അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.ന്യൂഡൽഹി: പ്രധാനമന്ത്രി നരേന്ദ്രമോദി അമേരിക്കയിൽ സന്ദർശനം നടത്തുമെന്ന് റിപ്പോ‍ർട്ട്. സെപ്റ്റംബർ 21 മുതൽ 23 വരെയാണ് സന്ദർശനമെന്ന് വിദേശകാര്യമന്ത്രാലയം അറിയിച്ചു.
സെപ്റ്റംബർ 21ന് യുഎസിലെ ഡെലവെയറിലെ വിൽമിംഗ്ടണിൽ നടക്കുന്ന നാലാമത് ക്വാഡ് ഉച്ചകോടിയിൽ പ്രധാനമന്ത്രി പങ്കെടുക്കും. യു.എസ് പ്രസിഡന്റ് ജോ ബൈഡനാണ് സമ്മേളനത്തിന് ആതിഥേയത്വം വഹിക്കുന്നത്. ഇന്ത്യ, യു.എസ്, ജപ്പാൻ, ആസ്ട്രേലിയ തുടങ്ങിയ രാജ്യങ്ങളാണ് ക്വാഡിലെ അംഗങ്ങൾ.
കഴിഞ്ഞ ഒരു വർഷത്തിനിടെ ക്വാഡ് സമ്മേളനത്തിൽ പ്രഖ്യാപിച്ച അജണ്ടയിൽ എത്രത്തോളം പുരോഗതിയുണ്ടാക്കിയെന്നത് വിലയിരുത്തുകയാവും സമ്മേളനത്തിന്റെ മുഖ്യ ലക്ഷ്യം. ഇന്തോ-പസഫിക് രാജ്യങ്ങൾ അവരുടെ വികസന ലക്ഷ്യങ്ങൾക്ക് വേണ്ടിയാണ് ക്വാഡ് സമ്മേളനം നടത്തുന്നത്. അടുത്ത ക്വാഡ് സമ്മേളനം ഇന്ത്യയിൽ വെച്ചാണ് നടക്കുന്നത്.
ശേഷം സെപ്റ്റംബർ 23ന് ന്യൂയോർക്കിൽ നടക്കുന്ന യുഎൻ ജനറൽ അസംബ്ലിയിലെ ‘Summit of the Future’ലും അദ്ദേഹം പങ്കാളിയാകും. ‘മെച്ചപ്പെട്ട നാളേയ്‌ക്കായി ബഹുമുഖ പരിഹാരങ്ങൾ’ എന്നതാണ് ഉച്ചകോടിയുടെ പ്രമേയം.
സെപ്റ്റംബർ 22ന് ന്യൂയോർക്കിലെ ഇന്ത്യൻ സമൂഹത്തെ അഭിസംബോധന ചെയ്യുന്ന പ്രധാനമന്ത്രി, നിർമിതബുദ്ധി (AI), ബയോടെക്നോളജി, സെമികണ്ടക്ടർ തുടങ്ങിയ മേഖലകളിൽ സഹകരണം വളർത്തുന്നതിന് യുഎസ് ആസ്ഥാനമായി പ്രവർത്തിക്കുന്ന പ്രമുഖ കമ്പനികളുടെ CEO ചുമതല വഹിക്കുന്നവരുമായി സംവദിക്കും.
