അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.പാലക്കാട്: ചേലക്കരയിൽ സ്ഥാനാർഥി രമ്യ ഹരിദാസിനെ കോൺഗ്രസ് പിൻവലിക്കണമെന്ന് പി.വി അൻവർ എംഎൽഎ. പാലക്കാടും ചേലക്കരയിലും പി.വി അൻവറിന്റെ ഡെമോക്രാറ്റിക് മൂവ്‌മെന്റ് ഓഫ് കേരള(ഡിഎംകെ)യുടെ ടിക്കറ്റിൽ മത്സരിക്കുന്നവരെ പിൻവലിക്കണമെന്ന് യുഡിഎഫ് ആവശ്യമുന്നയിച്ചതിന് പിന്നാലെയാണ് അദ്ദേഹത്തിന്റെ പ്രതികരണം.
രമ്യ ഹരിദാസിനെ അവരുടെ പാർട്ടിക്കാർ തന്നെ തള്ളിക്കളഞ്ഞതാണ്. ചേലക്കരയിൽ ഡിഎംകെ പിന്തുണയിൽ മത്സരിക്കുന്ന എൻ.കെ സുധീറിനെ യുഡിഎഫ് പിന്തുണയ്ക്കണം. നാമനിർദേശപത്രിക നൽകി പ്രവർത്തനം നടത്തി ഒരാഴ്ച മുന്നോട്ടു പോയ കോൺഗ്രസിന്റെ എത്രയോ സ്ഥാനാർഥികളെ പിൻവലിച്ച ചരിത്രമുണ്ട്. ചേലക്കരയിൽ കോൺഗ്രസ് രമ്യ ഹരിദാസിനെ പ്രഖ്യാപിക്കുക മാത്രമാണ് ഉണ്ടായിട്ടുള്ളത്. നാമനിർദേശ പത്രിക നൽകിയിട്ടില്ലെന്നും അദ്ദേഹം പറഞ്ഞു.
പാലക്കാട്ടും ചേലക്കരയിലും തങ്ങളെ പിന്തുണയ്ക്കണമെന്നാണ് യുഡിഎഫ് ആവശ്യപ്പെടുന്നത്. ഇതിൽ പാലക്കാട് നിർണായകമാണ്. ഈ സാഹചര്യത്തിലാണ് ചേലക്കരയിൽ തിരിച്ച് പിന്തുണയെന്ന ആവശ്യം അൻവർ മുന്നോട്ട് വെക്കുന്നത്.
ചേലക്കരയിലെ യുഡിഎഫ് സ്ഥാനാർത്ഥിയെ യുഡിഎഫുകാർ പോലും തള്ളിപ്പറഞ്ഞുവെന്നും വാർത്താ സമ്മേളനത്തിൽ അൻവർ പരിഹസിച്ചു. പിണറായിസം ഇല്ലാതാക്കാൻ ഒന്നിച്ചു നിൽക്കണം. ആർഎസ്എസിനെ പോലെ തന്നെ പിണറായിസത്തെയും എതിർക്കണം. യുഡിഎഫ് നേതാക്കൾ ഇപ്പോഴും ചർച്ചകൾ നടത്തുന്നു. അനുകൂല തീരുമാനത്തിനായി കാത്തിരിക്കുകയാണ്. തീരുമാനം വൈകിയാൽ ഈ കപ്പൽ പോകും. പ്രഖ്യാപിച്ച സ്ഥാനാർത്ഥികളെ പിൻവലിച്ച ചരിത്രം മുമ്പും ഉണ്ടായിട്ടുണ്ടെന്നും യുഡിഎഫ് തീരുമാനത്തിനായി കാക്കുകയാണെന്നും അൻവർ വ്യക്തമാക്കി.
അതേസമയം പാലക്കാടും ചേലക്കരയിലും സ്ഥാനാർഥികളെ പിൻവലിക്കണമെന്ന യുഡിഎഫ് ആവശ്യം പി.വി അൻവർ തള്ളി. സ്ഥാനാർഥികളെ തത്കാലം പിൻവലിക്കില്ലെന്നും ആദ്യം ഞാനുന്നയിച്ച ആവശ്യം അംഗീകരിക്കട്ടെയെന്നുമാണ് അൻവറിന്റെ പ്രതികരണം. നേതാക്കളുമായി ഇപ്പോഴും ചർച്ച നടന്നുകൊണ്ടിരിക്കയാണെന്നും അനുകൂല തീരുമാനമുണ്ടായില്ലെങ്കിൽ നിലവിലെ പോലെ മുന്നോട്ടുപോകുമെന്നും അൻവർ വ്യക്തമാക്കി.
