അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.സമ്പന്നമായ ചരിത്രവും പൈതൃകവും അവകാശപ്പെടുന്ന രാജ്യമാണ് നമ്മുടെ ഇന്ത്യ. ലോകത്തിലെ ഏറ്റവും പുരാതന നാഗരികതകളിലൊന്ന്. ഇന്ത്യയിലെ പുരാതന നഗരങ്ങൾ സന്ദർശിക്കുന്നതിലൂടെ, സഞ്ചാരികൾക്കു രാജ്യത്തിന്റെ മഹത്തായ ഭൂതകാലത്തെക്കുറിച്ച് ഉൾക്കാഴ്ച നേടാനും ആ കാലഘട്ടങ്ങളിലെ വാസ്തുവിദ്യാ വൈഭവത്തെ അനുഭവിച്ചറിയാനും കഴിയും. ജീവിതത്തിൽ ഒരിക്കലെങ്കിലും കണ്ടിരിക്കേണ്ട പുരാതന നഗരങ്ങൾ ഏതൊക്കെ എന്ന് നോക്കാം.
അതിൽ ഏറ്റവും പ്രധാനമാണ് വാരണാസി. വിളക്കുകളുടെ നഗരം അല്ലെങ്കിൽ കാശി എന്നും അറിയപ്പെടുന്നു. ഗംഗാ നദിയുടെ പടിഞ്ഞാറൻ തീരത്ത് സ്ഥിതി ചെയ്യുന്ന ഒരു പുണ്യ നഗരമാണിത്. 3,000 വർഷത്തിലേറെ പഴക്കമുള്ള ചരിത്രമുള്ള ഇന്ത്യയിലെ ഏറ്റവും പഴയ നഗരങ്ങളിലൊന്നായി ഇത് കണക്കാക്കപ്പെടുന്നു. നമുക്ക് ഇവിടം ഒരു തിരക്കേറിയ തീർഥാടന കേന്ദ്രം ആണെങ്കിൽ രാജ്യാന്തര സഞ്ചാരികൾക്ക് ഇത് ഇന്ത്യയുടെ സമ്പന്നമായ സംസ്കാരത്തിന്റെയും ചരിത്രപരമായ സമൃദ്ധിയുടെയും പ്രതിഫലനം നൽകുന്നു. ഇന്ന്, വാരണാസി ഒരു തിരക്കേറിയ നഗരമാണ്. വാരണാസിലെ പ്രഭാത ആരതി കാണാനാണ് ലോകമെമ്പാടും നിന്നുമുള്ള വിനോദസഞ്ചാരികൾ ഇവിടേക്ക് ഒഴുകിയെത്തുന്നത്. ഇവിടുത്തെ ക്ഷേത്രങ്ങളിൽ പലതും 500 മുതൽ 1000 വർഷം വരെ പഴക്കമുള്ളവയാണ്. പ്രശസ്തമായ ബനാറസി സാരികൾ, അതിമനോഹരമായ മരപ്പണികൾ, കൈകൊണ്ട് കെട്ടിയ പരവതാനികൾ എന്നിവ വാങ്ങാം. ജനപ്രിയ ബനാറസി പാൻ ആസ്വദിക്കാം.
