സ്ഥിരം ചിക്കൻ രുചികൾ മടുത്തോ ? എങ്കിൽ തയാറാക്കാം ചിന്താമണി ചിക്കൻ | chinthamani-chicken

സ്ഥിരം ചിക്കൻ കറിയും ചിക്കൻ ഫ്രൈയും കഴിച്ചു മടുത്തോ ? പുതിയ രുചിയിൽ പരീക്ഷിക്കാൻ പറ്റിയ മികച്ച ഒരു തമിഴ്നാടൻ വിഭവമാണ് ചിന്താമണി ചിക്കൻ. അധികം മസാലകൾ ഒന്നും തന്നെ ഇല്ലാതെ എളുപ്പത്തിൽ തയാറാക്കാൻ പറ്റും. ചോറ്, ചപ്പാത്തി, പൊറോട്ട ഇവയുടെ കൂടെ കഴിക്കാം.

ചേരുവകൾ

ചിക്കൻ – ഒരുകിലോഗ്രാം
വറ്റൽമുളക് – 20 എണ്ണം
ചെറിയ ഉള്ളി – 400 ഗ്രാം
തേങ്ങാക്കൊത്ത് – ഒരു മുറി തേങ്ങയുടേത്
നല്ലെണ്ണ – 4 ടേബിൾസ്പൂൺ
കടുക് – ഒരു ടീസ്പൂൺ
ജീരകം – ഒരു ടീസ്പൂൺ
മഞ്ഞൾപ്പൊടി – അര ടീസ്പൂൺ
കാശ്മീരി മുളകുപൊടി – അര ടീസ്പൂൺ
വെളുത്തുള്ളി ചതച്ചത് – ഒരു കുടം.
ഉപ്പ് – ആവശ്യത്തിന്

തയാറാക്കുന്ന വിധം

• വറ്റൽമുളക് നീളത്തിൽ കീറി ഉള്ളിലെ അരി മുഴുവൻ കളഞ്ഞ് ചെറിയ കഷ്ണങ്ങളാക്കി വയ്ക്കുക.
• ചിക്കൻ കഴുകി വൃത്തിയാക്കി ചെറിയ ചെറിയ കഷ്ണങ്ങളാക്കി വയ്ക്കുക.
• ചുവടു കട്ടിയുള്ള ഒരു പാത്രത്തിൽ നല്ലെണ്ണ ചൂടാക്കി കടുകും ജീരകവും മൂപ്പിക്കുക.(നല്ലെണ്ണയുടെ രുചി ഇഷ്ടമല്ലാത്തവർക്ക് വെളിച്ചെണ്ണ ഉപയോഗിക്കാവുന്നതാണ്)
• കടുക് പൊട്ടി തുടങ്ങുമ്പോൾ ചുവന്നുള്ളി, തേങ്ങാക്കൊത്ത്, വറ്റൽമുളക്, കറിവേപ്പില, ചിക്കന് ആവശ്യമുള്ള ഉപ്പ് ഇവ ചേർത്ത് വഴറ്റുക.
• ഉള്ളി മൊരിഞ്ഞു തുടങ്ങുമ്പോൾ വെളുത്തുള്ളിയും ചേർത്ത് വഴറ്റുക.
• വെളുത്തുള്ളിയുടെ പച്ചമണം മാറുമ്പോൾ മഞ്ഞൾപ്പൊടി ചേർത്ത് വഴറ്റുക.
• ചെറിയ കഷണങ്ങളാക്കിയ ചിക്കൻ ചേർത്ത് നിറം മാറുന്നതുവരെ വഴറ്റി അടച്ചു വച്ച് ചെറിയ തീയിൽ 15 മിനിറ്റ് വേവിക്കുക (നാടൻ ചിക്കനാണു ഉപയോഗിക്കുന്നതെങ്കിൽ കൂടുതൽ സമയം വേവിക്കണം)
• ചിക്കനിലെ വെള്ളം വറ്റി എണ്ണ തെളിഞ്ഞു തുടങ്ങുമ്പോൾ മുളകുപൊടി ചേർത്ത് വഴറ്റുക.
• അൽപം കറിവേപ്പിലയും ചേർത്ത് ചെറിയ തീയിൽ ഇളം ബ്രൗൺ നിറമാകുന്നതുവരെ വരട്ടിയെടുക്കുക.
• ഏറെ രുചിയുള്ള ചിന്താമണി ചിക്കൻ തയാർ.

content highlight: chinthamani-chicken