അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.മോഹന്‍ലാലിനെ നായകനാക്കി പൃഥ്വിരാജ് സുകുമാരന്‍ സംവിധാനം ചെയ്യുന്ന എമ്പുരാന്‍ ചിത്രത്തിന്റെ ഓരോ അപ്‌ഡേറ്റും പ്രേക്ഷകര്‍ ഏറെ ആകാംഷയോടെയാണ് കാത്തിരിക്കുന്നത്. നിലവില്‍ ഗുജറാത്തിലാണ് എംപുരാന്റെ ഷൂട്ടിങ് പുരോഗമിക്കുന്നത്. ഇപ്പോഴിതാ സിനിമയുടെ ലൊക്കേഷന്‍ വീഡിയോയാണ് സമൂഹ മാധ്യമങ്ങളില്‍ വൈറലായിരിക്കുന്നത്.
ചിത്രത്തിന്റെ ലൊക്കേഷനില്‍ ഒരു അണിയറപ്രവര്‍ത്തകന്റെ ജന്മദിനം ആഘോഷിക്കുന്ന വീഡിയോയാണ് ഇപ്പോള്‍ ശ്രദ്ധനേടുന്നത്. രസകരമായ വീഡിയോയില്‍, പൃഥ്വിരാജ് ജന്മദിനം ആഘോഷിക്കുന്നയാളോട് കേക്ക് മുറിച്ചയുടന്‍ ‘ഡാ പോയി ഷോട്ട് എടുക്കെടാ’ എന്ന് തമാശയായി പറയുന്നത് കേള്‍ക്കാം. പൃഥ്വിരാജിന്റെ തമശകേട്ട് സെറ്റിലുണ്ടായിരുന്നവര്‍ പൊട്ടിച്ചിരിക്കുന്നതും വീഡിയോയിലുണ്ട്.
മലയാള സിനിമയുടെ ചരിത്രത്തില്‍ തന്നെ നാഴികക്കല്ലായ ‘ലൂസിഫറി’നു രണ്ടാം ഭാഗം വരുന്നു എന്ന വാര്‍ത്തകള്‍ വന്നു തുടങ്ങിയതു മുതല്‍ ആവേശത്തോടെയാണ് പ്രേക്ഷകര്‍ ‘എംപുരാനാ’യി കാത്തിരിക്കുന്നത്. സംവിധാനത്തിനൊപ്പം, സായിദ് മസൂദ് എന്ന കഥാപാത്രത്തെയും പൃഥ്വി ചിത്രത്തില്‍ അവതരിപ്പിക്കുന്നുണ്ട്. ലൂസിഫറിലെ പ്രധാന താരങ്ങളായ ടൊവിനോ തോമസ്, മഞ്ജു വാര്യര്‍, ബൈജു സന്തോഷ്, ഫാസില്‍ തുടങ്ങിയവരും രണ്ടാം ഭാഗത്തില്‍ ഉണ്ടാകുമെന്നാണ് സൂചന. മുരളി ഗോപി തന്നെയാണ് രണ്ടാം ഭാഗത്തിന്റെയും തിരക്കഥാകൃത്ത്. സുജിത് വാസുദേവാണ് ഛായാഗ്രണം നിര്‍വഹിക്കുന്നത്. സംഗീത സംവിധാനം ദീപക് ദേവ് ആണ്.
