അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.തിരുവനന്തപുരം: കെഎസ്ആർടിസി ഡ്രൈവറുമായുള്ള തർക്കത്തിൽ മേയർ ആര്യാ രാജേന്ദ്രനും സച്ചിൻദേവ് എംഎൽഎക്കും ക്ലീൻ ചിറ്റ് നൽകി പൊലീസ് റിപ്പോർട്ട്. എംഎൽഎ ബസിൽ അതിക്രമിച്ചു കയറിയിട്ടില്ല, ഡ്രൈവർ യദു ഹൈഡ്രോളിക് ഡോർ തുറന്നുനൽകിയതിന് ശേഷമാണ് എംഎൽഎ ബസിനകത്ത് കയറിയതെന്നാണ് പൊലീസ് പറയുന്നത്. മേയറും എംഎൽഎയും മോശം ഭാഷ ഉപയോഗിച്ചതിന് സാക്ഷിമൊഴികളില്ലെന്നും പൊലീസ് റിപ്പോർട്ടിൽ പറയുന്നു.
പരാതിയില്‍ പോലീസ് അന്വേഷണം കോടതി നിരീക്ഷണത്തില്‍ നടത്തണമെന്നാവശ്യപ്പെട്ട് യദു ഹര്‍ജി നല്‍കിയിരുന്നു. എന്നാല്‍ ഇത് പരിഗണിക്കുന്നതിന് മുന്‍പേ തന്നെ അന്വേഷണ പുരോഗതി റിപ്പോര്‍ട്ട് കോടതി പോലീസിനോട് ആവശ്യപ്പെട്ടിരുന്നു. യദുവിന്റെ ഹര്‍ജി പരിഗണിക്കുമ്പോള്‍ അന്വേഷണ പുരോഗതി റിപ്പോര്‍ട്ട് പോലീസ് കോടതിയില്‍ സമര്‍പ്പിച്ചു. ഈ റിപ്പോര്‍ട്ടിലാണ് മേയർക്കും എംഎല്‍എയ്ക്കുമെതിരേയുള്ള രണ്ട് കുറ്റങ്ങളും ഒഴിവാക്കിയിട്ടുള്ളത്. സച്ചിന്‍ ദേവ് എംഎല്‍എ ബസ്സില്‍ അതിക്രമിച്ച് കയറി അസഭ്യം പറഞ്ഞുവെന്നായിരുന്നു യദുവിന്റെ പരാതി. എംഎല്‍എ ബസ്സില്‍ അതിക്രമിച്ചുകയറിയതിന് തെളിവ് കണ്ടെത്താനായില്ലെന്നും അതിനാല്‍ ഈ പരാതി നിലനില്‍ക്കില്ലെന്നും പോലീസ് റിപ്പോര്‍ട്ടില്‍ പറയുന്നു.
യദു ഓടിച്ചിരുന്ന ബസ്സിന്റെ ഡോര്‍ ഹൈഡ്രോളിക് സംവിധാനമുള്ളതാണ്. അത് തുറക്കണമെങ്കില്‍ ഡ്രൈവര്‍ വിചാരിക്കണം. ഈ ഡോര്‍ തുറന്നുകൊടുത്തതിന് ശേഷമാണ് സച്ചിന്‍ ദേവ് എംഎല്‍എ വാഹനത്തിനുള്ളില്‍ കയറിയത്. അത് അതിക്രമിച്ചുകടന്നുവെന്ന കുറ്റത്തിന്റെ പരിധിയില്‍ വരില്ലെന്നാണ് പോലീസിന്റെ കണ്ടെത്തല്‍. മേയര്‍ ആര്യ രാജേന്ദ്രനും സംഘവും തന്നെ അസഭ്യം പറഞ്ഞുവെന്നായിരുന്നു യദുവിന്റെ മറ്റൊരു പരാതി. എന്നാല്‍ മേയറും സംഘവും യദുവിനെ അസഭ്യം പറഞ്ഞതായി അവിടെയുണ്ടായിരുന്ന ദൃക്‌സാക്ഷികളും ബസ്സിലെ യാത്രക്കാരും മൊഴി നല്‍കിയിട്ടില്ല എന്നും പോലീസ് റിപ്പോര്‍ട്ടില്‍ പറയുന്നു. സര്‍ക്കാര്‍ ജീവനക്കാരന്റെ ഔദ്യോഗിക കൃത്യനിര്‍വഹണം തടസ്സപ്പെടുത്തല്‍, തടഞ്ഞുവെക്കല്‍, തെളിവ് നശിപ്പിക്കല്‍ എന്നീ പരാതികളിലാണ് ഇപ്പോള്‍ അന്വേഷണം നടക്കുന്നതെന്നും പോലീസ് കോടതിയില്‍ അറിയിച്ചു. യദു പരാതിയില്‍ പറയുന്ന കാര്യങ്ങള്‍ സ്ഥിരീകരിക്കണമെങ്കില്‍ ബസ്സിനുള്ളിലെ സിസിടിവിയുടെ മെമ്മറി കാര്‍ഡ് ലഭിക്കേണ്ടതുണ്ട്. എന്നാല്‍ ഈ കാര്‍ഡ് കാണാനില്ല, ഇതില്‍ തമ്പാനൂര്‍ പോലീസ് കേസ് രജിസ്റ്റര്‍ ചെയ്ത് അന്വേഷണം നടത്തുകയാണ്. നിലവില്‍ മേയറേയോ എംഎല്‍എയയോ അറസ്റ്റ് ചെയ്യാനുള്ള കുറ്റങ്ങള്‍ തെളിഞ്ഞിട്ടില്ലെന്നും പോലീസ് വ്യക്തമാക്കുന്നു. ഡ്രൈവര്‍ യദു റൂട്ട് മാറ്റിയാണ് ബസ് ഓടിച്ചതെന്നടക്കമുള്ള കാര്യങ്ങളും പോലീസ് കോടതിയെ അറിയിച്ചിട്ടുണ്ട്.
