍ കളക്ഷന്‍ നേടിയ ചിത്രമാണ് ആടുജീവിതം. ചിത്രത്തില്‍ പൃഥ്വിരാജ് സുകുമാരന്‍, ജിമ്മി ജീന്‍ ലൂയിസ്, കെ ആര്‍ ഗോകുല്‍, താലിബ് അല്‍ ബലൂഷി, റിക്ക് എബി, അമല പോള്‍, ശോഭ മോഹന്‍ എന്നിവരാണ് പ്രധാന കഥാപാത്രങ്ങളെ അവതരിപ്പിച്ചിരിക്കുന്നത്.