അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.ആമയിഴഞ്ചാന് തോടിലെ കാര്യക്ഷമമായ മാലിന്യം നീക്കം ചെയ്യലും വലിച്ചെറിയലും തടയാന് ഒടുവില് ജോയിയുടെ മരണം തന്നെ വേണ്ടി വന്നു. മാലിന്യ നീക്കം യഥാസമയം നടപ്പാക്കാതെ നഗരസഭയ്ക്കുണ്ടായ ജാഗ്രതക്കുറവാണ് ജോയിയെ മരണത്തിലേക്ക് തള്ളിവിട്ടതെന്ന ആരോപണം നില നില്ക്കെ ശക്തമായ നടപടികള് എടുക്കാനാണ് കോര്പ്പറേഷന് തീരുമാനം. മഴക്കാല പൂര്വ്വ ശുചീകരണ പ്രവര്ത്തനങ്ങള് യഥാസമയം നടത്താതെ നടന്ന ഒഴപ്പി നടന്ന നഗരസഭയ്ക്ക് ഒടുവില് ജോയിയുടെ മരണം വേണ്ടി വന്നു കര്ശന നടപടികളുമായി മുന്നോട്ട് പോകാന്. വലിയ രീതിയിലുള്ള പ്രതിഷേധങ്ങളും പ്രക്ഷോഭങ്ങളും വന്നതോടെ ആമയിഴഞ്ചാന് തോടിലെ മാലിന്യമെറിയല് പ്രശ്നത്തില് ശക്തമായി നടപടികൾ കൈക്കൊള്ളാനാണ് നഗരസഭ തീരുമാനം. ഇന്നലെ അര്ദ്ധരാത്രിയുടെ മറവില് ആമയിഴഞ്ചാന് തോടില് നിക്ഷേപിക്കാന് ശ്രമിച്ചവരെ പിടികൂടി നഗരസഭ ഹെല്ത്ത് സ്ക്വാഡ്. വനിതകളുടെ നേതൃത്വത്തില് മൂന്ന് ടീമുകളായി വിവിധ ഭാഗങ്ങളില് പരിശോധന നടത്തിയ സംഘം മാലിന്യം നിക്ഷേപിക്കാന് എത്തിയ 9 പേരെ വാഹനമടക്കമാണ് പിടികൂടിയത്. മാലിന്യം നിക്ഷേപിക്കാന് എത്തിയവര്ക്ക് പിഴയിനത്തില് 45090 രൂപ വീതം ചുമത്തുകയും ചെയ്തു.
ഒരു മനുഷ്യജീവന് നഷ്ട്ടപെട്ടിട്ട് പോലും യാതൊരു കൂസലുമില്ലാതെ വീണ്ടും അതേ തോടിന്റെ മറ്റ് ഭാഗങ്ങളില് മാലിന്യം വലിച്ചെറിയാന് തുനിയുന്നത് ജനങ്ങളോടുള്ള യുദ്ധപ്രഖ്യാപനമാണെന്ന് നഗരസഭ മേയര് ആര്യാ രാജേന്ദ്രന് പറഞ്ഞു. ഇതിനൊന്നും യാതൊരു ന്യായീകരണവും ഇല്ല. കര്ശനമായ നടപടികള് തന്നെ സ്വീകരിക്കും. ആദ്യപടിയായി മാത്രമാണ് നിലവിലെ നിയമമനുസരിച്ചുള്ള പിഴ ചുമത്തിയത്. കൂടുതല് തുകയുടെ പിഴയും വാഹനങ്ങളുടെ രജിസ്ട്രേഷന് റദ്ദാക്കുന്നത് അടക്കമുള്ളവ സ്വീകരിക്കാനുള്ള നടപടികള് തുടര്ന്ന് എടുക്കും. നേരത്തെ വ്യക്തമാക്കിയത് പോലെ മാലിന്യം