അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.ന്യൂഡല്‍ഹി: പലസ്തീന്‍ ഐക്യദാര്‍ഢ്യ പരിപാടിക്കിടെയുണ്ടായ അറസ്റ്റില്‍ കേന്ദ്ര സര്‍ക്കാരിനും ഡല്‍ഹി പോലീസിനുമെതിരെ രൂക്ഷ വിമര്‍ശനവുമായി സിപിഐ നേതാവ് ആനി രാജ. പോലീസ് തന്നെയും മറ്റു പ്രവര്‍ത്തകരെയും ഉപദ്രവിച്ചുവെന്നും തന്റെ വസ്ത്രങ്ങള്‍ വലിച്ചു കീറിയെന്നും ഉച്ചയൂണ് പോലും നല്‍കാതെ കസ്റ്റഡിയില്‍ വെച്ചുവെന്നും ആനി രാജ ആരോപിച്ചു.
ഇന്ന് രാവിലെയാണ് സംഭവം. പലസ്തീന്‍ ഐക്യദാര്‍ഢ്യം പരിപാടിയില്‍ പങ്കെടുത്ത സിപിഐ നേതാവ് ആനി രാജയെ പോലീസ് കസ്റ്റഡിയിലെടുക്കുകയായിരുന്നു. ക്വിറ്റ് ഇന്ത്യ ദിനത്തോട് അനുബന്ധിച്ചായിരുന്നു പലസ്തീൻ ഐക്യദാർഢ്യ പരിപാടി നടത്തിയത്. ഖാൻ മാർക്കറ്റ് പരിസരത്ത് വെച്ചാണ് ആനി രാജയെ ഡല്‍ഹി പൊലീസ് കസ്റ്റഡിയിലെടുത്തത്. വൈകിട്ടോടെയാണ് ആനി രാജയെ ജാമ്യത്തില്‍ വിട്ടത്.
35 വര്‍ഷം ഡല്‍ഹിയില്‍ പ്രതിഷേധ സമരങ്ങള്‍ നടത്തിയിട്ട് ഇത്തരമൊരു അനുഭവം ഉണ്ടായിട്ടില്ല. ആദ്യമായാണ് പോലീസിന്റെ ഭാഗത്തുനിന്ന് ഇത്തരമൊരു അസാധാരണ നടപടിയുണ്ടാകുന്നതെന്ന് ആനി രാജ പറഞ്ഞു.
പലസ്തീൻ എന്ന പേരുകേള്‍ക്കുമ്പോള്‍ ഹാലിളകുന്ന മോദി സര്‍ക്കാര്‍ ഇസ്രായേലിനെ പ്രീതിപ്പെടുത്താൻ പൊലീസ് സഹായത്തോടെ പ്രവര്‍ത്തകരെ ബലമായി അറസ്റ്റ് ചെയ്യുകയായിരുന്നുവെന്ന് ആനി രാജ ആരോപിച്ചു.
