അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.മോഹന്‍ലാല്‍ ആരാധകരുടെ വീഡിയോ സാധാരണ സോഷ്യല്‍ മീഡിയയില്‍ ട്രെന്‍ഡ് ആകാറുണ്ട്. അതില്‍ മോഹന്‍ലാലിന്റെ മുഖം പച്ചകുത്തിയ ആരാധകന്റെ വീഡിയോ ആയിരുന്നു ഏറ്റവും പുതിയതായി പുറത്തുവന്നത്. എന്നാല്‍ ഇപ്പോള്‍ ഇതാ പുറത്ത് വന്നിരിക്കുകയാണ് മോഹന്‍ലാലിന്റെയും ആരാധികയായ ഒരു അമ്മയുടെയും വീഡിയോ. സിനിമ ഷൂട്ടിംഗ് സെറ്റില്‍ തന്നെ കാണാന്‍ എത്തിയ ആരാധികയായ അമ്മയെ ചേര്‍ത്തുപിടിച്ചു നടന്നുവരുന്ന വീഡിയോയാണ് ഇപ്പോള്‍ വൈറല്‍. ഇരുവരും തമ്മിലുള്ള രസകരമായ സംഭാഷണവും വീഡിയോയില്‍ കേള്‍ക്കാം.
ഷൂട്ട് കഴിഞ്ഞ് തിരികെ പോവുകയാണോ എന്ന അമ്മയുടെ ചോദ്യത്തിന് ഞങ്ങളെ പറഞ്ഞു വിടാന്‍ ധൃതി ആയോ എന്നാണ് ലാലേട്ടന്‍ ചോദിച്ചത്. തന്നെ അമ്മ വീട്ടിലേക്ക് ക്ഷണിച്ചിരുന്നു എന്നും താറാവ് കറി ഉണ്ടാക്കി തരാം എന്ന് പറഞ്ഞിരുന്നതായും നടന്‍ വീഡിയോയില്‍ പറയുന്നുണ്ട്. വീണ്ടും കാണാം എന്ന് പറഞ്ഞ് സന്തോഷത്തോടെ കാറിലേക്ക് കയറുന്ന മോഹന്‍ലാലിനെയും വീഡിയോയുടെ അവസാന ഭാഗങ്ങളില്‍ കാണാം. എന്തായാലും സംഗതി ഇപ്പോള്‍ വൈറലാണ്. പ്രായഭേദമന്യേ മലയാളികള്‍ നെഞ്ചിലേറ്റിയ താരമാണ് മോഹന്‍ലാല്‍. മോഹന്‍ലാലും ആരാധകരും തമ്മിലുള്ള കുശലാന്വേഷണങ്ങള്‍ ഇതുപോലെ പലപ്പോഴും സോഷ്യല്‍ മീഡിയയില്‍ വൈറലാകാറുണ്ട്.
കൈനിറയെ ചിത്രങ്ങളുമായി തിരക്കിലാണ് മോഹന്‍ലാല്‍. ‘കണ്ണപ്പ’ എന്ന ബ്രഹ്‌മാണ്ഡ ചിത്രത്തിലും മോഹന്‍ലാല്‍ അഭിനയിക്കുന്നുണ്ട്. പ്രഭാസ്, അക്ഷയ് കുമാര്‍ തുടങ്ങിയ വന്‍ താരനിര ചിത്രത്തിലുണ്ട്. വിഷ്ണു മഞ്ചുവാണ് കണ്ണപ്പയിലെ നായകന്‍. മലയാളത്തില്‍, ശോഭനയ്ക്ക് ഒപ്പം മോഹന്‍ലാല്‍ വീണ്ടും ഒന്നിക്കുന്ന തരുണ്‍ മൂര്‍ത്തി ചിത്രവും അണിയറയില്‍ ഒരുങ്ങുകയാണ്. ആരാധകര്‍ അക്ഷമരായി കാത്തിരിക്കുന്ന ‘എമ്പുരാന്‍’ എന്ന ചിത്രവും പുരോഗമിക്കുകയാണ്. നടന്‍ പൃഥ്വിരാജ് സുകുമാരന്‍ സംവിധാനം ചെയ്ത ‘ലൂസിഫര്‍’ എന്ന ചിത്രത്തിന്റെ പ്രീക്വലാണ് എമ്പുരാന്‍.
