അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.ദുബൈ എമിറേറ്റിലെ ജലവിതരണ ശൃംഖലയെ ശക്തിപ്പെടുത്തുന്നതിന്‍റെ ഭാഗമായി ദുബൈ ഇലക്ട്രിസിറ്റി ആൻഡ് വാട്ടർ അതോറിറ്റി (ദീവ) എൻഖലിയിൽ നിർമിച്ച കൂറ്റൻ ജലസംഭരണി കമീഷൻ ചെയ്തു. 28.7 കോടി ദിർഹം ചെലവിട്ട് നിർമിച്ച റിസർവോയറിന് 120 ദശലക്ഷം ഇംപീരിയൽ ഗാലൻ ശുദ്ധജലം സംഭരിക്കാനുള്ള ശേഷിയുണ്ട്. റിസർവോയറിനെ ദുബൈ ജലവിതരണ ശൃംഖലയുമായി ബന്ധിപ്പിച്ചതോടെ എമിറേറ്റിലെ ജലവിതരണം കൂടുതൽ കാര്യക്ഷമമാകുമെന്നാണ് വിലയിരുത്തൽ.
എൻഖലിയെ കൂടാതെ ലുസൈലി, ഹാസ്യാൻ, ഹത്ത എന്നിവിടങ്ങളിലാണ് പുതിയ സംഭരണികൾ നിർമിക്കുന്നത്. നിലവിൽ ദീവയുടെ റിസർവോയറുകളുടെ ശേഷി 1001.3 ദശലക്ഷം ഇംപീരിയൽ ഗാലനാണ്. എന്നാൽ, മുഴുവൻ ജലസംഭരണികളുടെയും നിർമാണം പൂർത്തിയാകുന്നതോടെ ജലസംഭരണ ശേഷി 1121.3 ദശലക്ഷം ഇംപീരിയൽ ഗാലനായി ഉയരുമെന്ന് ദീവ എം.ഡിയും സി.ഇ.ഒയുമായ സഈദ് മുഹമ്മദ് അൽ തായർ പറഞ്ഞു.
ജലവിതരണ ശൃംഖലയുടെ കാര്യക്ഷമതയും വിശ്വാസ്യതയും വർധിപ്പിക്കുന്ന ദീവയുടെ നയങ്ങൾക്ക് പുതിയ ജലസംഭരണികൾ കരുത്തുപകരുമെന്നും അദ്ദേഹം കൂട്ടിച്ചേർത്തു. ദുബൈയുടെ സുസ്ഥിര വികസനത്തോടൊപ്പം ജല ലഭ്യതയുടെ ആവശ്യവും ഉയരുകയാണ്. ഇത് മുൻകൂട്ടി കണ്ടാണ് പുതിയ ജലസംഭരണികൾ കൂടി ദീവ നിർമിക്കുന്നത്. ഈ റിസർവോയറുകൾ ദീവ ആദ്യഘട്ടം പൂർത്തിയാക്കിയ കടൽവെള്ളം ശുദ്ധീകരിക്കാനായുള്ള അക്വിഫർ സ്റ്റോറേജ് ആൻഡ് റിക്കവറി (എ.എസ്.ആർ) പദ്ധതിയിലേക്ക് കൂട്ടിച്ചേർക്കും. 2025ൽ പദ്ധതി പൂർത്തിയാകുമെന്നാണ് പ്രതീക്ഷ.
