അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.ന്യൂഡൽഹി: ഉത്തരാഖണ്ഡ് ലൈസൻസിങ് അതോറിറ്റി റദ്ദാക്കിയ 14 ഉൽപന്നങ്ങളുടെ വിൽപന നിർത്തിവെച്ചതായി ബാബാ രാംദേവിൻ്റെ പതഞ്ജലി ആയുർവേദ ലിമിറ്റഡ്. സുപ്രീംകോടതിയെയാണ് പതഞ്ജലി ഇക്കാര്യം അറിയിച്ചത്. ഈ ഉൽപ്പന്നങ്ങൾ പിൻവലിക്കാൻ 5,606 ഫ്രാഞ്ചൈസി സ്റ്റോറുകൾക്ക് നിർദ്ദേശം നൽകിയിട്ടുണ്ടെന്ന് പതഞ്ജലി ആയുർവേദ് ലിമിറ്റഡ് ജസ്റ്റിസുമാരായ ഹിമ കോലിയും സന്ദീപ് മേത്തയും അടങ്ങുന്ന ബെഞ്ചിനെ അറിയിച്ചു.
കൂടാതെ, ലൈസൻസ് റദ്ദാക്കിയ ഉൽപന്നങ്ങൾ സ്റ്റോറുകളിൽ നിന്നും പിൻവലിക്കാൻ 5,606 ഫ്രാഞ്ചൈസികൾക്ക് നിർദേശം നൽകിയതായും ഇവയുടെ പരസ്യം പിൻവലിക്കാൻ മാധ്യമങ്ങളോട് ആവശ്യപ്പെട്ടതായും പതഞ്ജലി കോടതിയെ അറിയിച്ചു.
ഏപ്രിലിൽ ആണ് ഉത്തരാഖണ്ഡ് സ്റ്റേറ്റ് ലൈസൻസിംഗ് അതോറിറ്റി സസ്‌പെൻഡ് ചെയ്ത 14 ഉൽപ്പന്നങ്ങളുടെ വിൽപന തടഞ്ഞത്. 1954 ലെ ഡ്രഗ്‌സ് ആൻഡ് മാജിക് റെമഡീസ് (ഒബ്ജക്ഷനബിൾ അഡ്വർടൈസ്‌മെൻ്റ്) ആക്‌ട് ആവർത്തിച്ചുള്ള ലംഘനങ്ങൾ മൂലമാണ് റദ്ദാക്കൽ ഉത്തരവ് പുറപ്പെടുവിച്ചതെന്ന് ഉത്തരാഖണ്ഡ് സ്റ്റേറ്റ് ലൈസൻസിംഗ് അതോറിറ്റി സത്യവാങ്മൂലത്തിൽ അറിയിച്ചിരുന്നു.
കൊവിഡ് വാക്‌സിനേനും ആധുനിക വൈദ്യശാസ്ത്രത്തിനും എതിരെ പതഞ്ജലി അപകീർത്തികരമായ പ്രചാരണം നടത്തിയെന്ന് ആരോപിച്ച് ഇന്ത്യൻ മെഡിക്കൽ അസോസിയേഷൻ (ഐഎംഎ) സമർപ്പിച്ച ഹർജിയാണ് സുപ്രീം കോടതി പരിഗണിക്കുന്നത്.
തെറ്റിദ്ധരിപ്പിക്കുന്ന പരസ്യം നൽകിയതിന്റെ പേരിൽ പതഞ്ജലി ആയുർവേദ ലിമിറ്റഡിനെതിരെ നടപടിയെടുക്കാതിരുന്ന ഉത്തരാഖണ്ഡ് ലൈസൻസിങ് അതോറിറ്റിക്കെതിരെ രൂക്ഷ വിമർശനം സുപ്രീംകോടതി നേരത്തെ നടത്തിയിരുന്നു. ഇതിന് പിന്നാലെയാണ് 14 ഉൽപന്നങ്ങളുടെ വിൽപന ലൈസൻസിങ് അതോറിറ്റി തടഞ്ഞത്.
ലൈസൻസ് റദ്ദാക്കിയ ഉൽപ്പന്നങ്ങളുടെ ലിസ്റ്റ്
സ്വസരി ഗോൾഡ്
സ്വസരി വതി
ബ്രോങ്കോം
സ്വസരി പ്രവാഹി
സ്വസാരി അവലേഹ്
മുക്തവതി അധിക ശക്തി
ലിപിഡം
ബിപി ഗ്രിത്
മധുഗ്രിത്
മധുനാശിനിവതി അധിക ശക്തി
ലിവാമൃത് അഡ്വാൻസ്
ലിവോഗ്രിത്
ഐഗ്രിത് ഗോൾഡ്
പതഞ്ജലി ദൃഷ്ടി ഐ ഡ്രോപ്പ്