നഗരസഭയുടെയോ സര്ക്കാരിന്റെയോ ജീവനക്കാരുടെയോ മാത്രം ഉത്തരവാദിത്തമല്ല. നമുക്കോരോരുത്തര്ക്കും അതില് ഉത്തരവാദിത്തമുണ്ട്. നമ്മുടെ നഗരം മലീമസമായാല് അത് നമ്മുടെ എല്ലാവരുടെയും വീഴ്ചയായി തന്നെ കാണണം. മാലിന്യം വലിച്ചെറിയുന്ന രീതി അവസാനിപ്പിക്കണം. എല്ലാത്തരം മാലിന്യങ്ങളും സംസ്കരിക്കാനുള്ള സംവിധാനം നഗരസഭയ്ക്കുണ്ട്. അതില് എന്തെങ്കിലും സംശയമുള്ളവര് നഗരസഭയില് നേരിട്ടോ മേയറുടെ പരാതിപരിഹാര സെല്ലിലേയ്ക്കോ അതുമല്ലെങ്കില് മേയറുടെ 94473 77477 എന്ന ഈ നമ്പറില് നേരിട്ടോ ബന്ധപെടുക. ദയവായി മാലിന്യം വലിച്ചെറിയാതിരിക്കുക, ജനങ്ങളുടെ ജാഗ്രതയും ഞങ്ങള് അഭ്യര്ത്ഥിക്കുകയാണ്. ആരെങ്കിലും മാലിന്യം വലിച്ചെറിയുന്നത് ശ്രദ്ധയില് പെട്ടാല് മേല്പറഞ്ഞ സംവിധാനങ്ങളില് അറിയിച്ചാല് കര്ശനനടപടി എടുക്കുന്നതാണെന്ന് മേയര് പറഞ്ഞു.
ആമയിഴഞ്ചാന് തോടിലെ മാലിന്യപ്രശ്നവുമായി ബന്ധപ്പെട്ട് ഇന്നലെ മുഖ്യമന്ത്രിയുടെ നേതൃത്വത്തില് വിളിച്ച യോഗത്തില് അടിയന്തിരമായി തോടിലെ മാലിന്യ പ്രശ്നങ്ങള്ക്ക് പരിഹാരം കാണാന് തീരുമാനം എടുത്തിരുന്നു. അതിന്റെ ഭാഗമായി നഗരത്തിലെ മാലിന്യ പ്രശ്നം പരിഹിക്കുന്നതിനുള്ള പ്രവര്ത്തനങ്ങളുടെ മേല്നോട്ടത്തിനും സുഗമമായ നടത്തിപ്പിനും ഡിസാസ്റ്റര് മാനേജ്മെന്റ് ആക്ടിലെ വകുപ്പുകള് ഉപയോഗപ്പെടുത്തും. ജില്ലാ കളക്ടറുടെ മേല്നോട്ടത്തില് സബ് കളക്ടറെ പ്രവര്ത്തനങ്ങള് ഏകോപിപ്പിക്കാനുള്ള സ്പെഷ്യല് ഓഫീസറായി ചുമതലപ്പെടുത്തും. മേജര് ഇറിഗേഷന്, കോര്പ്പറേഷന്, റെയില്വേ എന്നീ മൂന്ന് വിഭാഗങ്ങളുടെയും ഏകോപനം ഉറപ്പാക്കാന് തീരുമാനമായിരുന്നു. നിരോധിത പ്ലാസ്റ്റിക്ക് ഉല്പ്പനങ്ങള് നിരുത്സാഹപ്പെടുത്താന് കര്ശന നടപടിയെടുക്കും. പൊതുനിരത്തിലും ജലാശയത്തിലും മാലിന്യം നിക്ഷേപിക്കുന്ന വാഹനങ്ങളുടെ രജിട്രേഷന് റദ്ദ് ചെയ്യുന്നതുള്പ്പെടെ കര്ശന നടപടികള് സ്വീകരിക്കാനും തീരുമാനം എടുത്തിരുന്നു.
