അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.സിപിഎം ബന്ധം അവസാനിപ്പിച്ച പി.വി.അന്‍വര്‍ എംഎല്‍എയ്ക്ക് എതിരെ നിലമ്പൂരില്‍ പ്രതിഷേധ പ്രകടനം. സിപിഎം നിലമ്പൂര്‍ ഏരിയാ കമ്മിറ്റിയുടെ നേതൃത്വത്തില്‍ നിലമ്പൂര്‍ ടൗണിലാണു പ്രതിഷേധം സംഘടിപ്പിച്ചത്. ‘ചെങ്കൊടി തൊട്ട് കളിക്കേണ്ട’ എന്ന വാചകം എഴുതിയ, അന്‍വറിന്റെ ഫോട്ടോ ഉള്‍പ്പെടുത്തിയ ബാനറുമായിട്ടായിരുന്നു പ്രതിഷേധം. മലപ്പുറത്തെ 18 ഏരിയാ കമ്മിറ്റികളും പ്രതിഷേധം സംഘടിപ്പിക്കുന്നുണ്ട്.
‘രാജിവയ്ക്കൂ പുറത്തു പോകൂ’ എന്ന മുദ്രാവാക്യം പ്രതിഷേധ പ്രകടനത്തില്‍ ഉയര്‍ന്നു. വരും ദിവസങ്ങളിലും പ്രതിഷേധം ഉണ്ടാകുമെന്നു നേതാക്കള്‍ മാധ്യമങ്ങളോട് പറഞ്ഞു. അന്‍വറിന്റെ നിലപാടിനെതിരെ പാര്‍ട്ടിയെ സ്‌നേഹിക്കുന്നവരും പ്രവര്‍ത്തകരും രംഗത്തിറങ്ങണമെന്നും പാര്‍ട്ടി സെക്രട്ടറി വ്യക്തമാക്കി. അന്‍വറിന്റെ നിലപാടുകള്‍ക്കു സമൂഹമാധ്യമത്തില്‍ സ്വീകാര്യത ലഭിച്ചതോടെയാണ് പാര്‍ട്ടി നിലപാട് കര്‍ശനമാക്കിയത്. തന്റെ നിലപാട് വ്യക്തമാക്കാന്‍ ഞായറാഴ്ച അന്‍വറും പൊതുസമ്മേളനം വിളിച്ചിട്ടുണ്ട്. സമ്മേളനത്തില്‍ തന്റെ രാഷ്ട്രീയ നിലപാടുകള്‍ വ്യക്തമാക്കുമെന്നാണ് അന്‍വര്‍ പറയുന്നത്.
