അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.കൊല്‍ക്കത്തയില്‍ വനിതാ ഡോക്ടറെ ജോലിസ്ഥലത്ത് വച്ച് ബലാത്സംഗം ചെയ്ത് കൊലപ്പെടുത്തിയ സംഭവത്തില്‍ മെഡിക്കല്‍ രംഗത്തെ സ്ത്രീകളുടെ സുരക്ഷയെക്കുറിച്ച് വ്യാപകമായ ആശങ്കകള്‍ ഉയര്‍ത്തുന്ന പശ്ചാത്തലത്തില്‍ വിപിഎസ് ലേക്ഷോര്‍ ആശുപത്രിയിലെ എല്ലാ ജീവനക്കാര്‍ക്കും മാര്‍ഷ്യല്‍ ആര്‍ട്‌സില്‍ പരിശീലനം നല്‍കാനുള്ള പദ്ധതി ആരംഭിച്ചു. 50 ലക്ഷം രൂപ ചെലവിലാണ് പദ്ധതി രൂപകല്‍പ്പന ചെയ്തിരിക്കുന്നത്. പദ്ധതിയുടെ രണ്ടാം ഘട്ടത്തില്‍ സംസ്ഥാനത്തുടനീളമുള്ള സ്ത്രീകള്‍ക്ക് ആയോധനകല പരിശീലനം നല്‍കും. തദ്ദേശ സ്ഥാപനങ്ങളുടെ സഹകരണത്തോടെയും സര്‍ക്കാര്‍ പിന്തുണയോടെയുമാണ് പദ്ധതി നടപ്പാക്കുക. ആറ് മാസത്തിനുള്ളില്‍ ഏകദേശം 50,000 സ്ത്രീകള്‍ക്ക് സൗജന്യ പരിശീലനം നല്‍കാനാണ് ആശുപത്രിയുടെ ലക്ഷ്യം. ഈ പദ്ധതിയിലൂടെ, ഞങ്ങളുടെ ടീമില്‍ ആത്മവിശ്വാസവും സഹിഷ്ണുതയും വളര്‍ത്താനാണ് ഞങ്ങള്‍ ലക്ഷ്യമിടുന്നത്. ആയോധനകല പരിശീലനം അവരുടെ ശാരീരിക പ്രതിരോധത്തിനുള്ള കരുത്ത് വര്‍ദ്ധിപ്പിക്കുക മാത്രമല്ല മാനസിക ശക്തി വര്‍ദ്ധിപ്പിക്കുകയും ചെയ്യുമെന്ന് ഞങ്ങള്‍ വിശ്വസിക്കുന്നു, വിപിഎസ് ലേക്ഷോര്‍ ആശുപത്രി അധികൃതര്‍ അറിയിച്ചു. പരിശീലനം ലഭിച്ചവരെ സ്‌കൂളുകളിലും കോര്‍പ്പറേറ്റ് ഓഫീസുകളിലും മറ്റു മേഖലകളിലും കൂടുതല്‍ സ്ത്രീകളെ പരിശീലിപ്പിക്കുന്നതിനായി വിന്യസിച്ച്, സംസ്ഥാനത്തുടനീളം 50,000 സ്ത്രീകള്‍ക്ക് ആറുമാസത്തിനുള്ളില്‍ സൗജന്യ പരിശീലനം നല്‍കുമെന്നും അവര്‍ കൂട്ടിച്ചേര്‍ത്തു.
ആയോധനകല പരിശീലന പരിപാടിക്ക് പുറമേ, ആശുപത്രി ജീവനക്കാരല്ലാത്ത എല്ലാ സ്ത്രീകള്‍ക്കും സുരക്ഷാ കിറ്റുകള്‍ വിതരണം ചെയ്യും. ഈ കിറ്റുകളില്‍ പെപ്പര്‍ സ്‌പ്രേ പോലുള്ള അവശ്യ സംരക്ഷണ വസ്തുക്കളും സ്ത്രീകള്‍ക്ക് ഉടനടി സ്വയം പ്രതിരോധിക്കാന്‍ സഹായകമാകുന്ന മറ്റ് സുരക്ഷാ ഉപകരണങ്ങളും ഉണ്ടാകും. ഇതിനു പുറമേ, ശിശു, വനിതാ ക്ഷേമ സമിതികള്‍ ഉള്‍പ്പെടെ വിവിധ സര്‍ക്കാര്‍ ഏജന്‍സികളുമായി സഹകരിച്ച് ആശുപത്രിയുടെ നേതൃത്വത്തില്‍ വിദ്യാര്‍ത്ഥികള്‍ക്കായി ലൈംഗിക വിദ്യാഭ്യാസ ക്ലാസുകള്‍ നടത്തും. സംസ്ഥാന വ്യാപകമായ ഈ സംരംഭം വിദ്യാര്‍ത്ഥികളെ പ്രതികൂല സാഹചര്യങ്ങളെ ആത്മവിശ്വാസത്തോടെ കൈകാര്യം ചെയ്യാന്‍ സഹായിക്കുന്നതിന് ലക്ഷ്യമിടുന്നു. കൂടാതെ, പ്രാദേശിക പോലീസുമായി സഹകരിച്ച്, പോലീസ് എസ്ഒഎസ് ആപ്ലിക്കേഷന്‍ ഉപയോഗിക്കാന്‍ സ്ത്രീകളെ പരിശീലിപ്പിക്കും, ഇത് അടിയന്തിര സാഹചര്യങ്ങളില്‍ ഉടനടി സഹായം നല്‍കും.
ആശുപത്രിയുടെ സുരക്ഷാ ആപ്പ്
അടിയന്തിര സാഹചര്യങ്ങളില്‍ സഹായം അഭ്യര്‍ത്ഥിക്കാന്‍ എസ്ഓഎസ് പ്രവര്‍ത്തനം ഫീച്ചര്‍ ചെയ്യുന്ന സ്വന്തം മൊബൈല്‍ ആപ്ലിക്കേഷന്‍ വികസിപ്പിക്കാനും ആശുപത്രി മുന്‍കൈ എടുത്തിട്ടുണ്ട്. ഏത് അടിയന്തിര സാഹചര്യത്തിലും അധികാരികളെ തല്‍ക്ഷണം അറിയിക്കുന്നുവെന്ന് ഉറപ്പാക്കിക്കൊണ്ട്, ആശുപത്രിയുടെ സുരക്ഷാ ഡെസ്‌ക്കിലേക്കും തിരഞ്ഞെടുത്ത വകുപ്പ് മേധാവികള്‍ക്കും ഉപയോക്താവിന്റെ തത്സമയ ലൊക്കേഷന്‍ കൈമാറാന്‍ കഴിയുന്ന രീതിയിലാണ് ആപ്പ് രൂപകല്‍പ്പന ചെയ്യുന്നത്. ഹോസ്പിറ്റല്‍ പരിതസ്ഥിതിയില്‍ പൂര്‍ണമായ സുരക്ഷയും പ്രതികരണശേഷിയും വര്‍ദ്ധിപ്പിക്കാന്‍ ഈ മുന്‍കരുതല്‍ നടപടി ലക്ഷ്യമിടുന്നു
Content Highlights; Women’s safety: VPS Lakeshore with state-level scheme to train women in martial arts