ഇനി മറ്റൊരു പ്രധാന നഗരമാണ് തമിഴ്നാട്ടിലെ മധുര. മധുരയുടെ ചരിത്രം 4,000 വർഷത്തിലധികം നീണ്ടുനിൽക്കുന്നു. ഈ നഗരത്തിൽ നിരവധി ക്ഷേത്രങ്ങളുണ്ട്, അവയിൽ ഏറ്റവും പ്രശസ്തമായത് മധുര മീനാക്ഷി അമ്മൻ ക്ഷേത്രമാണ്. ഏഴാം നൂറ്റാണ്ടിൽ നിർമിച്ച ഈ ക്ഷേത്രം അതിന്റെ വാസ്തുവിദ്യാ വൈഭവത്തിനു പേരുകേട്ടതാണ്. പതിനേഴാം നൂറ്റാണ്ടിൽ നിർമിച്ച ഇവിടുത്തെ ഗാന്ധിമണ്ഡപം, ഗാന്ധിയെക്കുറിച്ചുള്ള വിപുലമായ പുസ്തകങ്ങളുടെ ശേഖരം ഉൾക്കൊള്ളുന്ന മറ്റൊരു ശ്രദ്ധേയമായ വിനോദസഞ്ചാര കേന്ദ്രമാണ്. മീനാക്ഷി ക്ഷേത്രത്തിന് സമീപമാണ് സമനാർ കുന്നുകൾ, ജൈന പുരോഹിതന്മാർ ഉപയോഗിച്ചിരുന്ന ഒന്നാം നൂറ്റാണ്ടിലെ ഒരു ഗുഹ ഇവിടെ കാണാം. സ്വാദിഷ്ടമായ പ്രാദേശിക പാചകരീതികൾ ആസ്വദിക്കാതെ മധുരയിലേക്കുള്ള ഒരു യാത്രയും പൂർത്തിയാകില്ല. പരമശിവൻ ആനന്ദനൃത്തം അവതരിപ്പിച്ചതായി വിശ്വസിക്കപ്പെടുന്ന പവിത്രമായ മീനാക്ഷി ക്ഷേത്രവും അതിലെ ആയിരം സ്തംഭ ഹാളും ഇവിടെ സന്ദർശിക്കാം. മഹാവിഷ്ണുവിന്റെ 108 സ്വർഗീയ വാസസ്ഥലങ്ങളിൽ ഒന്നായി കണക്കാക്കപ്പെടുന്ന കൂടൽ അഴഗർ ക്ഷേത്രം സന്ദർശിക്കാം. ഗാന്ധി മ്യൂസിയം സന്ദർശിച്ച് സ്വാതന്ത്ര്യ സമരത്തെക്കുറിച്ച് വിശദമായി മനസ്സിലാക്കാം. ഇഡ്ലി കടകളിൽ നിന്നുള്ള പ്രാദേശിക വിഭവങ്ങൾ ആസ്വദിക്കാം.
മധ്യപ്രദേഷിലെ ഉജ്ജയിനാണ് മറ്റൊന്ന്. ക്ഷേത്ര നഗരമായ ഉജ്ജയിൻ പഴയതും പുതിയതുമായ നിരവധി ക്ഷേത്രങ്ങളുണ്ട്. ഇന്ത്യയിലെ ഒരു പ്രധാന മത കേന്ദ്രമായ ഇവിടം, ഹിന്ദു തീർഥാടകർക്ക് മാത്രമല്ല; ടൂറിസ്റ്റുകൾക്കു നഗരത്തിൽ താൽപ്പര്യമുണർത്തുന്ന നിരവധി സ്ഥലങ്ങളുണ്ട്. ശിപ്ര നദിയുടെ തീരത്ത് സ്ഥിതി ചെയ്യുന്ന ഉജ്ജയിൻ, കുംഭമേളയുടെ ആതിഥേയത്വം കൂടിയാണ് ഇവിടം. സമ്പന്നമായ ഭൂതകാലത്തിലേക്കു വിനോദസഞ്ചാരികളെ പരിചയപ്പെടുത്തുന്ന നിരവധി ചരിത്ര സ്ഥലങ്ങൾ ഈ നഗരത്തിലുണ്ട്. 