അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.കോഴിക്കോട്: ഹേമ കമ്മിറ്റി റിപ്പോര്‍ട്ടില്‍ സിനിമാ മേഖലയിലെ ലൈംഗികാതിക്രമം ഉള്‍പ്പെടെ ക്രിമിനല്‍ കുറ്റങ്ങള്‍ പരാമര്‍ശിച്ച സാഹചര്യത്തില്‍ സ്വമേധയാ കേസെടുക്കണമെന്ന് ബിജെപി ദേശീയ നിര്‍വാഹകസമിതി അംഗം പി.കെ കൃഷ്ണദാസ്. 18 വയസില്‍ താഴെ പ്രായമുള്ളവര്‍ക്ക് പീഡനം ഏറ്റെങ്കില്‍ പരാതിക്കാരില്ലെങ്കിലും പോക്‌സോ പ്രകാരം കേസെടുക്കാമെന്ന് കൃഷ്ണദാസ് പറഞ്ഞു.
ആഭ്യന്തരവകുപ്പിന് സമര്‍പ്പിച്ച റിപ്പോര്‍ട്ടില്‍ സ്വമേധയാ കേസെടുക്കാന്‍ അധികാരമുണ്ടായിട്ടും കേസെടുക്കാതിരിക്കുന്നത് ഗുരുതരവീഴ്ചയാണ്. റിപ്പോര്‍ട്ട് വര്‍ഷങ്ങളോളം പൂഴ്‌ത്തിവച്ചു. പോക്‌സോ കേസുകളെ സംബന്ധിച്ച്‌ അറിവുണ്ടായിട്ടും മറച്ചുവെക്കുന്നവര്‍ക്കെതിരെ നടപടിയെടുക്കാമെന്നിരിക്കെ എല്ലാ വിവരങ്ങളും അറിഞ്ഞിട്ടും മറച്ചുവച്ച മുഖ്യമന്ത്രിയെ ഒന്നാം പ്രതിയാക്കി കേസെടുക്കണമെന്നും അദ്ദേഹം പറഞ്ഞു.
സംസ്ഥാന സര്‍ക്കാര്‍ അലംഭാവവും ആസൂത്രണമില്ലായ്മയുമാണ് വയനാട് പുനരധിവാസം പാളാന്‍ കാരണം. രക്ഷാപ്രവര്‍ത്തനത്തിനുശേഷം പുനരധിവാസ പ്രവര്‍ത്തനം യുദ്ധകാലാടിസ്ഥാനത്തില്‍ നടത്തണം. എന്നാല്‍ അതുണ്ടായില്ല. നിരവധി ദുരിതബാധിതര്‍ ഇപ്പോഴും ക്യാമ്ബിലും ബന്ധുവീടുകളിലുമായി കഴിയുന്നു. രക്ഷാപ്രവര്‍ത്തനത്തിന് നേതൃത്വം നല്‍കി പുനരധിവാസം ഉറപ്പുവരുത്താന്‍ നിയോഗിക്കപ്പെട്ട മന്ത്രിതല ഉപസമിതിയും പിന്മാറി. ഉടുതുണിക്ക് മറുതുണിയില്ലാത്ത ദുരിതബാധിതര്‍ എല്ലാ അര്‍ത്ഥത്തിലും അനാഥരാണ്. മന്ത്രിതല ഉപസമിതിയിലെ ഒരു മന്ത്രിയും ഐഎഎസ് ഉദ്യോഗസ്ഥനും പുനരധിവാസ പ്രവര്‍ത്തനങ്ങള്‍ പൂര്‍ത്തിയാവുംവരെ സ്ഥലത്ത് കേന്ദ്രീകരിച്ച്‌ നേതൃത്വം നല്‍കണം. കോഴിക്കോട് വിലങ്ങാട്ടെ പുനരധിവാസത്തിനും ഉടന്‍ നടപടി സ്വീകരിക്കണമെന്നും അദ്ദേഹം ആവശ്യപ്പെട്ടു.
