അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.ആഭരണപ്രിയർക്കും, നിക്ഷേപകർക്കും നിലവിൽ മികച്ച അവസരമാണ് കൈവന്നിരിക്കുന്നത്. ഏറെ നാളുകൾക്കു ശേഷം പ്രാദേശിക സ്വർണവില ഏറെ ആകർഷകമായിട്ടുണ്ട്. ഇറക്കുമതി നികുതി കുത്തനെ കുറഞ്ഞ സാഹചര്യത്തിൽ വരും ദിവസങ്ങളിൽ ഇനിയും സ്വർണവില കുറഞ്ഞേക്കാം. കഴിഞ്ഞ ഒരാഴ്ചയ്ക്കിടെ സംസ്ഥാനത്ത് സ്വർണവില മാസത്തെ ഏറ്റവും ഉയർന്ന നിലവാരത്തിൽ നിന്ന് ഏറ്റവും താഴ്ന്ന നിലവാരത്തിലേയ്ക്ക് ഇടിഞ്ഞിരുന്നു. ഏഴു ദിവസം കൊണ്ട് പവൻ 3,800 രൂപയാണ് കുറഞ്ഞത്. ജൂലൈ 17 ന് രേഖപ്പെടുത്തിയ 55,000 രൂപയാണ് ഈ മാസത്തെ സ്വർണത്തിന്റെ ഏറ്റവും ഉയർന്ന നിലവാരം. 53,000 രൂപയിലായിരുന്നു സ്വർണം ഈ മാസം വ്യാപാരം ആരംഭിച്ചത്. മാസത്തെ ഏറ്റവും താഴ്ന്ന നിലവാരത്തിലാണ് വ്യാപാരം പുരോഗമിക്കുന്നത്. പവന് 51,200 രൂപയും, ഗ്രാമിന് 6,400 രൂപയുമാണ്. ഇന്നലെ പവന് 760 രൂപയും, ഗ്രാമിന് 95 രൂപയും താഴ്ന്നിരുന്നു. ബജറ്റ് ദിനം പവന് 2,000 രൂപ ഇടിഞ്ഞിരുന്നു. മാസത്തെ ഏറ്റവും ഉയർന്ന നിലവാരത്തിൽ നിന്ന് ഏകദേശം 3,800 രൂപ താഴെയാണ് നിലവിൽ പവൻ വ്യാപാരം പുരോഗമിക്കുന്നത്. ബജറ്റിൽ സ്വർണം- വെള്ളി എന്നിവയുടെ ഇറക്കുമതി തീരുവ കുറച്ച നടപടിയാണ് നിലവിലെ പ്രാദേശിക വിലയിടിവിനു കാരണം. സ്വർണത്തിന്റെയും, വെള്ളിയുടെയും കസ്റ്റംസ് തീരുവ 15 ശതമാനത്തിൽ നിന്ന് 6 ശതമാനമായും, പ്ലാറ്റിനത്തിന്റേത് 6.4 ശതമാനമായുമാണ് കുറച്ചത്. അതേസമയം ആഗോള വിപണിയിൽ സ്വർണവില വീണ്ടും മുകളിലോട്ടാണ്. ആഗോള വിപണിയിൽ സ്വർണം ഔൺസിന് 2,372.56 ഡോളറിലാണ് നിലവിൽ വ്യാപാരം പുരോഗമിക്കുന്നത്. ആഗോള വിപണിയിലെ വിലമാറ്റങ്ങൾ ഡോളറിലായതിനാൽ തന്നെ നേരിയ വിലമാറ്റങ്ങൾ പോലും പ്രാദേശിക വിപണികളിൽ പ്രതിഫലിക്കും. ഡോളർ- രൂപ വിനിമയ നിരക്കിലെ മാറ്റങ്ങളും ഇവിടെ പ്രധാനമാണ്. കഴിഞ്ഞ കുറച്ചു സെഷനുകളായി ഡോളറിന്റെ കരുത്തു കുറയുന്നത് പ്രാദേശിക വിപണികൾക്ക് ആശ്വാസമാണ്.
Content highlight : Gold rate