12 ജ്യോതിർലിംഗങ്ങളിൽ ഒന്നായ മഹാകാലേശ്വർ ക്ഷേത്രം സന്ദർശിക്കുക എന്നത് ഉജ്ജയിൻ യാത്രയുടെ പ്രധാന ലക്ഷ്യങ്ങളിൽ ഒന്നാണ്. അതിന്റെ ദക്ഷിണ മുഖി (തെക്ക് അഭിമുഖമായുള്ള) വിഗ്രഹം അതുല്യമാണ്.കാൻസർ ട്രോപ്പിക്കിൽ സ്ഥിതി ചെയ്യുന്ന കാർക്ക് രാജേശ്വര ക്ഷേത്രം സന്ദർശിക്കാം. വിശുദ്ധ ഷിപ്ര നദിയിൽ കുളിക്കാം. ഭഗവത് പുരാണവും സ്കന്ദപുരാണവും പോലെയുള്ള പുണ്യ ഗ്രന്ഥങ്ങൾ അനുസരിച്ച്, ഈ നദിയിലെ സ്നാനം ഒരു വ്യക്തിയെ എല്ലാ പാപങ്ങളിൽ നിന്നും ശുദ്ധീകരിക്കുന്നതായി കണക്കാക്കപ്പെടുന്നു. ഷിപ്ര നദിയുടെ തീരത്തു സ്ഥിതി ചെയ്യുന്ന സിദ്ധാവത്ത് എന്ന ആൽമരം കാണാൻ. വിക്രമാദിത്യ രാജാവ് വേതാളത്തിനെ നിയന്ത്രിക്കാൻ മാന്ത്രിക ശക്തികൾക്കായി ഇവിടെ ധ്യാനിച്ചു എന്നാണ് ഐതിഹ്യം.
ഉത്തർപ്രദേശിലെ അയോധ്യയാണ് മറ്റൊരു പ്രധാന നഗരം. ഇന്ത്യയിലെ ഏറ്റവും പുരാതന നഗരങ്ങളിലൊന്നായ അയോധ്യ, ഹിന്ദു ഇതിഹാസമായ രാമായണത്തിന്റെ പശ്ചാത്തലമെന്ന നിലയിൽ പ്രസിദ്ധമാണ്. ശ്രീരാമന്റെ ജന്മസ്ഥലമായി അംഗീകരിക്കപ്പെട്ട ഈ നഗരം സരയൂ നദിയുടെ തീരത്താണ് സ്ഥിതിചെയ്യുന്നത്, ഒരുകാലത്ത് പുരാതന കോസല രാജ്യത്തിന്റെ തലസ്ഥാനമായിരുന്നു ഇവിടം. ഹിന്ദു ദേവനായ മനു സ്ഥാപിച്ചതാണെന്നു വിശ്വസിക്കപ്പെടുന്ന അയോധ്യയ്ക്ക് ഏകദേശം 9,000 വർഷം പഴക്കമുണ്ടെന്നു കരുതപ്പെടുന്നു. ഇന്ത്യയിൽ ഏറ്റവുമധികം ആളുകൾ സന്ദർശിക്കുന്ന വിനോദസഞ്ചാര കേന്ദ്രങ്ങളിൽ ഒന്നാണിത്. രാമക്ഷേത്രത്തിന്റെ നിർമാണം നടന്നുകൊണ്ടിരിക്കുന്നതിനാൽ നഗരം ആഗോളതലത്തിൽ ശ്രദ്ധ നേടിയിട്ടുണ്ട്. ത്രേതാ കേ താക്കൂർ, ഗുപ്തർ ഘട്ട്, ഗുലാബ് ബാരി, കനക് ഭവൻ, ബഹു ശവകുടീരം എന്നിവയാണ് നഗരത്തിലെ മറ്റ് പ്രധാന ആകർഷണങ്ങൾ. ശ്രീരാമക്ഷേത്രവും ക്ഷേത്ര സമുച്ചയത്തിലേക്കു നയിക്കുന്ന 70 കുത്തനെയുള്ള പടികളുള്ള പ്രശസ്തമായ ഹനുമാൻ ഗർഹി ക്ഷേത്രവും ഇവിടെ സന്ദർശിക്കാം.
