വാഴയിലയിൽ മീൻ പൊള്ളിച്ചത് ഇഷ്ടമില്ലാത്ത മലയാളികളുണ്ടാകുമോ…? പലപ്പോഴും കരിമീനാണ് നമ്മൾ ഇലയിൽ പൊരിക്കാറുള്ളത്, കരമീന്‍ മാത്രമല്ല നല്ല നാടന്‍ മത്തിലും കിടിലന്‍ രുചിയില്‍ പൊള്ളിച്ചെടുക്കാം. എങ്ങനെ ആണ് എന്ന് നോക്കാം
വൃത്തിയാക്കി, വരഞ്ഞ മത്തിയില്‍ മുളക് പൊടി, കുരുമുളക് പൊടി , മഞ്ഞള്‍ പൊടി, ഉപ്പ് എന്നിവയും കുറച്ചു വെള്ളവും ചേര്‍ത്ത് പേസ്റ്റ് പരുവമാക്കി നന്നായി പുരട്ടി അര മണിക്കൂര്‍ വെക്കുക. അതിനു ശേഷം മീന്‍ അല്‍പം എണ്ണയില്‍ വറുക്കുക. ചീനച്ചട്ടിയില്‍ എണ്ണ ഒഴിച്ച് പച്ച മുളക്, ഇഞ്ചി വെളുത്തുള്ളി പേസ്റ്റ് എന്നിവ ചേര്‍ക്കുക. അതിലേക്കു ചുവന്നുള്ളി അരിഞ്ഞത് ചേര്‍ക്കുക. ശേഷം ഉള്ളി വഴന്നു കഴിയുമ്പോള്‍ അതിലേക്കു ഒരു സ്പൂണ്‍ മുളകുപൊടി, കാല്‍ സ്പൂണ്‍ മഞ്ഞള്‍ പൊടി, ഉപ്പ് എന്നിവ ചേര്‍ക്കുക. ഒരു ചെറിയ കഷണം കുടംപുളി മൂന്നു സ്പൂണ്‍ വെള്ളത്തില്‍ അലിയിച്ച് ചേര്‍ക്കുക. ഇത് നന്നായി യോജിപ്പിച്ചുകഴിയുമ്പോള്‍ തേങ്ങാ പാല്‍ കൂടി ചേര്‍ത്ത് ഇളക്കണം. ചൂടായി കഴിയുമ്പോള്‍ അടുപ്പിൽ നിന്ന് മാറ്റി വയ്ക്കാം. വാഴയില വാട്ടി എടുത്ത്, അതില്‍ ഒരു സ്പൂണ്‍ ഈ മസാല വച്ച് അതിന്റെ മുകളില്‍ രണ്ടു മീന്‍ കൂടി വച്ച് അതിന്റെ മുകളില്‍ ഒരു സ്പൂണ്‍ മസാല കൂടി വച്ച് കുറച്ചു കറിവേപ്പില ഇതിന്റെ മുകളില്‍ ഇടാവുന്നത് ആണ്. ശേഷം ഇല നന്നായി മടക്കി വാഴ നാരു കൊണ്ട് തന്നെ കെട്ടുക. ഒരു തവയില്‍ എണ്ണ പുരട്ടി മീന്‍ അതില്‍ വെച്ച് ഇരു വശവും നന്നായി വേവുന്നത് വരെ ചുട്ടെടുക്കാവുന്നത് ആണ്.
Story Highlights ; Mathi ilayil polichath