അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.ചങ്ങനാശേരി: തലപ്പാവ് ധാരികളായ ജീവനക്കാ‍ർ വിളമ്പി നൽകുന്ന നെയ്‌റോസ്റ്റ്, ബീട്രൂട്ട് ഇട്ട മസാലദോശ, ഉഴുന്നുവട, കാപ്പി, ഓംലെറ്റ്, കട്ലറ്റ് .. ഇതൊക്കെ കഴിക്കാൻ എവിടെയാണ് പോയിരുന്നതെന്ന് പ്രത്യേകം പറയേണ്ടതില്ലലോ.. അതെ നമ്മുടെ സ്വന്തം ഇന്ത്യൻ കോഫി ഹൗസിൽ. എന്നാൽ ഇനി ചങ്ങനാശ്ശേരിക്കാർക്ക് ആ രുചി ആസ്വദിക്കാൻ യോഗമില്ല. അതേ ചങ്ങനാശേരി കുരിശുംമൂട് ജങ്ഷനിലുള്ള ഇന്ത്യൻ കോഫി ഹൗസിൻ്റെ പ്രവർത്തനം അവസാനിപ്പിച്ചു.
1977ലാണ് ചങ്ങനാശേരി കെഎസ്ആർടിസി ബസ് സ്റ്റാൻഡിന് സമീപമുള്ള കെട്ടിടത്തിൽ കോഫി ഹൗസ് പ്രവർത്തനമാരംഭിച്ചത്. ഏഴ് വർഷം മുൻപാണ് കോഫി ഹൗസ് കുരിശുംമൂട് ജങ്ഷനിലേക്ക് മാറ്റിയത്. ചങ്ങനാശേരിയിലെ ഇന്ത്യ കോഫി ഹൗസ് അടച്ചുപൂട്ടുന്നതോടെ തലപ്പാവ് ധാരികളായ ജീവനക്കാ‍ർ വിളമ്പി നൽകുന്ന വിഭവങ്ങൾ ആസ്വദിക്കണമെങ്കിൽ ചങ്ങനാശേരിക്കാർക്ക് ഇനി കിലോമീറ്ററുകൾ യാത്ര ചെയ്യണം. കോട്ടയം ജില്ലയിൽ കോട്ടയം, പാലാ, പൊൻകുന്നം, തലയോലപ്പറമ്പ് എന്നിവിടങ്ങളിലാണ് മറ്റ് കോഫി ഹൗസുകൾ പ്രവ‍ർത്തിക്കുന്നത്.
ചങ്ങനാശേരിയിലെ ഇന്ത്യൻ കോഫി ഹൗസ് പൂട്ടുന്നതിൽ അതൃപ്തി അറിയിച്ചുള്ള ഫേസ്ബുക്ക് പോസ്റ്റുകളും അതിനിടെ പ്രത്യക്ഷപ്പെടുന്നുണ്ട്. “ഒരു കാപ്പി കുടിക്കാൻ തോന്നുമ്പോൾ ആദ്യം ഓർമ വരുന്ന ഹോട്ടൽ ഇന്ത്യൻ കോഫി ഹൗസ് തന്നെയാണ്. കട്ലറ്റിനും മസാല ദോശക്കുമൊക്കെ കോഫി ഹൗസിനോളം പോന്ന മറ്റൊരു എതിരാളി ഇനി ജനിക്കേണ്ടിയിരിക്കുന്നു. തൊട്ടടുത്ത് ഉണ്ടായിരുന്നതിനെ കുരിശുമൂട്ടിലേക്ക് പറിച്ച് നട്ടപ്പോഴും ഒരാശ്വാസമുണ്ടായിരുന്നു പോകാവുന്ന ദൂരമല്ലേ ഉള്ളൂവെന്ന്. ഇപ്പോൾ അറിയുന്നു അതും പൂട്ടാൻ പോകുന്നുവെന്ന്. ഒരു സാധാരണക്കാരന്റെ വികാരം മനസിലാക്കുന്ന ഭക്ഷണം എന്ന് പറയുമ്പോൾ അത് കോഫി ഹൗസ് തന്നെയാണ്. അതുകൊണ്ട് ഈ തീരുമാനം അവർ മാറ്റിയില്ലെങ്കിൽ കോട്ടയത്തു പോയി കഴിക്കാനാണ് എന്റെ തീരുമാനം”- ഒരാൾ കുറിച്ചു.
“അങ്ങനെ കുരിശുംമൂട്ടിലുള്ള ഇന്ത്യൻ കോഫി ഹൗസിൽനിന്ന് ഇന്ന് ലാസ്റ്റ് മസാല ദോശയും ചിക്കൻ കട്ലെറ്റും കഴിച്ചു. ഭക്ഷണം നൽകുവാൻ ഇനി കോഫി ഹൗസ് കുരിശുംമൂട്ടിൽ രണ്ട് ദിവസം കൂടി മാത്രം. ചങ്ങനാശ്ശേരി കുരിശുമ്മൂട് ഉള്ള ഇന്ത്യൻ കോഫി ഹൗസിന് താഴ് വീഴുന്നു. ഈ മാസം അവസാനത്തോടെ പ്രവർത്തനം അവസാനിപ്പിക്കുമെന്നുള്ള കത്ത് കോഫി ഹൗസിൽ നാളെ പതിപ്പിക്കും. 1977 ചങ്ങനാശേരി കെഎസ്ആർടിസി ബസ്റ്റാൻഡ് സമീപം പായിക്കാട്ട് ബിൽഡിങ് പ്രവർത്തനമാരംഭിച്ച കോഫി ഹൗസ് പിന്നീട് കുരിശുമൂട്ടിലേക്ക് മാറ്റുകയായിരുന്നു. ബീട്രൂട്ട് ഇട്ട ചുവന്ന മസാലദോശ ഇനി ചങ്ങനാശേരിക്ക്‌ ഇല്ല. സാധാരണക്കാരായ മനുഷ്യർക്ക് രുചിയും സാമ്പത്തിക ലാഭവും നൽകിയ കോഫി ഹൗസിൻ്റെ പ്രവർത്തനം നിലയ്ക്കുന്നതോടെ ഒരു തലമുറയ്ക്ക് ഇരിപ്പിടം ഇല്ലാതാവുകയാണ്” – മറ്റൊരാൾ കുറിച്ചു.
അടച്ചുപൂട്ടുന്നതു സംബന്ധിച്ച കാരണം മാനേജർ വ്യക്തമാക്കിയിട്ടില്ല. മുകളിൽ നിന്നുള്ള തീരുമാനമെന്നാണ് അദ്ദേഹം അറിയിക്കുന്നത്. ലാഭമില്ലാത്തതിനെ തുടർന്നാണ് കോഫി ഹൗസ് പൂട്ടുന്നതെന്നാണ് അധികൃതരെ ഉദ്ധരിച്ചുള്ള റിപ്പോർട്ടുകളിൽ വ്യക്തമാക്കുന്നത്. വഴിയോരങ്ങളിലെ കാപ്പി, ചായ, ചെറുകടി സ്ഥാപനങ്ങളും വീട്ടിലെ ഊണും വ്യാപകമായതാണ് കോഫി ഹൗസിന് തിരിച്ചടിയായതെന്നാണ് സൂചന.
content highlight: indian-coffee-house-in-changanassery-closing
