വിംബിൾഡൺ പുരുഷ സിംഗിൾസ് ഒന്നാം സെമിയിൽ നിലവിലെ ചാമ്പ്യനായ കാർലോസ് അൽകാരസ് ഡാനിൽ മെദ്വദേവിനെ വീഴ്‌ത്തി ഫൈനലിൽ പ്രവേശിച്ചു. ത്രില്ലർ പോരിനൊടുവിലാണ് ആവേശ ജയം. സ്കോ‍ർ 6(1)-7(7), 6-3, 6-4, 6-4.
ആദ്യ സെറ്റിൽ മെദ്‍വദേവിനായിരുന്നു ആധിപത്യം. ടൈബ്രേക്കറിൽ താരം മുന്നിലെത്തുകയും ചെയ്തു. എന്നാൽ, അവിടെ കളി തുടങ്ങിയ അൽകാരസ് ഉടനീളം മേൽക്കൈ വിടാതെ കലാശപ്പോരിലേക്ക് ടിക്കറ്റുറപ്പിക്കുകയായിരുന്നു.
ആറാഴ്ചക്കിടെ താരത്തിനിത് രണ്ടാം ഗ്രാൻഡ്സ്ലാം ഫൈനലാണ്. ദ്യോകോവിച്- മുസെറ്റി രണ്ടാം സെമിയിലെ ജേതാക്കളാകും അൽകാരസിന് എതിരാളി.
കഴിഞ്ഞ വർഷത്തെ ഫൈനലിൽ ദ്യോകോവിച്ചിനെ അട്ടിമറിച്ച അൽകാരസ് കിരീട തുടർച്ച തേടിയാണ് ഫൈനലിൽ ഇറങ്ങുക. ഈ വർഷമാദ്യം നടന്ന ഫ്രഞ്ച് ഓപ്പണിലും താരം കിരീടം നേടിയിരുന്നു. കരിയറിലെ തന്റെ നാലാം ഗ്രാൻഡ്സ്ലാം ഫൈനലിന് കൂടിയാണ് താരം യോഗ്യത നേടിയത്.