അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.കൊച്ചി: ഇന്‍ഷുറന്‍സ് റെഗുലേറ്ററി ആന്‍റ് ഡവലപ്മെന്‍റ് അതോറിറ്റി ഓഫ് ഇന്ത്യയുടെ (ഐആര്‍ഡിഎഐ) കോര്‍പ്പറേറ്റ് ഏജന്‍റ് ലൈസന്‍സ് കരസ്ഥമാക്കി രാജ്യത്തെ പ്രമുഖ മൈക്രോ ഫിനാന്‍സ് സ്ഥാപനമായ മുത്തൂറ്റ് മൈക്രോഫിന്‍. ഇതിലൂടെ ഉപഭോക്താക്കള്‍ക്ക് അനുയോജ്യമായ പദ്ധതികള്‍ ലഭ്യമാക്കാന്‍ സാധിക്കും.
സമൂഹത്തിലെ ദുര്‍ബല വിഭാഗങ്ങള്‍ക്ക് ഉള്‍പ്പടെ ഇന്‍ഷുറന്‍സ് പരിരക്ഷ ഉറപ്പാക്കുന്ന മുത്തൂറ്റ് മൈക്രോഫിന്നിന്‍റെ പ്രതിബദ്ധതയെ ഈ ലൈസന്‍സ് ശക്തിപ്പെടുത്തും. ലൈഫ് ഇന്‍ഷുറന്‍സിന് പുറമെ പ്രകൃതി ദുരന്തങ്ങള്‍ക്കും ആശുപത്രി അത്യാഹിതങ്ങള്‍ക്കും പരിരക്ഷ നല്‍കുന്നതോടെ ഉപഭോക്താക്കളുടെ സാമ്പത്തിക സുരക്ഷിതത്വം കൂടിയാണ് ഇതിലൂടെ ഉറപ്പാകുന്നത്. രാജ്യത്തെ 3.35 ദശലക്ഷം ഉപഭോക്താക്കള്‍ക്കാണ് ഈ സേവനം ലഭിക്കുന്നത്.
ലൈസന്‍സ് ലഭിച്ചതോടെ വിവിധ ഇന്‍ഷുറന്‍സ് ദാതാക്കളുമായി ചര്‍ച്ച നടത്താനും രാജ്യത്തുടനീളമുള്ള ഉപഭോക്താക്കളുടെ ആവശ്യമനുസരിച്ച് വ്യക്തിഗത പദ്ധതികള്‍ ലഭ്യമാക്കാ നും മുത്തൂറ്റ് മൈക്രോ ഫിന്നിന് സാധിക്കും.
തങ്ങളുടെ ഉപഭോക്താക്കള്‍ക്ക് മികച്ച സേവനം ലഭ്യമാക്കാനായി അനുദിനം പുതിയ വഴികള്‍ തേടുകയാണെന്നും ഐആര്‍ഡിഎഐയുമായുള്ള സഹകരണം ഉപഭോക്താക്കള്‍ക്ക് കൂടുതല്‍ അവസരങ്ങള്‍ നല്‍കുമെന്നും അധിക ചെലവുകളില്ലാതെ 19 സംസ്ഥാനങ്ങളിലായുള്ള 1,508 ശാഖകളിലൂടെ 3.35 ദശലക്ഷം ഉപഭോക്താക്കള്‍ക്ക് ഈ സേവനം ലഭിക്കുമെന്നും മുത്തൂറ്റ് മൈക്രോഫിന്‍ സിഇഒ സദാഫ് സയീദ് പറഞ്ഞു.
ഇതോടെ ലൈഫ്, ആരോഗ്യം, ജനറല്‍ എന്നീ ഇന്‍ഷുറന്‍സുകള്‍ കുറഞ്ഞ നിരക്കില്‍ ലഭിക്കും. വൈവിധ്യ പദ്ധതികളിലൂടെ മുത്തൂറ്റ് മൈക്രോഫിന്‍ ഉപഭോക്താക്കളുടെ ലക്ഷ്യങ്ങള്‍ സാക്ഷാത്ക്കരിക്കാനും എന്‍ബിഎഫ്സി-എംഎഫ്ഐയുടെ സഹകരണത്തെ ശക്തിപ്പെടുത്താനും ഇതിലൂടെ സാധിക്കും.
