അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.ന്യൂഡൽഹി: അടുത്ത ചീഫ് ജസ്റ്റിസായി സുപ്രിംകോടതിയിലെ മുതിർന്ന ജഡ്ജിമാരിൽ രണ്ടാമനായ സഞ്ജീവ് ഖന്നയെ ശുപാർശ ചെയ്ത് ചീഫ് ജസ്റ്റിസ് ഡി.വൈ ചന്ദ്രചൂഡ്. സ്ഥാനമൊഴിയുന്ന ചീഫ് ജസ്റ്റിസ് പിന്‍ഗാമിയെ നിര്‍ദേശിക്കുന്നത് കീഴ്‌വഴക്കമാണ്. ശുപാർശ കേന്ദ്ര നിയമകാര്യ വകുപ്പ് അംഗീകരിച്ചാൽ രാജ്യത്തിന്റെ 51-ാമത് ചീഫ് ജസ്റ്റിസായി സഞ്ജീവ് ഖന്ന നിയമിതനാകും. 2025 മെയ് 13 ന് വിരമിക്കുന്ന സഞ്ജീവ് ഖന്നക്ക് ആറ് മാസമാകും ചീഫ് ജസ്റ്റിസ് പദവിയിൽ ഇരിക്കാനാവുക.
ചീഫ് ജസ്റ്റിസ് ചന്ദ്രചൂഡ് നവംബർ 10 ന് വിരമിക്കാനിരിക്കെയാണ് സഞ്ജീവ് ഖന്നയെ പിൻഗാമിയായി ചുമതലപ്പെടുത്തണമെന്ന് അഭ്യർത്ഥിച്ച് കഴിഞ്ഞ ആഴ്ച സർക്കാരിന് അദ്ദേഹം കത്തെഴുതിയത്.
ജസ്റ്റിസ് ഖന്ന 1983-ൽ ഡൽഹി ബാർ കൗൺസിലിൽ അഭിഭാഷകനായി എൻറോൾ ചെയ്തു. ആദ്യം തീസ് ഹസാരി കോംപ്ലക്സിലെ ജില്ലാ കോടതികളിൽ പ്രാക്ടീസ് ചെയ്ത അദ്ദേഹം പിന്നീട് ഡൽഹി ഹൈക്കോടതിയിലേക്കും ട്രൈബ്യൂണലുകളിലേക്കും മാറി. ഡൽഹി ഹൈക്കോടതിയിൽ നിരവധി ക്രിമിനൽ കേസുകളിൽ അഡീഷ്ണൽ പബ്ലിക് പ്രോസിക്യൂട്ടറായും അമിക്കസ് ക്യൂറിയായും ഹാജരാവുകയും വാദിക്കുകയും ചെയ്തിട്ടുണ്ട്.
ആദായനികുതി വകുപ്പിൻ്റെ സീനിയർ സ്റ്റാൻഡിംഗ് കൗൺസലായി ദീർഘകാലം സേവനമനുഷ്ഠിച്ച അദ്ദേഹം 2004-ൽ ദേശീയ തലസ്ഥാന പ്രദേശമായ ഡൽഹിയുടെ സ്റ്റാൻഡിംഗ് കൗൺസലായി (സിവിൽ) നിയമിതനായി. 2005-ൽ ഡൽഹി ഹൈക്കോടതിയുടെ അഡീഷണൽ ജഡ്ജിയാവുകയും 2006-ൽ സ്ഥിരം ജഡ്ജിയായി നിയമിക്കുകയും ചെയ്തു. 2019 ജനുവരി 18-ന് അദ്ദേഹം സുപ്രിം കോടതി ജഡ്ജിയായി.
