അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.സംസ്ഥാനത്ത് വീണ്ടും എംപോക്സ് സ്ഥിരീകരിച്ച സാഹചര്യത്തില് രോഗിയുമായി സമ്പര്ക്കത്തില് വന്നവരുടെ സമ്പര്ക്ക പട്ടിക തയ്യാറാക്കി പ്രതിരോധ പ്രവര്ത്തനങ്ങള് ശക്തമാക്കി ആരോഗ്യ വകുപ്പ്. രോഗലക്ഷണങ്ങള് പ്രകടമായതിന് ശേഷമാണ് പ്രധാനമായും രോഗം പകരുന്നത്. അതിനാല് രോഗലക്ഷണങ്ങളുണ്ടായാല് അത് മറ്റുള്ളവരിലേക്ക് പകരാതിരിക്കാൻ വളരെയേറെ ശ്രദ്ധിക്കണം. വിദേശ രാജ്യങ്ങളില് നിന്നും വരുന്നവര്ക്ക് എന്തെങ്കിലും രോഗലക്ഷണങ്ങള് ഉണ്ടായാല് ചികിത്സ തേടുകയും ആരോഗ്യ വകുപ്പിനെ വിവരം അറിയിക്കുകയും വേണം. എല്ലാ ജില്ലകളിലും ഐസൊലേഷന് സൗകര്യം ഒരുക്കിയിട്ടുണ്ട്.
കൂടുതല് കേസുകളുടെ സാധ്യത മുന്നില് കണ്ട് എല്ലാ ജില്ലകളിലും കൂടുതല് ഐസൊലേഷന് സൗകര്യങ്ങളൊരുക്കാന് ആരോഗ്യമന്ത്രി നിര്ദേശം നല്കി. എയര്പോര്ട്ടുകളിലുള്പ്പെടെ അവബോധം ശക്തിപ്പെടുത്തണം. കോവിഡ് 19 , എച്ച്1 എന്1 ഇന്ഫ്ളുവന്സ എന്നിവയെപ്പോലെ പോലെ വായുവിലൂടെ പകരുന്ന ഒരു രോഗമല്ല എം പോക്സ്. രോഗം ബാധിച്ച വ്യക്തിയുമായി മുഖാമുഖം വരിക, നേരിട്ട് തൊലിപ്പുറത്ത് സ്പര്ശിക്കുക, ലൈംഗിക ബന്ധത്തിലേർപ്പെടുക, ചുംബിക്കുക, രോഗി ഉപയോഗിച്ച കിടക്ക, വസ്ത്രം എന്നിവ ഉപയോഗിക്കുക തുടങ്ങിയവയിലൂടെ രോഗപ്പകർച്ചക്കുള്ള സാധ്യത വളരെയേറെയാണ്. ത്വക് രോഗ വിദഗ്ധരുടെ യോഗം ചേര്ന്നിരുന്നു. ഐഎംഎയുടെ സഹകരണത്തോടെ സ്വകാര്യ മേഖലയിലെ ഫിസിഷ്യന്, പീഡിയാട്രീഷ്യന്, ഡെര്മറ്റോളജിസ്റ്റ് എന്നിവരെ കൂടി ഉള്പ്പെടുത്തി യോഗം ചേരും. പ്രായമായവര്, കുട്ടികള്, ഗര്ഭിണികള് എന്നിവരെ പ്രത്യേകം ശ്രദ്ധിക്കണം. ഫീല്ഡ് തല ആരോഗ്യ പ്രവര്ത്തകര് ജാഗ്രതയോടെയിരിക്കണം. പൊതുജനാരോഗ്യ പ്രവർത്തനങ്ങൾ ശാക്തീകരിക്കുന്നതിന് ഫീൽഡ് ആരോഗ്യ പ്രവര്ത്തകരുടെ യോഗം ഉടനെ വിളിച്ച് ചേർക്കുനതാണ്.
പനി, തീവ്രമായ തലവേദന, കഴലവീക്കം, നടുവേദന, പേശി വേദന, ഊര്ജക്കുറവ് എന്നിവയാണ് എം പോക്സിൻ്റെ പ്രാരംഭ ലക്ഷണങ്ങള്. പനി തുടങ്ങി ഒരാഴ്ചയ്ക്കുള്ളില് ദേഹത്ത് കുമിളകളും ചുവന്ന പാടുകളും പ്രത്യക്ഷപ്പെടാന് തുടങ്ങുന്നു. മുഖത്തും, കൈകാലുകളിലുമാണ് കൂടുതല് കുമിളകള് കാണപ്പെടുന്നത്. ഇതിനുപുറമെ കൈപ്പത്തി, ജനനേന്ദ്രിയം എന്നീ ശരീരഭാഗങ്ങളിലും ഇവ കാണപ്പെടാം. അസുഖബാധിതരായ ആള്ക്കാരുമായി സുരക്ഷാ മാര്ഗങ്ങള് അവലംബിക്കാതെ അടുത്തിടപഴകുന്ന ആള്ക്കാര്ക്കാണ് എംപോക്സ് ഉണ്ടാകുന്നത്. വൈറസ് ബാധയുണ്ടെന്ന് സംശയിക്കുന്നതോ സ്ഥിരീകരിച്ചതോ ആയ രോഗികളെ പരിചരിക്കുന്ന ആരോഗ്യ പ്രവര്ത്തകരും രോഗബാധിതരുടെ സ്രവങ്ങള് കൈകാര്യം ചെയ്യുന്നവരും രോഗപ്പകര്ച്ച ഒഴിവാക്കുന്നതിനായി നിര്ബന്ധമായും നിര്ദേശിച്ചിട്ടുള്ള അണുബാധ നിയന്ത്രണ മുന്കരുതലുകള് സ്വീകരിക്കണം. ആരോഗ്യ പ്രവർത്തകർ രോഗികളെയോ അവരുടെ വസ്തുക്കളെയോ സ്പർശിച്ച ശേഷം കൈകൾ സാനിറ്റൈസർ അല്ലെങ്കിൽ സോപ്പും വെള്ളവും ഉപയോഗിച്ച് വൃത്തിയാക്കണം.
ആരോഗ്യ വകുപ്പ് മന്ത്രി വീണാ ജോര്ജിന്റെ നേതൃത്വത്തില് ഉന്നതതല യോഗം ചേര്ന്ന് സ്ഥിതിഗതികള് വിലയിരുത്തി. ആരോഗ്യ വകുപ്പിലെ ഉന്നത ഉദ്യോഗസ്ഥരോടൊപ്പം ജില്ലാ മെഡിക്കല് ഓഫീസര്മാര്, ജില്ലാ പ്രോഗ്രാം മാനേജര്മാര്, ജില്ലാ സര്വൈലന്സ് ഓഫീസര്മാര് എന്നിവര് യോഗത്തില് പങ്കെടുത്തു.
